1 Corintios
11 Yʉ́vacari đare nʉñʉmu yópe Cristo ʉ̃i đaiye báquepedeca. Que baru đajarã mʉja yópe ji đaiyepe.
Aipe đaiye jaʉrõ Jesúre jʉ aipõevare ne cójijivaiyede jínajivʉ mearore Jʉ̃menijicʉre
2 Torojʉvʉ yʉ mʉje ãrʉé boje yʉre aru caiye ji bueiye báquede mʉjare, aru mʉje đarĩ cõmajiye boje yópe Cristoi bueiye báquepedeca ji coyʉiye báquede mʉjare. Mʉje que đaiyede me đađavʉ̃ mʉja. 3 Ʉbenita caride ʉvʉ yʉ mʉje coreóvarãjiyepe ayʉ iyede. Mʉje jʉ abedu ñai mʉjare jaboteyʉre, meamevʉ. Cristorecabe jaboteyʉ caivʉ ʉ̃mʉvare. Nomicʉrivʉ coapa jaboteivʉbu némarepacore. Aru Jʉ̃menijicʉrecabe jaboteyʉ Cristore. 4 Ʉ̃mʉ cũmañʉ maru ʉ̃i jipobʉre ʉ̃i jẽniaiyede Jʉ̃menijicʉque aru ʉ̃i coyʉcaiyede Jʉ̃menijicʉi yávaiyede apevʉ põevare máre, Cristore pueđabebi. (Põecʉ ʉ̃i jipobʉre cũmaimi ʉ̃i cʉede ʉ̃́re jaboteipõecʉi jivateinoi. Ʉbenita apecʉ ʉ̃mʉ aru nomió máre ʉ̃mʉre jaboteivʉ ãmema, quénora Cristo baju jaboteyʉbe ʉ̃mʉvare.) 5 Ʉbenita nomió cũmameco baru õi jipobʉre õi jẽniaiyede Jʉ̃menijicʉque aru õi coyʉcaiyede Jʉ̃menijicʉi yávaiyede apevʉ põevare máre, jímarepacʉre pueđabebico ʉ̃i jivateinoi cʉco cũmamecova. Õ cũmameco baru õi jipobʉre, yópe nomió jímarepacʉi jaboteimo ãmecope teđobe õ. Que baru quédeca bájebu, õi yʉvaru caiye õi pođare. 6 Nomió õi cũmaiyʉbedu õi jipobʉre õi jẽniaiyede Jʉ̃menijicʉque aru õi coyʉcaiyede ʉ̃i yávaiyede apevʉre máre, pʉeno meajebu ṍre yʉvaru õi pođare. Ʉbenita cʉyeco baru õ ʉ̃mʉjʉbepođaque cʉco baru aru caiye õi pođare yʉvarĩ jarʉvađo baru, cũmajacorĩ õi jipobʉre. 7 Ʉbenita ʉ̃mʉre cũmaiye jaʉbevʉ ʉ̃i jipobʉre ʉ̃i jẽniaiyede Jʉ̃menijicʉque aru ʉ̃i coyʉcaiyede ʉ̃i yávaiyede apevʉre máre, Jʉ̃menijicʉi cʉeđaiye báque boje ʉ̃́re ʉ̃́pe ãrojacʉre. Que baru ʉ̃mʉvarecabu cʉrivʉ, mearore jínajivʉ Jʉ̃menijicʉre. Diede jã́đovaivʉbu ne cũmameque ne jipobʉre. Ʉbenita nomivarecabu cʉrivʉ, mearore jínajivʉ némarepacʉre. Diede jã́đovaivʉbu ne cũmaiyeque ne jipobʉre.
