¿Chucoch yom mi lac melben oración Dios?

Dios miʼ pʌyonla tiʼ yamigo.

Cheʼ bʌ chaʼtiquil amigo miʼ wen pejcañob i bʌ, miʼ ñumen pʼʌtʼañob. Dios miʼ pʌyonla chaʼan mi lac pejcan i mi lac sujtel tiʼ yamigo. Miʼ subeñonla: «Cheʼ jini mi caj laʼ pejcañon. Mi caj laʼ tilel laʼ pejcañon ti oración. Joñon mi caj cubibeñetla laʼ tʼan» (Jeremías 29:12). Cheʼ mi lac chʌn pejcan Dios, mi caj lac lʌcʼtiyel tiʼ tojlel, i «mi caj i lʌcʼtesan i bʌ» baʼ añonla (Santiago 4:8). Jiñi Biblia miʼ subeñonla: «Lʌcʼʌl an lac Yum tiʼ tojlel pejtelel muʼ bʌ i pejcañob» (Salmo 145:18). Cheʼ mi lac ñumen melben oración, ñumen pʼʌtʌl mi caj la cajñel bajcheʼ i yamigo.

Dios yom i coltañonla.

Jesús tsiʼ yʌlʌ: «¿Am ba juntiquil winic ti a tojlel muʼ bʌ caj i yʌqʼuen xajlel i yalobil mi tsiʼ cʼajtibe waj? Mi tsiʼ cʼajtibe chʌy, ¿muʼ ba i yʌqʼuen lucum? Anquese jontoletla laʼ wujil laʼ wʌqʼuen laʼ walobilob chuqui utsʼat. ¿Mach ba ñumenic yujil laʼ Tat am bʌ ti panchan? Miʼ yʌqʼueñob chuqui utsʼat jini muʼ bʌ i cʼajtibeñob» (Mateo 7:9-11). Cheʼʌchi, Dios yom chaʼan mi lac pejcan come miʼ qʼuelonla ti ñuc yicʼot yom i coltañonla (1 Pedro 5:7). Miʼ subeñonla chaʼan mi laj cʼajtiben i coltaya cheʼ añonla ti wocol. Jiñi Biblia miʼ yʌl: «Mach mi laʼ chaʼlen tsic pusicʼal pero tiʼ pejtelel chuqui tac miʼ yujtel subenla Dios chuqui tac yom ti oración. Chʌn cʼajtibenla. Subenla wocolix i yʌlʌ» (Filipenses 4:6).

I cʼʌjñibal lac chaʼan i coltaya Dios.

Jiñi wen chajpʌbiloʼ bʌ chaʼan i tsajintel bajcheʼ yilalonla ti jujuntiquil, cʼotem i qʼuelob chaʼan yonlelob jiñi muʼ bʌ i yubiñob chaʼan yomʌch miʼ melob oración. Jinto jiñi maʼañic bʌ miʼ ñopob (yʌcʼob ti ñuc) Dios yicʼot maʼañic bʌ miʼ yʌlob chaʼan añʌch o maʼañic Dios.a Ili miʼ pʌs chaʼan i cʼʌjñibalʌch mi la cubin cheʼ lʌcʼʌl añonla tiʼ tojlel tsaʼ bʌ i Meleyonla. Jesús tsiʼ yʌlʌ: «Tijicña jiñi muʼ bʌ i ñaʼtañob chaʼan ñucʌch i cʼʌjñibal i chaʼan bʌ Dios» (Mateo 5:3, TNM). Junchajp bajcheʼ mi lac taj jiñʌch cheʼ mi lac chʌn pejcan Dios.

¿Chuqui miʼ yujtel mi maʼañic mi lac jacʼ cheʼ miʼ pʌyonla?