¿Chajpʌbilet ba chaʼan maʼ wʌqʼuentel jiñi Lum?

CHAJPɅBILONLA CHAʼAN MI LAC SUJTESAN TI PARAÍSO ILI LUM

Cheʼ bʌ Jehová tiʼ sube Adán yicʼot Eva «butʼula jini pañimil. Cʼʌñʌla», tsiʼ yʌcʼʌ ti ñaʼtʌntel chaʼan jiñi Pañimil mi caj i sujtel ti paraíso ti jumpʼejl bʌ qʼuin (Gn. 1:28). Jiñi muʼ bʌ caj i chumtʌlob yaʼi mi caj i tsʼʌctesañob iliyi. Cheʼ bʌ miʼ yujtel jiñi Armagedón maxto añic jiñi Paraíso, come jiñi Edén wajalix tsaʼ jili. Mi caj lac sʌqʼuesan tsaʼ tac bʌ i yʌsi jiñi lac piʼʌlob. ¡Jumpʼejlʌch ñuc bʌ eʼtel!

Cheʼ bʌ jiñi israelitajob tsaʼ loqʼuiyob ti Babilonia tsaʼʌch cʼoti i chaʼ tojʼesañob jaʼel jiñi i lumal come 70 jab maʼañic majqui tsaʼ chumle. Pero tsaʼʌch mejliyob come Jehová tsiʼ coltayob, cheʼ bajcheʼ tsiʼ yʌlʌ jiñi xʼaltʼan Isaías: «Mi caj c chaʼ mel ti utsʼat pejtel jini jejmenix bʌ tiʼ tojlel. Mi caj c sutqʼuin jini tiquin bʌ lum ti wen bʌ lum chaʼan utsʼat miʼ yʌcʼ i wut cheʼ bajcheʼ Edén i pʌcʼʌb laʼ Yum» (Is. 51:3). Jiñi israelitajob wen utsʼatax tsaʼ mejli i sujtesañob jiñi i lumal. Jehová mucʼʌch caj i coltan jaʼel jiñi muʼ bʌ caj i yʌqʼuentelob jiñi Lum chaʼan miʼ mejlel i sujtesañob ti jumpʼejl paraíso. Ili ora añix chuqui miʼ mejlel a mel chaʼan maʼ pʌs chaʼan a womʌch coltaya ti ili eʼtel.

Maʼ mejlel a chaʼlen wersa chaʼan sʌc yicʼot yomol a chaʼan a wotot yicʼot i joytʌlel. Mucʼʌch a mejlel a mel iliyi anquese jiñi chumuloʼ bʌ ti a tʼejl mach cheʼic ñʌmʌlob i mel. Cheʼ jaʼel maʼ mejlel ti coltaya tiʼ sʌqʼuesʌntel yicʼot i cʌntʌntel jiñi i Yotlel tempa bʌ yicʼot i Yotlel colem tempa bʌ tac. I mi mucʼʌch a mejlel, maʼ mejlel ti majlel ti coltaya yaʼ baqui miʼ yujtel wocol. Cheʼ bajcheʼ jiñi mi caj a pʌs chaʼan a womʌch a coltan jiñi i cʼʌjñibal bʌ i chaʼan. Cʼajtiben a bʌ: «¿Am ba chuqui miʼ mejlel j cʌn c mel muʼ bʌ i mejlel i coltañon ti talto bʌ qʼuin mi Jehová miʼ yʌcʼon ti chumtʌl ila ti Lum?».

CHAJPɅBILONLA CHAʼAN MI LAJ COLTAN JIÑI MUʼ BɅ CAJ I CHʼOJYELOB

Cheʼ bʌ Jesús tsiʼ cuxtesʌbe i yixicʼal (yixicpʼeñal) Jairo tsiʼ yʌlʌ chaʼan miʼ yʌqʼuentel chuqui miʼ cʼux jiñi xchʼoc (Mar. 5:42, 43). Tajol mach wocolic chaʼan miʼ yʌqʼuentel chuqui i cʼʌjñibal i chaʼan juntiquil xchʼoc am bʌ 12 i jabilel. Pero miʼ mejlel lac ñaʼtan chaʼan wen cabʌl eʼtel miʼ cajel cheʼ bʌ Jesús miʼ tsʼʌctesan iliyi: «Pejtelel jiñi añoʼ bʌ ti mucoñibʌl mi caj i yubibeñob i tʼan i mi caj i loqʼuelob» (Juan 5:28, 29). Anquese jiñi Biblia maʼañic miʼ luʼ al bajcheʼ miʼ cajel, miʼ mejlel lac ñaʼtan chaʼan jiñi muʼ bʌ i chaʼ chʼojyelob yom mi caj i yʌqʼuentelob chuqui miʼ cʼux, baqui mi caj i chumtʌlob yicʼot i pislelob. ¿Muʼ ba i mejlel a pʌs ili ora chaʼan a womʌch ajñel yaʼi chaʼan maʼ chaʼlen coltaya? Ñaʼtan ili cʼajtiya tac.