8 Jʉ̃menijicʉ cʉeđabedejaquemavʉ ñai mamarʉmʉcacʉ bácʉ ʉ̃mʉre, ʉ̃i ãmiá Adán, ico nomió õi cũađoque. Quénora cʉeđarejaquemavʉ ico mamarʉmʉcaco báco nomióre, õi ãmiá Eva, ñai ʉ̃mʉ ʉ̃i cũađoque. 9 Aru Jʉ̃menijicʉ cʉeđabedejaquemavʉ ñai ʉ̃mʉre, ʉ̃i cađatequiyepe ayʉ ico nomióre. Quénora cʉeđarejaquemavʉ ico nomióre, õi cađatecojiyepe ayʉ ñai ʉ̃mʉre. 10 Que barureca nomióre cũmaiye jaʉvʉ õi jipobʉre, jã́đovacođo jímarepacʉi jaboteimore. Õi que đaiyede, ina ángeleva máre ṍre me jã́đama. 11 Ʉbenita maje jabocʉ Jʉ̃menijicʉi cʉeđaiye báquede ʉ̃mʉre aru nomióre máre ina pʉcarãre jaʉquiyede majidejaquemavʉ. Nomióre jaʉbi ʉ̃mʉ. Aru ʉ̃mʉre jaʉbico nomió. 12 Que baru jãvetamu ico mamarʉmʉcaco báco nomió, õi ãmiá Eva, Jʉ̃menijicʉi cʉeđaimo máco ʉ̃mʉ ʉ̃i cũađoque. Aru jãvetamu caivʉ ʉ̃mʉva máre cʉrivʉ nomió õi jʉeđocʉvae báque boje náre. Aru caivʉre, caiyede máre cʉeđarejaquemavʉ Jʉ̃menijicʉ.
13 ¿Mʉje dápiaru, meameni nomió jẽniađore Jʉ̃menijicʉque õi jipobʉre cũmamecova? Mʉjacapũravʉ coreóvaiye majidivʉbu jãve meamenore õi jẽniaru Jʉ̃menijicʉque õi jipobʉre cũmamecova. 14 Aru põeva ne đarĩ cõmajiyeque máre majidivʉbu maja. Põeva ãmeina jã́đama ʉ̃mʉ ʉ̃mʉjʉe pođa cʉcʉre. Ʉ̃mʉ ʉ̃mʉjʉe pođa cʉcʉ baru, cʉyoje tejebu ʉ̃. 15 Ʉbenita põeva me jã́đama nomió ʉ̃mʉjʉe pođa cʉcore. Nomiva põeva ne pueđaimaramu ne cʉe boje ʉ̃mʉjʉe pođa, cũmarajivʉ ne jipobʉre. 16 Apecʉ mʉjacacʉ o apeco mʉjacaco jʉ aiyʉbedu iye ji majicaiyede, quédata coyʉyʉbu yʉ diede. Ñʉja aru caivʉ apevʉ Jesúre jʉ aipõeva cójijivaivʉ apenoa ĩmaroai ye coreóvabevʉ apevʉre, mʉjare jocarĩ, ne nomivare jẽniaicõjeivʉre Jʉ̃menijicʉque o coyʉcaicõjeivʉre ʉ̃i yávaiyede máre ne jipobʉre cũmamevʉva.
