TEMAJ AM BɅ TIʼ TEJCHIBAL | ¿AM BA I CʼɅJÑIBAL JIÑI ORACIÓN?
¿Chucoch mucʼob ti oración jiñi quixtañujob?
«Jiñi alas jiñʌch ñumen ñuc bʌ tij cuxtʌlel. Mic mel oración come com c taj cabʌl taqʼuin. Pero maʼañic tsaʼ mejliyon.» (Samuel,a Kenia)
«Yaʼ ti escuela mic subentel lon jasʌl mij cʌl lon tic jol jiñi tʼan muʼ bʌ c subentel lon c ñop chaʼan oración.» (Teresa, Filipinas)
«Cheʼ bʌ an c wocol mic mel oración. Mij cʼajtin jaʼel i ñusʌntel c mul yicʼot chaʼan mic ñumen tojʼan bajcheʼ xñoptʼan.» (Magdalene, Ghana)
Tsaʼ bʌ i yʌlʌ Samuel, Teresa yicʼot Magdalene miʼ pʌs chaʼan cabʌl i sujmlel cheʼ miʼ mel oración jiñi wiñicob xʼixicob (quixtañujob), an wen jach bʌ i sujmlel cheʼ miʼ melob. An loqʼuemʌch bʌ tiʼ pusicʼal miʼ melob, i an mach bʌ cheʼiqui, junsujm jach chuqui miʼ chʌn alob. Pero yonlelob i cʼʌjñibalʌch miʼ qʼuelob jiñi oración, mach yʌlʌyic chucoch miʼ melob, tajol chaʼan miʼ ñusañob jumpʼejl examen, chaʼan miʼ mʌl (jot) alas jiñi equipo muʼ bʌ i mulañob, chaʼan wen miʼ yajñelob i familia o yan tac bʌ. An melbil cʼajtiya tac baqui an i yʌlʌyob chaʼan jinto maʼañobic bʌ i ñopbal miʼ melob oración.
¿Muʼ baʼ mel oración jatet? Mi cheʼi, ¿chuqui maʼ cʼajtin? Mi ñʌmʌlet o maʼañic ti mel oración, tajol maʼ cʼajtiben a bʌ: ¿Añʌch ba i cʼʌjñibal? ¿Am ba majqui miʼ ñʌchʼtan? Juntiquil xtsʼijbaya tsiʼ yʌlʌ chaʼan jiñi oración lajal jach bajcheʼ «jumpʼejl terapia». An doctorob cheʼ bʌ miʼ ñaʼtañob jaʼel, chaʼan lajal jach bajcheʼ «baqui jach tac bʌ tsʼac». ¿Chuqui maʼ ñop jatet? ¿Chaʼan jach ba cheʼix ñʌmʌlob jiñi quixtañu cheʼ miʼ melob, o tajol chaʼan miʼ tajbeñob jumpʼejl i wenlel?
Jiñi Biblia yambʌ chuqui miʼ cʌntesañonla. Miʼ yʌl chaʼan jiñi oración wen ñuc i cʼʌjñibal. Chaʼan añʌch majqui miʼ ñʌchʼtan jiñi wen jach bʌ i sujmlel chucoch miʼ mejlel. ¿Isujm ba iliyi? Laʼ laj qʼuel chucoch cheʼʌchi.
a An cʼabaʼʌl tac tsaʼ bʌ qʼuextʌyi.