¿Muʼ ba a pʌy ti cʼux waj jiñi superintendente chaʼan circuito cheʼ bʌ miʼ sujbel ti a congregación chaʼan mi caj i cʼotel ti julaʼ? Tajol juntiquil betelita muqʼuix i loqʼuel ti Betel o juntiquil superintendente mach chʌn circuitojix. ¿Muʼ ba a mejlel a coltañob i taj baqui miʼ chumtʌlob? Miʼ muʼqui caj i mejlel jumpʼejl colem tempa bʌ yaʼ baqui chumulet, ¿muʼ ba a mejlel ti coltaya cheʼ bʌ maxto mejli o cheʼ bʌ tsaʼix ujti jiñi colem tempa bʌ, o chaʼan maʼ pijtañob jiñi invitadoʼ bʌ i chaʼan jiñi sucursal?

CHAJPɅBILONLA CHAʼAN MI LAJ CɅNTESAN JIÑI MUʼ BɅ I CHAʼ CHʼOJYELOB

Muʼ bʌ i yʌl Hechos 24:15 miʼ yʌqʼueñonla lac ñaʼtan chaʼan cabʌl muʼ bʌ caj i chaʼ chʼojyelob. Cabʌlob maʼañic tsaʼ mejli i cʌñob Jehová cheʼ bʌ cuxulobto, pero mucʼʌch caj i mejlel i cʌñob yaʼ ti tsijiʼ bʌ pañimil.a Jiñi xucʼul bʌ tsiʼ melbeyob i yeʼtel Jehová mucʼʌch caj i mejlelob ti coltaya jaʼel (Is. 11:9). Charlotte, juntiquil hermana tsaʼ bʌ i chaʼle subtʼan ti Europa, Sudamérica yicʼot ti África, wen yomix chaʼan miʼ cʼotel jiñi qʼuin. Wen tijicña miʼ yʌl: «Wen comix j cʌntesan jiñi muʼ bʌ i chaʼ chʼojyelob. Cheʼ bʌ mic pejcan tiʼ tojlel juntiquil tsaʼ bʌ chumle ti wajali, mic ñaʼtan: ‹Cheʼ tsaʼic i cʌñʌ Jehová, wen qʼuexel bajcheʼ yilal tsaʼ chumle›. Wen comix c suben jiñi muʼ bʌ caj i chaʼ chʼojyelob pejtelel chuqui tiʼ sʌtʌyob tiʼ caj maʼañic tsiʼ cʌñʌyob jiñi i sujmlel».

Jinto jaʼel jiñi xucʼul bʌ i wiñicob Jehová tsaʼ bʌ chumleyob cheʼ bʌ maxto ajñemic Jesús ila ti Lum cabʌl chuqui mi caj i cʌñob. Wen utsʼatax cheʼ mi caj lac suben Daniel bajcheʼ tsaʼ tsʼʌctiyi jiñi profecía tac tsaʼ bʌ i tsʼijbu pero maʼañic bʌ tsiʼ chʼʌmbe i sujm (Dn. 12:8). ¿O muʼ ba a ñaʼtan bajcheʼ yilal cheʼ bʌ mi laj coltan i ñaʼtan Rut yicʼot Noemí chaʼan juntiquil i pʼolbal jiñʌch jiñi Mesías? Wen utsʼatax cheʼ mi lac chaʼlen coltaya ti ili ñuc bʌ cʌntesa, i maʼañix mi caj i ticʼlañonla yicʼot i mʌctañonla jiñi an tac bʌ ti ili jontol bʌ pañimil.

¿Bajcheʼ miʼ mejlel a pʌs chaʼan a womʌch a chaʼlen coltaya ti ili ñuc bʌ cʌntesa? Junchajp jiñʌch cheʼ maʼ chaʼlen wersa chaʼan maʼ sujtel ti ñumen wem bʌ xcʌntesa yicʼot maʼ chʌn chaʼlen subtʼan (Mat. 24:14). Mach yʌlʌyic mi mach cabʌlic chuqui miʼ mejlel a mel tiʼ caj jiñi cʼamʌjel o an chuqui yambʌ miʼ mʌctañet. Mi mucʼʌch a chaʼlen wersa, mi caj a pʌs chaʼan chajpʌbilet chaʼan maʼ cʌntesan jiñi muʼ bʌ caj i chaʼ chʼojyelob.

Jiñi cʼajtiya jiñʌch: ¿Tiʼ sujm ba a wom maʼ wʌqʼuentel jiñi Lum?, ¿tijicña ba maʼ wubin cheʼ bʌ maʼ ñaʼtan chaʼan mi caj a sujtesan ti jumpʼejl paraíso, chaʼan mi caj a coltan jiñi muʼ bʌ caj i chaʼ chʼojyelob yicʼot chaʼan mi caj a pʌsbeñob jiñi i sujmlel? Mi mucʼʌch a mel ili ora jiñi eʼtel tac lʌcʼʌ lajal bʌ bajcheʼ iliyi, mi caj a pʌs chaʼan chajpʌbiletʌch chaʼan maʼ mel cheʼ bʌ maʼ wʌqʼuentel jiñi Lum.