Põeva ne ãmeđaino ne ãri ũcuiyede, ãrʉrajivʉ Jesucristoi yaiye báquede
17 Caride aipe đaiye jaʉrõre mʉje cójijivaiyede majicaiyʉvʉ yʉ mʉjare. Mʉje cójijiyede ãmeđađavʉ̃ mʉja. Que baru torojʉbevʉ yʉ. Mʉje cójijivaiyede mearore nʉre đabevʉbebu mʉja mʉje bajure. Quénora ãmenore nʉre đaivʉbebu mʉja mʉje bajure. 18 Mamarʉmʉre yópe apevʉ ne arĩ coyʉiyede, “Ina Corintocavʉ Jesúre jʉ aipõeva yajuboa tede đaivʉbu. Ne baju cũinátʉrʉ ãmevʉ ne ũmei ne cójijivaiyede. Apevʉ ne ʉrarõ ãiyede ne davaiyede cójijiñami, apevʉre jíbevʉva, ãivʉbu ʉrarõ, apevʉ ne ãmeneca”, jápiaivʉ yʉ mʉje borore. Jãve majʉvʉ́ iye ne coyʉiyede. 19 Mʉje yajuboa tede đaiye boje, põeva coreóvaivʉbu Jʉ̃menijicʉ ãmeina jã́ñʉre mʉjacavʉ jíbevʉre apevʉre. 20 Maje jabocʉ Jesucristo jãve ãmeina jã́ñʉme mʉje cójijivaiyede, mʉje ãri ũcurajiyepe ayʉ, ãrʉrajivʉ ʉ̃i yaiye báquede, mʉje đabe boje yópe ʉ̃i đaicõjeiye báquepedeca diede. 21 Mʉja cójijivaivʉ bácavʉ, apevʉ mʉjacavʉ ãiyede nʉvaivʉ bácavʉ coapa mʉje baju ãiyede ĩni ã́vaivʉbuya, jíbevʉva apevʉre. Aru maumena ãri bʉ́vaivʉbuya apevʉ mʉjevʉ ne earãjiye jipocai. Que baru apevʉ mʉjacavʉre ãvʉé ijivaivʉya. Ʉbenita apevʉ ʉrarõ yapivaivʉbuya pʉ ne pacoteiyeta. Mʉja cũinátʉrʉ ãmevaivʉbuya. 22 Mʉje que đaiyede pare ʉbevʉ yʉ. Ãri ũcuiye jaʉvʉ põevare ne cʉ̃ramiai. Ʉbenita mʉje cʉ̃ramiare cʉvarivʉvacari mʉja coapa, pʉeno baju ãri ũcuiyʉrivʉbuya Jesúre jʉ aipõeva ne cójijiñami. Pare ʉbevʉ yʉ mʉje ãmeina jã́iyede Jʉ̃menijicʉi põevare aru mʉje cʉyoje tede đaiyede mʉjevʉ ãiyede cʉvabevʉre. Ãmeina jã́mejara mʉja Jʉ̃menijicʉi põevare. Aru cʉyoje tede đabejarã mʉja mʉjevʉ ãiyede cʉvabevʉre. ¿Aipe arĩ coyʉji mʉjare? Ye majibevʉ yʉ aipe arĩ coyʉcʉyʉre mʉjare. Jãve torojʉbevʉ yʉ mʉje que đaiyede. “Me đaivʉbu mʉja”, jãve ye abecʉyʉmu yʉ mʉjare.
Jesúre jʉ aipõeva ne ãri ũcuino, ãrʉrajivʉ ʉ̃i yaiye báquede
(Mt 26.26-29; Mr 14.22-25; Lc 22.14-20)
23 Iye maje ãri ũcuiyede, ãrʉrajivʉ Jesucristoi yaiye báquede, Jesucristovacari coreóvare đarejame yʉre. Aru yópe ʉ̃i coreóvare đaiye báquepedeca coreóvare đacacʉ mʉjare. Ãniñami mácarõmiareca, Judas bácʉi jẽni jíye baquiyé jipocai maje jabocʉ Jesúre ʉ̃i mauvare, pã́ure ĩnejameđa Jesús. 24 Jʉ̃menijicʉre torojʉede jíniburu yóboi, pã́ure cotʉvarejameđa. Aru arejameđa ʉ̃i bueimarare: “Dápiajarã iye pã́ure yópe mʉje dápiaiyepe ji bajure. Jíquijivʉ yʉ ji bajure, ne boarĩ́ jarʉvarãjiyepe yʉre, mʉjare ji meađaquiye boje. Que baru mʉje ãiyede iye pã́ure, ãrʉjara yʉre”, arejameđa náre Jesús. 25 Aru nopedeca ũcuidore ĩni ne ãri bubarĩburu yóboi, Jesús arejameđa: “Dápiajarã iye ũcuiyede yópe mʉje dápiaiyepe ji jivede. Jíquijivʉ yʉ ji jivede, ne boarĩ́ jarʉvarãjiyepe yʉre, mʉjare ji meađaquiye boje. Que baru yʉre mequiyebu ji jive obedivʉre boje. Jʉ̃menijicʉ ‘Yópe đajarã mʉja, boropatebenajivʉ ji jã́inoi’, ʉ̃i yóbocarõ coyʉino mácarõre põevare ãrʉrajaramu. Cainʉmʉa mʉje ũcuiyede diede, ãrʉjara yʉre”, arejameđa Jesús. 26 Cainʉmʉa yópe mʉje pã́ure ãiyepe aru mʉje ũcuidoquede ũcuiyepe máre, pʉ maje jabocʉ Jesucristoi copaidaiyeta, põevare jã́đovaivʉbu Cristoi yaiye báquede náre boje, meađacʉyʉ náre.
