Juan

19 Dinʉmʉre ina judíova ne que aiyede, churaravare jara popeicõjenejameđa Pilato Jesúre. 2 Aru ʉ̃́re pʉenocacaje, jabocʉ doicajepe paicaje ñemijuaricajede doarejaimađa na. Jesúre que teivʉ, miumua cãteni, cainitarabʉre đarĩ, ʉ̃i jipobʉrã ditarabʉre tʉorejaimađa ina churarava. 3 Que đarĩ Jesúre jacoyʉrejaimađa:

—Ména cʉjacʉ mʉ, judíovai jabocʉ, arejaimađa churarava, ʉ̃́re yʉrivʉ.

Que teivʉ, ʉ̃́re pẽvavarejaimađa ʉ̃i jivai ne pʉrʉáque.

4 Jesúre ne yʉriniburu yóboi, jedevai etarejame Pilato cojedeca.

—Jã́jara. Jaetovaivʉ yʉ ʉ̃́re, mʉje coreóvarãjiyepe ayʉ: Ãmeina tebecʉ bajube ʉ̃ ji jã́ru, arejame.

5 Pilato ʉ̃i que arĩburuta, etarĩ darejame Jesús. Jabocʉi doicajepe paicaje ñemijuaricajeque ne doaimʉ mácʉ, ne jipobʉrã miumua cãteni jacoimʉ mácʉ etarĩ darejame.

—Jede, ʉ̃́re jã́jara caride, arejame Pilato.

6 Cũiná Jesúre ne jã́iyede, cođoboborejaima ina sacerdotevare jaboteipõeva aru Jʉ̃menijicʉi cʉ̃ramine coreipõeva máre:

—Ʉ̃́re jocʉcʉjaravena pẽvari boarĩ́ jarʉvaicõjejacʉ mʉ, arĩ cođoboborejaima.

Pilato arejame:

—Mʉje baju ʉ̃́re nʉvari, jocʉcʉjaravena pẽvari boarĩ́ jarʉvajarã. Yʉre ji jã́ru ãmeina tebecʉtame, arejame.

7 Arejaima Pilatore:

—“Yʉ Jʉ̃menijicʉi mácʉbu yʉ”, ávaibi Jesús. Que baru yópe cũináro ñʉjare đaicõjeinope ñaipe páyʉre boarĩ́ jarʉvaiye jaʉvʉ ñʉjare, arejaima.

8 Ne que aiyede jápiayʉ, pʉeno baju cuecumarejaquemavʉ Pilato. 9 Diñami ecorĩ cojedeca, Jesúre jẽniari jã́rejameđa:

—¿Ã́rocacʉrʉ̃ mʉ? arĩdurejameđa Jesúre Pilato.

Ʉbenita Jesúcapũravʉ bi arejameđa.

10 Dinʉmʉma Pilato arejameđa ʉ̃́re:

—¿Yʉre coyʉiyʉbecʉrʉ̃ mʉ? ¿Ji jaboede majibecʉrʉ̃ mʉ? Mʉre jocʉcʉjaravena pẽvaicõjeiyʉcʉ baru, jocʉcʉjaravena mʉre pẽvaicõjecʉyʉmu yʉ. O mʉre jaetovaiyʉcʉ baru, mʉre jaetovacʉyʉmu yʉ. ¿Majicʉrʉ̃ mʉ diede? arejameđa.

11 Jesús arejameđa ʉ̃́re:

—Jʉ̃menijicʉ mʉre jaboteicõjeimi ʉ̃. Ʉ̃i que đabedu, yʉre yópe đabejebu mʉ. Que baru ñai yʉre jẽne đayʉ bácʉ mʉre mi pʉeno boropateibi, ʉ̃i ãmeina teiye boje, arejameđa.

12 Jesús ʉ̃i nópe coyʉiyede, pʉeno baju ʉ̃́re jaetovaiyʉrĩdurejameđa Pilato. Ʉbenita yópe arĩ, cođoboborejaima ina judíova:

—Jesúre jaetovayʉ baru, ñai jabocʉ ijãravʉcacʉ pʉeno baju parʉcʉ, César maje aimʉ, ʉ̃i yóvaimʉ ãmejebu mʉ. Ácʉ põecʉ “Jabocʉbu yʉ” ayʉ, ñai jabocʉ ijãravʉcacʉ pʉeno baju parʉcʉre, César maje aimʉre, maucʉvaibi ʉ̃, arejaima ina judíova Pilatore.

