Mateo
Jesús ʉ̃i baju oatʉvaino
(Mt 3.17, 11.14, 12.18; Mr 1.11, 9.2-13; Lc 3.22, 9.28-36; 2 P 1.17-18)
17 Seis paijãravʉa yóboi, Jesús nʉvarejameđa Pedrore, aru Santiagore, ĩmacʉ Jũare máre. Jipocatedejameđa náre cʉ̃racũ ʉ̃mʉjʉricũ pʉenoi, apevʉre jocarĩ. 2 Aru na jã́rejaimađa ʉ̃i oatʉvaiye me bajure. Ʉ̃i jiva pẽorejavʉ̃ya, yópe aviá ʉ̃i pẽoiyepe. Ʉ̃i cuitótecaje máre pẽorejavʉ̃ya, pare boricaje yópe miađárope. 3 Aru járorejaimađa Elías Moisémaque. Núrejaimađa boroteivʉ Jesúque. 4 Aru Pedro arejameđa Jesúre:
—Mʉ, ji jabocʉ, mearotamu ñʉje cʉru yui. Mi ʉru, đacaquijivʉ yʉ yóbecʉriñamia cʉ̃ramia quĩ́jiñamia maquiyéde. Cũináđami míñami maquinóre, aru apeđãmi maquinóre Moiséde, aru apeđãmi maquinóre Elíare đacaquijivʉ yʉ, arejameđa Pedro.
5 Ʉ̃i coyʉiyedeca, ocopenibo miađáripenibo ẽmeni, taorejavʉ̃ya náre. Aru jápiarejaimađa apeno yávainore, ocopeniboi etaiyede: “Ñaime jímacʉ, ji ʉmʉ. Me torojʉvʉ yʉ ʉ̃́re. Que baru jápiajarã ʉ̃i coyʉiyede”, arejaquemavʉ Jʉ̃menijicʉ.
6 Ina yóbecʉrã Jesúi bueimara ne jápiaiyede diede, jidʉrĩ, mori tʉrejaimađa joborõi. 7 Ʉbenita Jesús ne yebai nʉri, náre tʉorĩ, arejameđa:
—Nacajajara mʉja. Jidʉbejarã, arejameđa Jesús.
8 Ne jã́iyede, jã́rejaimađa Jesúre cũinácʉra. 9 Aru ẽmeni daiyede dicũ cʉ̃racũre jocarĩ, Jesús apevʉre coyʉicõjemenejameđa náre ne jã́ino mácarõre. Yópe arejameđa:
—Me jápiajarã mʉja. Coyʉbejarã apevʉre no mʉje jã́ino mácarõre cʉ̃racũ ʉ̃mʉjʉricũ pʉenoi pʉ ji nacajariburu yóboita yainore jarʉvarĩ. Yʉ́bu Jʉ̃menijicʉi daroimʉ mácʉ ʉ̃mʉpe, arejameđa náre Jesús.
10 Aru ina ʉ̃i bueimara, coreóvaivʉ ʉ̃́re Jʉ̃menijicʉi daroimʉ mácʉre, ʉ̃́re jẽniari jã́rejaimađa:
—¿Aipe teni aivʉba ina Jʉ̃menijicʉi yávaiye báquede bueipõeva, “Mamarʉmʉ Elías dacʉyʉme, ñai Jʉ̃menijicʉi daroimʉ ʉ̃i daquiye jipocai”? arejaimađa na.
11 Aru Jesús arejameđa náre:
—Jãve Elíarecabe meađacʉdacʉyʉ caiyede, Jʉ̃menijicʉi daroimʉ ʉ̃i daquiye jipocai. 12 Jave dáme Elías, ayʉbu yʉ mʉjare. Ʉbenita põeva ʉ̃́re coreóvabeteima na. Quénora ne ʉrõpe đaima ʉ̃́re. Quédecabu yʉre, Jʉ̃menijicʉi daroimʉ mácʉre ʉ̃mʉpe. Yʉre máre põeva ñájine đarãjarama, arejameđa Jesús.
13 Dinʉmʉre ina ʉ̃i bueimara coreóvarejaimađa ʉ̃i coyʉiyede náre Juan Bautista bácʉre.
Jesús ʉ̃i meađaino jʉeđocʉre, abujucʉ ʉ̃i ĩmamʉre
(Mt 21.21; Mr 9.14-29, 11.23; Lc 9.37-43; 1 Co 13.2)
14 Jesújã ne eaiyede obedivʉ põeva yebai, cũinácʉ ʉ̃mʉ nʉrejame Jesús yebai. Ñʉatutarĩ ʉ̃i jipocai, pueđacʉyʉ ʉ̃́re, arejame:
15 —Mʉ, ji jabocʉ, cõmaje ãroje jã́jacʉ jímacʉre. Bidini, aru aburi etarĩ ʉ̃i jijecamure, pare ñájimi ʉ̃. Apenʉmʉa tʉibi toaboi. Aru apenʉmʉa jiai tʉrĩ coibi ʉ̃. 16 Ʉ̃́re davavʉ yʉ mi bueimara yebai, ʉbenita meađaiye majibetema na, arejame Jesúre.