Aipe đaiye jaʉrõ Jesúre jʉ aipõevare ne ãri ũcuiyede, ãrʉrajivʉ ʉ̃i yaiye báquede
27 Ácʉ põecʉ pueđabecʉ ãñʉ maru iye pã́uquede, iye ãrʉre đaiye maje jabocʉ Cristoi bajure, o ũcuñʉ maru iye ũcuidoquede, iye ãrʉre đaiye maje jabocʉ Cristoi jivede, boropatecʉyʉme ʉ̃i pueđabe boje Cristoi bajure aru ʉ̃i jivede máre. 28 Nópe vaibéquiyepe aivʉ, caivʉ coapa me dápiarĩ corevajarãri caiye ne đaiyede, ne dápiaiyede máre, “¿Ãmeina teyʉba yʉ?” jẽniari jã́rajivʉ ne baju. Aru ãmeina teivʉ baru, chĩori coyʉjarãri ne ãmeina teiyede Jʉ̃menijicʉre, ʉ̃i ãrʉmeteni jarʉvaquiyepe ayʉ diede, ne ãri ũcurajiye jipocai. 29 Ácʉ põecʉ ʉ̃i ãru iye pã́uquede aru ʉ̃i ũcuru iye ũcuidoquede máre, dápiabecʉva maje jabocʉ Cristo baju ñájini yaiyʉ́ bácʉre, jãve Jʉ̃menijicʉ ñájine đacʉyʉme ʉ̃́re, ʉ̃i que đaiye boje. 30 Que baru obedivʉ mʉjacavʉbu parʉbevʉ aru ijimara máre. Aru apevʉ yaiyáma. 31 Maja me dápiarĩ corevaru maje baju đaiyede aru maje baju dápiaiyede máre, maje jabocʉ Jʉ̃menijicʉ ñájine đabejebu majare. 32 Ʉbenita maje jabocʉ Jʉ̃menijicʉ ñájine đayʉbe majare, majicacʉyʉ majare, maje bíjabenajiyepe ayʉ ʉ̃́re jocarĩ ijãravʉcavʉ ʉ̃́re coreóvabevʉque.
33 Que baru, mʉja, jívʉ, mʉje cójijivaiyede ãri ũcurajivʉ yópe maje jabocʉ Jesucristoi ãrʉre đaicõjeiyepe mʉjare, corejarã caivʉ mʉjevʉre, ne earãjiyepe aivʉ. Que teni ãri ũcujara caivʉ mʉja cũinátʉrʉ. 34 Ácʉ põecʉ mʉjacacʉ ãvʉé yaiyʉ́ baru, ãjacʉrĩ ʉ̃i cʉ̃rami jívʉi, Jʉ̃menijicʉi ñájine đabequiyepe ayʉ mʉjare, mʉje ãmeđaiye boje mʉje cójijivaiyede. Apede mʉje jẽniari jã́iye báquede yʉre, majicacʉyʉmu mʉjare aipe đaiye jaʉrõre ji eaquiyede mʉje yebai.