13 Que aivʉre jápiarĩ, ʉ̃i dobariborã dobacʉnʉrejame Pilato. Noi dobacʉ, Jesúre davaicõjenejame, boarĩ́ jarʉvaicõjecʉyʉ ʉ̃́re. Pilato ʉ̃i dobaribo cʉriva, cʉ̃raboaque ne tʉoiva, ne meađaiva ñʉja judíova ñʉje yávaicamuai Gabata ãmicʉrejavʉ̃. 14 Pascua ãmicʉrijãravʉ baquinó jipocacajãravʉ barejávʉ̃, jãravʉ corica baji. Ina obedivʉ judíovare, Jesúre ʉbevʉre, yávarĩ darorejame Pilato:

—Jede, jã́jara caride mʉje jabocʉre, arejame.

15 Ina judíovacapũravʉ ʉrarõ cođoboborejaima:

—¡Yaijácʉrĩ! ¡Yaijácʉrĩ! ¡Jocʉcʉjaravena pẽvari boarĩ́ jarʉvaicõjejacʉ ʉ̃́re! arejaima na.

Pilato arejame:

—¿Mʉje jabocʉre boarĩ́ jarʉvaji yʉ, mʉje dápiaru? arejame.

Ina sacerdotevare jaboteipõeva arejaima:

—Cũinácʉrabe ñʉje jabocʉ, ñai jabocʉ ijãravʉcacʉ pʉeno baju parʉcʉ, César maje aimʉ, arejaima.

16 Que baru ne ʉrõpe đarĩ, jocʉcʉjaravena Jesúre pẽvari, boarĩ́ jarʉvaicõjenejame Pilato.

Jesúre ne pẽvari yuyaino jocʉcʉjaravena

(Mt 27.32-44; Mr 15.21-32; Lc 23.26-43)

Que baru Jesúre ĩni, ne pẽvarajinoi nʉvarejaima churarava.

17 Jesúvacari turĩ nʉrejame dijaravede Põe jipobʉcũ ñʉje aicũ cʉ̃racũita, Gólgota ãmicʉricũ ñʉje yávaicamuaque. 18 Dicũre eaivʉ, jocʉcʉjaravena pẽvari jẽorejaima na. Ʉ̃́que apejaravearã apevʉ pʉcarãre máre pẽvari jẽorejaima, cũinácʉre Jesúi meapũravʉi, aru apecʉre Jesúi cãcopũravʉi, aru Jesúre ne coricai. 19 Yópe arĩ, “Jesús Nazarecacʉbe judíovai jabocʉ”, toivaicõjenejameđa Pilato jocʉvena, ne jẽorajiyepe ayʉ divede Jesúi jocʉcʉjaravena. 20 Jerusalén ãmicʉriĩmaro joabejĩnoi Jesúre jocʉcʉjaravena jẽorejaima. Que baru obedivʉ põeva nore jã́radaivʉ no toivaino mácarõre jã́ri borotedejaima. Yóbecʉricamua yávaicamuaque toivaicõjenejaquemavʉ Pilato. Ñʉje yávaicamuaque, Romacavʉ ne yávaicamuaque, aru griegova ne yávaicamuaque máre toivaicõjenejaquemavʉ Pilato. Que baru caivʉ divede jã́ri majidejacarã ñʉja. 21 Pilato ʉ̃i nópe toivaicõjeiyede ʉbeni, sacerdotevare jaboteipõeva coyʉrãnʉrejaimađa ʉ̃́re:

—Nópe mi toivaicõjeino mácarõpe toivaicõjemejacʉ mʉ. Quénora “ ‘Judíovai jabocʉbu yʉ’, abi ʉ̃”, arĩ toivarĩ jẽojacʉ mʉ cojedeca, arĩdurejaimađa Pilatore sacerdotevacavʉ.

22 Ʉbenita Pilato arejameđa náre:

—Ji toivaicõjeino mácarõ nópeda bajarṍri no. Oatʉvabecʉbu yʉ, arejameđa.

23 Jesúre jocʉcʉjaravena pẽvari jẽori bubarĩburu yóboi, ʉ̃i doiye báquede coapa ĩnejaima ʉ̃́re pẽvaivʉ bácavʉ. Yóvaicʉvaivʉ barejáima na. Que baru náre coapa ĩnejaima. Ʉbenita dicaje pʉenocacaje nareimea cʉbecajede coapavaiyʉbedejaima na.

