1 Corintios

Aipe đaiye jaʉrõre Jesúre jʉ aipõeva cũinácʉ nácacʉ ʉ̃i ãmeina đaiye boje nomióque

5 Jápiaicacʉ yʉ, “Ãmeno baju đaibiya cũinácʉ Jesúre jʉ aipõecʉ Corintocacʉ”, põeva ne coyʉvarede yʉre. “Cʉbiya jípacʉi márepaco bajuque”, ávaivʉbuya. Pʉeno baju ãmenotamu no. Que baru ina Jʉ̃menijicʉre jʉ abevʉvacari pare ʉbema põeva ne đaiyede yópe ʉ̃i đaiyepe. 2 Cũinácʉ mʉjacacʉ nópe ãmeina đayʉvacari, mʉjacapũravʉ “¿Meara márica ñʉja, me cʉrivʉ Jʉ̃menijicʉque?” ʉbenina arĩ dápiavaivʉbuya. Ʉbenita chĩoiye baju jaʉteavʉ̃ mʉjare, ʉ̃i ãmeina đaiye boje. Mʉja chĩoivʉ baru, ñai nópe pʉeno ãmeina đayʉre jaetovajebu mʉja mʉje cójijinore jocarĩ. 3 Yʉ́capũravʉ cʉbevʉ mʉjaque caride. Ʉbenita dápiaivʉ yʉ ji ũmei yópe cʉ́jʉrocʉpe mʉjaque. Aru jave coreóvaivʉ yʉ ji ũmei aipe đaiye jaʉrõre mʉjare. 4 Mʉja Jesúre jʉ aipõeva mʉje cójijiyede, mʉje majié boje ji dápiainore, yʉ yópe cʉ́jʉrocʉpe cʉquijivʉ mʉjaque. Aru mʉje cójijiyede, maje jabocʉ Jesucristoi parʉé máre cʉquiyebu mʉjaque. 5 Dinʉmʉre mʉjare jícõjecʉyʉmu ñai ʉ̃mʉre abujuvai jabocʉ Satanáre. Que teni, ʉ̃́re coatede đarĩ apevʉ Jesúre jʉ aipõevare jarʉvarĩ, ʉ̃́re dajocarĩ, Satanás ʉ̃i đaquiyepe ayʉ ʉ̃́que yópe ʉ̃i ʉrõpe, coreóvarĩ bʉojacʉyʉme ʉ̃ ʉ̃i ãmeina teiyede. Que teni chĩori ʉ̃i ãmeina teiyede, dajocarĩ ʉ̃i đaiyede yópe ʉ̃i baju ãmeina đaiyʉepe, meađaimʉ macʉyʉ́me maje jabocʉ Jesucristoi copaidaquiyede.

6 “¿Meara márica ñʉja?” arĩ dápiaiye jaʉbevʉ mʉjare. Yópe põeva ne arĩ cõmajiyepe, “Quĩ́jie pã́ure bʉcʉre đaiyeque caino jĩvaibo bʉcʉóvaino mávʉ”. ¿Diede coreóvabenarʉ mʉja? Nopedeca cũinácʉ ʉ̃i ãmeina đaru, apevʉ máre ʉ̃́que cójijivʉ ãmeina đarãjarama ʉ̃́pe. 7 Que baru, “Apevʉ majacavʉ ʉ̃i ãmeina đaiyede jã́ri, ʉ̃pedeca đaiyʉrãjichʉma” arĩ, jaetovajarã ʉ̃́re mʉje cójijinore jocarĩ. Yópe judíovai Pascua torojʉve tenajiye jipocai, ne jarʉvaiyepe caiye iye pã́ure bʉcʉre đaiye javequede, nopedeca jarʉvajarã ʉ̃́re mʉjare jocarĩ. Yópe judíovai ãiyepe pã́ure bʉcʉre đaiye cʉbeque Pascua torojʉve teijãravʉare, ovejajĩcʉre boarĩ́buru yóboi, nopedeca cʉre nʉjara mʉja meara matʉiye, yópe mʉje cʉepe caride, ãmeina đayʉ cʉbecʉva mʉje jẽneboi, Cristoi jave yaiye báque boje. Yópe ne ovejajĩcʉre boaiyepe ne ãmeina teiye boje, Jʉ̃menijicʉi ñájine đabequiyepe aivʉ náre, ne ãmeina teiye boje, nopedeca Cristore boarĩ́ jarʉvarejaquemavʉ maje ovejajĩcʉpe páyʉre, maje ãmeina teiye boje, Jʉ̃menijicʉi ñájine đabequiyepe aivʉ majare, maje ãmeina teiye boje. 8 Que baru maja Jesúre jʉ aipõevare caiye maje đaiye jaʉvʉ ye ãmeina đabeni, apevʉre máre đare đaiyʉbevʉva aru ye ãmeina dápiabeni apevʉre, náre ãmenore đaiyʉbevʉva máre. Quénora ãmeno cʉbevʉva aru mearore dápiarĩ, đarĩ cõmajini yópe maje dápiaiyepe đaiye jaʉvʉ majare.

9 Jipocare ji toivaicõjeiye báquede apecʉre paperayocare, mʉjare yóvaicõjemetecacʉ ina ãmeina đaivʉre apevʉque némarebʉcʉva ãmevʉque. 10 Ji nópe toivaicõjeiyede ʉ̃́re, coyʉbetecacʉ mʉje đaiyede ina Jesúre jʉ abevʉque. Obedivʉ põeva ijãravʉcavʉ Jesúre jʉ abevʉ ãmeina đaivʉbu apevʉque némarebʉcʉva ãmevʉque. Aru ãujini, apevʉre jʉjovarĩ ĩ́vʉbu ne cʉvaede. Aru ñavacʉrivʉbu. Aru pẽpeimarare mearore jívʉbu máre. Mʉje náre yóvabenajiyepe aivʉ, etaiye jaʉjebu mʉjare ijãravʉre jocarĩ. Mʉje Jesúre jʉ abevʉque đabedu, ye cʉbequiyebu mʉje cʉ́jʉrorõre. 11 Quénora ji toivaicõjeiye báqueque apecʉre yópe aiyʉtecacʉ yʉ. Ácʉ põecʉ majacacʉ ʉ̃i aiye boje “Jesúre jʉ ayʉbu yʉ”, ʉbenita ʉ̃i ãmeina đarĩ cõmajidu, yóvabejarã ʉ̃́re. Ácʉ põecʉ ãmeina đayʉ apecoque jímarepaco ãmecoque, aru ãujiñʉ jʉjovarĩ ĩñʉ apevʉ ne cʉvaede, aru pẽpeimarare mearore jíyʉ máre, Jesúre jʉ arĩduru, yóvabejarã ʉ̃́re. Ácʉ põecʉ borocʉrĩ ãmenore coyʉyʉ apevʉre, aru pacoteyʉ, aru ñavacʉcʉ máre, Jesúre jʉ arĩduru, yóvabejarã ʉ̃́re. Põecʉ ʉ̃́pe páyʉque ye ãmejara ãiyede. 12 5:12-13 Ina Jesúre jʉ abevʉ ne đaiyede jã́ri, corevarĩ coyʉbevʉ yʉ mearore o ãmenore. Jʉ̃menijicʉrecabe coyʉcʉyʉ náre ne đaiyede mearore o ãmenore. Ʉbenita mʉjacapũravʉre jã́ri, corevarĩ coyʉiye jaʉvʉ ina Jesúre jʉ aivʉ ne đaiyede mearore o ãmenore. Que baru jaetovajarã ñai ãmeina đayʉre mʉje cójijinore jocarĩ. 13 —