17 Jesús arejame:
—Mʉja, ijãravʉcavʉ, Jʉ̃menijicʉre jʉ abevʉ aru ãmeina teivʉ máre, ¿aipijãravʉa cʉquidi yʉ mʉjaque? ¿Aru aipijãravʉa ñájiquidi yʉ mʉjaque, mʉje jʉ arãjiyepe ayʉ ji coyʉiyede? Davajacʉ mímacʉre ji yebai, arejame Jesús.
18 Que teni Jesús ñai abujucʉre jararĩ, jaetovarejame jʉeđocʉre jocarĩ. Aru maumejiena meatedejame ʉ̃.
19 Que đarĩburu yóboi, ñʉja ʉ̃i bueimara jẽniari jã́re nʉrejacarã Jesúre cũinácʉra, yópe arĩ:
—¿Aipe teni ñʉja jaetovarĩ majibetedi ñai abujucʉre? arejacarã ñʉja.
20 Aru Jesús arejame ñʉjare:
—Quĩ́jino mʉje jʉ aiye boje yʉre, que baru jaetovarĩ majibetevʉ mʉja. Jãve coyʉyʉbu mʉjare: Oteiyabe mostaza ãmicʉriyabe quĩ́jiyabetamu. Ʉbenita pĩaríburu yóboi, jocʉcʉ ʉracʉtamu. Nopedeca mʉje jʉ aru yʉre quĩ́jino, nópe quĩ́jiyabe oteiyabepe, Jʉ̃menijicʉ ʉrarõ mearore đajebu mʉjare. Mʉja me jʉ aivʉ Jʉ̃menijicʉre mʉje cõjenu icũ cʉ̃racũ ʉracũre yópe: “Nʉjacũ yore jocarĩ pʉ ãnoita”, dicũ jʉ ajebu mʉje cõjeiyede. Jãve jʉ aivʉ baru yʉre, caiye đaiyede majinajaramu mʉja. 21 Jʉ̃menijicʉre jẽniaiye jaʉvʉ ãmevʉva ãiyede, abujucʉ ñaipe páyʉre mʉje jaetovarãjiyepe aivʉ, arejame ñʉjare Jesús.
Jesús ʉ̃i coyʉino cojedeca ʉ̃i yaiquínore
22 17:22-23 Ñʉje cójijiyedeca Galilea ãmicʉrijoborõi, Jesús, yópe arĩ, buedejame ñʉjare:
—Yʉre, Jʉ̃menijicʉi daroimʉ mácʉre ʉ̃mʉpe, jẽni jínajivʉbu ji mauvare, ne boarĩ́ jarʉvarãjiyepe ayʉ yʉre. Aru yóbecʉrijãravʉa yóboi, Jʉ̃menijicʉ nacovacʉyʉme yʉre yainore jarʉvarĩ, arejame Jesús.
Ʉ̃i nópe aiyede, pare cãrijivʉ barejacárã ñʉja. 23 —
Jʉ̃menijicʉi cʉ̃ramine coreivʉ ne põevare jícaicõjeino tãutʉrare
24 Ñʉje copaidaiyede Capernaum ãmicʉriĩmaroi, Pedro yebai darejaimađa ina Jʉ̃menijicʉi cʉ̃ramine tãutʉra ĩcaipõeva. Ʉ̃́re jẽniari jã́rejaimađa, yópe arĩ:
—¿Jíbedi ñai mi bueipõecʉ tãutʉratʉravare, Jʉ̃menijicʉi cʉ̃ramine meađaiye boje? arejaimađa. 25 Aru Pedro jʉ arejameđa náre:
—Jʉ̃́jʉ, jíbi ʉ̃, arejameđa.
Aru cʉ̃rami copaiyede, mamarʉmʉre Jesús jẽniari jã́rejameđa ʉ̃́re, yópe arĩ:
—Mʉ, Simón, ¿aipe dápiayʉrʉ̃ mʉ? ¿Ñamene jocarĩ tãutʉrare ĩni ijãravʉcavʉ jabova? ¿Ĩni ne jaboteimarare jocarĩ o apevʉre jocarĩ? arejameđa Jesús.
26 Pedro arejameđa:
—Tãutʉrare ĩñama apevʉre jocarĩ, arejameđa.
Jesús arejameđa:
—Que baru ne jaboteimarare jíye jaʉbevʉ tãutʉrare ne jabovare. Quédeca tãutʉrare jíye jaʉbevʉ yʉre, Jʉ̃menijicʉi mácʉre, ne meađarãjiyepe jipacʉi cʉ̃ramine. 27 Ʉbenita ne jorojĩmenajiyepe majare, jajovacʉnʉjacʉ mʉ macajitabʉ ʉrabʉ ẽcarʉi. Ñai mamarʉmʉ mi ĩ́mʉ moacʉ ʉ̃i jijecamure voarĩ, eacʉyʉmu mʉ cũinátʉrava tãutʉratʉravare, jícacʉyʉ yʉre aru mʉre máre. Ditʉrava cũinátʉrʉ baquiyébu maja pʉcarã majare jíye jaʉé Jʉ̃menijicʉi cʉ̃ramine meađaiyede, arejameđa Jesús.
Aru yópe Jesús ʉ̃i đaicõjeiyepe đarejameđa Pedro.