Jiñi xpejcaya juñob miʼ cʼajtibeñob i bʌ
¿Chuqui yom i yʌl cheʼ bʌ Jesús tsiʼ yʌlʌ «mach laʼ ñaʼtan chaʼan tsaʼ tili cʌcʼ ñʌchʼtʌlel»?
Jesús tsiʼ yʌlʌ chaʼan yom mi lac sʌclan ñʌchʼtʌlel. Pero ti jumpʼejl bʌ qʼuin tiʼ sube jiñi i yapóstolob: «Mach laʼ ñaʼtan chaʼan tsaʼ tili cʌcʼ ñʌchʼtʌlel wʌʼ ti pañimil, maʼañic tsaʼ tili cʌcʼ ñʌchʼtʌlel, tsaʼ tili cʌcʼ tʼox bʌ. Come tsaʼ tili c tʼox jiñi familia tac: Jiñi alob mi caj i contrajin i tat, jiñi xchʼoc mi caj i contrajin i ñaʼ i jiñi ʌʼlibʌl mi caj i contrajin i suegra» (Mat. 10:34, 35). ¿Chuqui yom i yʌl ili tʼan tac?
Jesús mach yomic i tʼox jiñi familia tac, pero yujil chaʼan an tajol jiñi i cʌntesa tac mucʼʌch caj i yʌcʼ ti ujtel jiñi. Jiñi yomoʼ bʌ i chʼʌmob jaʼ chaʼan miʼ sujtelob ti xcʌntʼañob i chaʼan yom yujilob chaʼan an tajol jiñi i familia maʼañic mi caj i mulañob. I sujmʌch, an wocol bʌ mi caj i yubiñob chaʼan miʼ tsajcañob Cristo tiʼ caj miʼ contrajintelob tiʼ ñoxiʼal, tiʼ yijñam o yambʌ i familia.
Jiñi Biblia miʼ suben jiñi xñoptʼañob: «Ajñenla ti ñʌchʼtʌlel laʼ wicʼot yambʌlob» (Rom. 12:18). Pero jiñi i cʌntesa tac Jesús miʼ mejlel i tʼox jiñi familia tac. Ili miʼ yujtel cheʼ bʌ juntiquil yaʼ ti familia miʼ jacʼ i cʌntesa tac Jesús, pero jiñi yambʌlob maʼañic miʼ mulañob o muʼto i contrajiñob. Jiñi i familiajob, jiñi «añoʼ bʌ tiʼ yotot», miʼ sujtelob tiʼ contra come woli (choncol) i cʌn jiñi i sujmlel (Mat. 10:36).
Jiñi xcʌntʼañob i chaʼan Cristo chumuloʼ bʌ yicʼot i familiajob añoʼ bʌ yambʌ i ñopbal an chuqui tac miʼ ñusañob muʼ bʌ i pʌs bajcheʼ cʼamel i cʼuxbiya tiʼ tojlel Jehová yicʼot Jesús. Tajol jiñi i familiajob miʼ xicʼob chaʼan miʼ melob (chaʼleñob) qʼuiñijel tac chaʼan bʌ jiñi i ñopbalob. Ti jiñi bʌ ora, yom miʼ pʌsob majqui yom i yʌqʼueñob i tijicñʌyel. Jesús tsiʼ yʌlʌ: «Jiñi ñumen am bʌ i cʼuxbiya tiʼ tojlel i tat i ñaʼ i mach tic tojlelic maʼañic miʼ mejlel ti sujtel ti xcʌntʼan c chaʼan» (Mat. 10:37). Jesús maʼañic tsiʼ yʌlʌ chaʼan mach yomic mi lac wen cʼuxbin lac tat lac ñaʼ chaʼan mi lac mejlel ti sujtel ti xcʌntʼan i chaʼan. Woli (yʌquel) jach i subeñob chaʼan yom yujilob chuqui jiñi ñumen ñuc bʌ i cʼʌjñibal tiʼ tojlelob. Mi juntiquil ti lac familia mach bʌ Testigojic mach yomic i qʼuelonla tiʼ caj mi lac chʼujutesan Jehová, mucʼʌch lac bej cʼuxbin, pero la cujil chaʼan jiñi ñumen ñuc bʌ i cʼʌjñibal jiñʌch laj cʼuxbiya ti Dios.
I sujmʌch, cʼuxʌch mi la cubin cheʼ bʌ jiñi lac familia miʼ contrajiñonla. Pero jiñi xcʌntʼañonbʌla cʼajal lac chaʼan ili tʼan tac: «Jiñi maʼañic bʌ miʼ chʼʌm i teʼ chaʼan bʌ wocol i miʼ tsajcañon maʼañic miʼ mejlel ti sujtel ti xcʌntʼan c chaʼan» (Mat. 10:38). Jin chaʼan, jiñi xñoptʼañonbʌla la cujil chaʼan mi la com lac tsajcan Jesús yom mi lac ñusan wocol tac, cheʼ bajcheʼ jiñi contrajintel ti lac familia. Pero mi lac pijtan chaʼan jiñi wem bʌ lac melbal (chaʼlibal) miʼ coltañob chaʼan miʼ qʼuextañob i ñaʼtʌbal i miʼ mulañob i cʌn muʼ bʌ i yʌl jiñi Biblia (1 Ped. 3:1, 2).