24 Cũinácʉ nácacʉ arejame:

—Dicaje nareimea cʉbecajede jađevarĩ, coapa ĩnu, meamejebu. Yópe đarãjarevʉ. Dʉvarĩ yajuivʉpe tenajarevʉ maja. Ácʉ majacacʉ majare yajurĩ vainí tʉyʉ, dicajede ĩcʉyʉme ʉ̃, arejame.

Na “jede” arĩ, nópe yajurejaima na. Ne nópe coapavaiye vaidéjavʉ̃ yópe Jʉ̃menijicʉi toivaicõjeiye báquepedeca ʉ̃i yávaiyede: “Ji doiye báquede ĩni, coapavarãjarama na. Aru dʉvarĩ yajurĩ vainí tʉyʉ apecajede, ji pʉenocacajede ĩcʉyʉme nácacʉ”, arĩ toivaicõjenejaquemavʉ Jʉ̃menijicʉ. Quédeca tedejaima ina Jesúre jocʉcʉjaravena pẽvaivʉ bácavʉ.

25 Jesús ʉ̃i jocʉcʉjarave joabejĩnoi núrejaima jípaco, jípacoi mamico Cleofai márepaco María ãmicʉco, aru María Magdalacaco máre. 26 Jípaco nore núcore aru nijinoi yʉre máre, pare ʉ̃i jecʉmʉre, jã́rejame ʉ̃. Aru yópe arĩ, yávarejame jípacore:

—Jã́jaco. Mímacʉreca páyʉbe ʉ̃, arejame jípacore Jesús.

27 Yʉre máre yópe arejame Jesús:

—Jã́jacʉ. Mipacoreca páđobe õ, arejame yʉre.

Que teni ji cʉ̃ramine ṍre nʉvari epeni, cʉvarejacacʉ yʉ ṍre jipacope.

Jesús ʉ̃i yaino

(Mt 27.45-56; Mr 15.33-41; Lc 23.44-49)

28 No yóboi, caiye iye Jʉ̃menijicʉi đaicõjevarede đarĩ bubayʉ bácʉ coreóvarejaquemavʉ Jesús. Que baru yópe Jʉ̃menijicʉi yávaiyede ʉ̃i toivaicõjeiye báquepedeca vaiquíyepe ayʉ, yópe arejame Jesús:

—Cũiñóivʉ yʉre, arejame Jesús.

29 Nore jorobʉ, vino ʉ́yaicoro upiáricoroque jorobʉ cʉrejavʉ̃. Diede jaʉborã ʉyovarĩ hisopo ãmicʉricʉ jocʉjĩcʉ cavajĩbʉi jẽori jarʉrʉrejame cũinácʉ ina churaravacacʉ. Jesúre ʉ̃i jijecamura jĩjovarejame ʉ̃. 30 Die upiáteiye báquede neneniburu yóboi, yópe arejame Jesús:

—Quénoramu, arejame Jesús.

Que arĩ, ʉ̃i jipobʉ mori tʉrĩ, yuyurĩ, yaidéjame.

Jesús bácʉre churara ʉ̃i totarĩ cõajaroino

(1 Co 5.7; Ap 1.7)

31 Dijãravʉ torojʉve teijãravʉ baquinóre meađaijãravʉ barejávʉ̃. Sábado, Pascua ãmicʉrijãravʉ, judíovai pʉeno meajãravʉ, pueđaijãravʉ baquinó jipocacajãravʉ barejávʉ̃. Que baru dijãravʉ baquinóre ne pẽvaimara mácavʉ jocʉcʉjaravearã ne mautebenajiyepe aivʉ, Pilatore coyʉrãnʉrejaimađa ñʉja judíova ñʉje jabovacavʉ. Ʉ̃́re jẽniarejaimađa, ʉ̃i boarĩ́ pʉyoicõjequiyepe aivʉ ina jocʉcʉjaravearã jẽivʉ ne ãrađoare, ne yainájiyepe aivʉ maumena, jõđavari ĩnajivʉ ne bajuá báquede torojʉve teijãravʉ baquinó jipocai. 32 Que baru Pilato ʉ̃i cõjeniburu yóboi, ina jocʉcʉjaravearã yuyuivʉre ne ãrađoare boarĩ́, pʉyorãnʉrejaima churaravacavʉ. Mamarʉmʉcacʉre earĩ, ʉ̃i ãrađoare boarĩ́ pʉyorĩ, apecʉre máre quédeca boarĩ́ pʉyorejaima ina churarava, Jesúque jocʉcʉjaravearã pẽvaimara mácavʉre boaivʉ. 33 Ʉbenita Jesús yebai eaivʉ, jave yaiyʉ́ bácʉre jã́rejaima. Que baru yaiyʉ́ bácʉre jã́ri, ʉ̃i ãrađoare boarĩ́ pʉyobedejaima.

34 Ʉbenita quédeca cũinácʉ churaravacacʉ Jesúi tẽ́penaba cãchinoi ʉ̃i tãutedorʉque totarĩ cõajarorejame ʉ̃. Jive ocoque jĩvaiye etarejavʉ̃ dicobede, ʉ̃i totarĩ cõajaroiyede. 35 Yʉ́vacari jã́rejacacʉ. Que barureca ji jã́iye báquede toivarĩ epeyʉbu yʉ, mʉje jʉ arãjiyepe ayʉ Jesúre. Ji majié jãve bajure coyʉyʉbu yʉ.

36 Que vaidéjavʉ̃. Yópe Jʉ̃menijicʉi yávaiyede ʉ̃i toivaicõjeiye báquepedeca vaino marejávʉ̃: “Ʉ̃i cũađoare ye cũináđo pʉyobenajarama na”, arĩ toivaicõjenejaquemavʉ Jʉ̃menijicʉ. 37 Aru apeno Jʉ̃menijicʉi toivaicõjeino mácarõ aiyepedeca vaidéjavʉ̃: “Ne totaimʉ mácʉre jã́rajarama põeva”, arĩ toivaicõjenejaquemavʉ Jʉ̃menijicʉ.

Jesús bácʉ jarʉvaimʉ ne põe jarʉvainoi

(Mt 27.57-61; Mr 15.42-47; Lc 23.50-56; Jn 3.1-2)

38 Jesús ʉ̃i yainíburu yóboi, ʉ̃ mácʉi baju bácarõre meađaiyʉcʉ, Pilatore jẽniacʉnʉrejameđa José Arimateacacʉ. Jesús bácʉ ʉ̃i bueimʉ mácʉ barĩdurejame. Ʉbenita sacerdotevare pare jidʉrejameđa. Que baru “Jesúcacʉbu yʉ”, arĩ coyʉbedejameđa José. Pilato Joséde jʉ arejameđa. Que baru Jesús bácʉi baju bácarõre ĩni, nʉvarejaimađa Joséjã. 39 Joséde cađatecʉnʉrejameđa Nicodemo, ñai mamarʉmʉre ñami Jesús bácʉre borotecʉnʉñʉ mácʉ. Jesús bácʉi baju bácarõre meađacʉyʉ, Nicodemo me mumijʉripenaque jĩvaiyede nʉvarejameđa. Jocʉcʉ cuidó mirra ãmicʉricʉ yoca aru vecʉijichĩabo jẽicũcoro máre, treinta paikilos ĩni nʉvarejameđa.

40 Jesús bácʉi baju bácarõre ĩni, nʉvari, meađarejaimađa na. Meacaje lino ãmicʉricajeque aru iye mumijʉeque ʉ̃ mácʉi baju bácarõre cũmarejaimađa. Ñʉja judíova ñʉje đarĩ cõmajiyepe yaiyʉ́ bácʉre ñʉje jarʉvarãjiye jipocai meađarejaimađa Joséjã. 41 Jesús bácʉre ne pẽvari jẽoino mácarõ joabejĩno oteiye cʉrõi ʉ̃ mácʉre nʉvarejaimađa. Nore põe jarʉvaicobe mamacobe cʉrejavʉ̃. Cʉ̃racobei Jesús bácʉre nʉvarejaimađa. Põeva ne yaivʉ bácavʉ ne ĩmamecobe barejávʉ̃ dicobe. Nore Jesús bácʉre jarʉvarãnʉrejaimađa Joséjã. 42 Jabʉóvaijãravʉ baquinó jipojĩca barejávʉ̃ no. Aru dicobe joabejĩnoi marejávʉ̃. Que baru maumepeda Jesús bácʉi baju bácarõre meađarĩ, nore jarʉvarãnʉrejaimađa.