Lucas

Juan Bautista ʉ̃i coyʉino Jʉ̃menijicʉi yávaiyede põecʉbenoi

(Mt 3.1-12, 7.19, 12.34, 14.3-4, 23.33; Mr 1.1-8, 6.17-18; Lc 7.29; Jn 1.19-28, 8.33)

3 No yóboi Roma ãmicʉrõ jaboteino jabocʉ cʉrejameđa, ʉ̃i ãmiá Tiberius César. Ʉ̃i jaboteiyede quince paiʉjʉa baju, Poncio Pilato jaboteyʉ barejámeđa Judea ãmicʉrijoborõcavʉre. Aru Herodes jaboteyʉ barejámeđa Galilea ãmicʉrijoborõcavʉre. Herodei yócʉ, Felipe, jaboteyʉ barejámeđa Iturea aru Traconite ãmicʉrijoborõacavʉre. Aru Lisanias jaboteyʉ barejámeđa Abilinia ãmicʉrijoborõcavʉre. 2 Anás aru Caifás máre sacerdotevare jaboteipõeva marejáimađa na. Dinʉmʉre Jʉ̃menijicʉ yávarejameđa Juan Bautistare, Zacarías bácʉi mácʉre, põecʉbenoi. Põeva vaivʉre coyʉre curejameđa nore. 3 Ʉ̃ nʉrejameđa caino Jordán ãmicʉriya jia yebai. Coyʉyʉ barejámeđa põevare, ne Jʉ̃menijicʉre jã́đovarajiyepe ayʉ ocoque, ne chĩori dápiarãjiyepe ayʉ ne ãmeina teiyede. Aru ne oatʉvarãjiyepe ayʉ ne đaiyede, “Jʉ̃menijicʉ ãrʉmetecʉyʉme” ayʉ barejámeđa diede. 4 Yópe toivarejaquemavʉ javede ñai Jʉ̃menijicʉi yávaiyede coyʉcaipõecʉ bácʉ, ʉ̃i ãmiá Isaías:

Jʉ̃menijicʉre coyʉcaipõecʉ cođoboboyʉre jápiarãjarama põecʉbenoi: “Meađajarã mʉje ũmene copʉ etaburĩ maje jabocʉre, nopedeca mʉje meađaiyepe daimare, ñai ʉ̃mʉ, mʉje pueđaimʉ, ʉ̃i daquiye jipocai. Que đarĩ dajocajarã mʉje ãmeina teiyede, Jʉ̃menijicʉi daroimʉ macʉyʉ́ ʉ̃i daquiye jipocai, Jʉ̃menijicʉi copʉ etaquiyepe ayʉ mʉjare. 5 Caino ẽmeino buiquíyebu. Aru caiye cʉ̃racũa jõđaquiyebu. Ma nurimema nuritequiyebu. Aru ma yaribema máre yaritequiyebu. Jabovare aru jabova ãmevʉre máre dajocarĩ ne ãmeina teiyede oatʉvaiye jaʉvʉ náre ñai Jʉ̃menijicʉi daroimʉ macʉyʉ́ ʉ̃i daquiye jipocai. 6 Caivʉ ijãravʉcavʉ jã́rajarama Jʉ̃menijicʉi daroquimʉre, põevare meađaipõecʉre”, arĩ toivarejaquemavʉ Isaías bácʉ.

7 Obedivʉ põeva earejaimađa Juan Bautista yebai, ʉ̃i jã́đovaquiyepe aivʉ náre Jʉ̃menijicʉque jiai. Ʉ̃i yebai eaivʉre, náre arejameđa:

—¡Mʉja, jʉjovaivʉbu, mʉje đaiye boje mearape! ¡Aru ãđavape paivʉbu mʉja, mʉje ãmeđaiye boje apevʉre! Jʉ̃menijicʉi jorojĩquijãravʉ edaiyede, jãve dupini bʉojabenamu mʉja. 8 Ðajarã mʉja yópe põeva chĩoivʉ ne ãmeina teiyede, oatʉvaivʉ ne đaiyepe. Mʉje baju abejarã: “Majeñecu Abraham mácʉ barejaquémavʉ. Jʉ̃menijicʉ yóvarejaquemavʉ ʉ̃mácʉre. Que baru meara bajutamu maja Jʉ̃menijicʉi jã́inore”, abejarã mʉja. Jãve coyʉyʉbu mʉjare: Jʉ̃menijicʉ bʉojaibi oatʉvayʉ cʉ̃raboare Abraham mácʉi pãramena márajivʉre đacʉyʉ, ne đarãjiyepe ayʉ yópe ʉ̃i ʉrõpe. 9 Yópe jiore memeipõecʉ ʉ̃i jã́iyede jocʉcʉa jẽidʉa mearʉa cʉbecʉre ʉ̃i jioi, ʉ̃i jarʉvajʉroepe dicʉáre toaboi, nopedeca Jʉ̃menijicʉ jã́ñʉ mʉjare mearo đabevʉre, jarʉvacʉyʉme mʉjare toabo cũiméboi, arejameđa Juan Bautista.

10 Que teni ina obedivʉ põeva jẽniari jã́rejaimađa Juan Bautistare:

—¿Aipe đarãjidi ñʉja? arejaimađa.

11 Juan Bautista arejameđa náre:

—Pʉcacajea cuitótecajea cʉvacʉ baru, jíjacʉ ñai cʉvabecʉre. Aru ãino cʉvacʉ baru máre, jíjacʉ ñai ãino cʉvabecʉre, arejameđa.

12 Ina jabovare tãutʉra ĩcaipõeva Juan Bautista yebai nʉrejaimađa, ʉ̃i jã́đovaquiyepe aivʉ náre Jʉ̃menijicʉque jiai. Aru arejaimađa ʉ̃́re:

—Mʉ, bueipõecʉ, ¿aipe đarãjidi ñʉja? arejaimađa.

13 Ʉ̃ arejameđa náre:

—Ĩmejara pʉeno baju yo mʉje jabocʉi cõjeinore mʉjare. arejameđa.

14 Apevʉ churarava máre jẽniari jã́rejaimađa ʉ̃́re:

—¿Aipe đarãjidi ñʉja? arejaimađa.

Ʉ̃ arejameđa náre:

—Tatobejarã apevʉ ne cʉvaede. Boarĩ́ jarʉvaiyʉbejarã náre. Aru borocʉbejarã ʉbenina ne đabedeca, ne jínajiyepe aivʉ mʉjare tãutʉrare, mʉje borocʉbenajiyepe aivʉ. Torojʉjarã mʉje memeni cʉvae boje, arejameđa ʉ̃.

15 Obedivʉ põeva coreivʉ barejáimađa Jʉ̃menijicʉi epequimʉre. Que baru Juan Bautista ʉ̃i que aiye boje, caivʉ ina põeva dápiarĩ ne ũmei jẽniari jã́rejaimađa ne bajumia: “¿Cristo, Jʉ̃menijicʉi epeimʉ, márica ñai?” 16 Ʉbenita Juan Bautista arejameđa náre:

—Yʉ jãve mʉjare jã́đovaivʉ Jʉ̃menijicʉre ocoque, mʉje chĩori dápiaiye boje mʉje ãmeina teiyede. Ʉbenita dacʉyʉme ji yóboi cũinácʉ, ji pʉeno parʉcʉ. Ʉ̃ macʉyʉ́me jã́đovañʉ mʉjare Jʉ̃menijicʉque Espíritu Santoque, ʉ̃i cʉquiyepe ayʉ mʉjaque aru ʉ̃i cađatequiyepe ayʉ mʉjare máre. Aru ʉ̃macʉyʉ́me jã́đovañʉ mʉjare Jʉ̃menijicʉque toaque máre, mʉje meara tenajiyepe ayʉ yópe põeva ne meađaiyepe tãure toaque, aru ʉ̃i ñájine đaquiyepe ayʉ mʉjare, meara tebedu. Que baru caivʉ pʉeno meacʉ bajube ʉ̃. Yʉ́capũravʉ pare ʉ̃i cãchinocacʉbu. Que baru ʉ̃́re cađateni bʉojabevʉ yʉ. Pʉ oarĩ bʉojabevʉ yʉ duayʉ ʉ̃i cʉraidoa bʉoimeare. 17 Yópe oteiye memeipõecʉ ʉ̃i veoiyepe jaraboque, oteiyede epecʉyʉ ʉ̃i epeiñami jívʉi, aru oteiye cajeáre juacʉyʉ, nopedeca Jʉ̃menijicʉ ʉ̃́re jʉ aivʉre epecʉyʉme ʉ̃i jaboteinoi aru ʉ̃́re jʉ abevʉre jarʉvacʉyʉme toabo cũiméboi, arĩ buedejameđa Juan Bautista.

18 Nópe coyʉrejameđa Jʉ̃menijicʉi yávaiye méne meađaipõecʉre, darocʉyʉre ina põevare, náre mearo đaicõjeñʉ, ne ñájimenajiyepe ayʉ toabo cũiméboi. 19 Aru Galilea ãmicʉrijoborõcavʉ ne jabocʉ Herodede jararejameđa Juan Bautista, ʉ̃i cʉvae boje ĩmacʉi márepacore, õi ãmiá Herodías, aru caiye ape ʉ̃i ãmeina teiye boje máre. 20 Ʉbenita Herodes Juan Bautistare jápiaiyʉbecʉ, jarʉvaicõjenejameđa ʉ̃́re ãmeina teivʉre jẽni jacoiñami.

Juan Bautista ʉ̃i jã́đovaino Jesúre Jʉ̃menijicʉque

(Mt 3.13-17; Mr 1.9-11; Lc 9.35)

21 Juan Bautista jã́đovañʉ marejámeđa Jʉ̃menijicʉque jiai caivʉ ina obedivʉ põevare. Aru Jesús máre nʉrejameđa ʉ̃i yebai, ʉ̃i jã́đovaquiyepe ayʉ ʉ̃́re Jʉ̃menijicʉque jiai. Ʉ̃i jã́đovariburu yóboi, Jesús jẽniañʉ marejámeđa Jʉ̃menijicʉre. Dinʉmʉre cavarõ mearo Jʉ̃menijicʉi cʉrõ vorĩ nʉrejavʉ̃ya. 22 Que teni jurecope Espíritu Santo ẽmeni darejameđa ʉ̃i pʉenora. Aru jápiarejaimađa apeno yávainore cavarõ mearo Jʉ̃menijicʉi cʉrõque aiyede yópe: “Mʉ, jímacʉ, ji ʉmʉ, me torojʉvʉ yʉ mʉre”, arejameđa Jesúre Jʉ̃menijicʉ.

Jesucristo ʉ̃i jipocacavʉ bácavʉre coyʉino

(Mt 1.1-17)

23 Jesús treinta paiʉjʉa cʉvacʉ mamarʉmʉ bueni bʉ́rejameđa põevare. Ina marejáimađa Jesúi bʉcʉva: Põeva dápiarejaimađa ʉ̃́re Joséi mácʉpe. Aru José Elí bácʉi mácʉ barejaquémavʉ. 24 Aru Elí bácʉ Matat bácʉi mácʉ barejaquémavʉ. Matat bácʉ Leví bácʉi mácʉ barejaquémavʉ. Leví bácʉ Melqui bácʉi mácʉ barejaquémavʉ. Melqui bácʉ Jana mácʉi mácʉ barejaquémavʉ. Jana mácʉ José bácʉi mácʉ barejaquémavʉ. 25 Aru José bácʉ Matatías bácʉi mácʉ barejaquémavʉ. Matatías bácʉ Amós bácʉi mácʉ barejaquémavʉ. Amós bácʉ Nahúm mácʉi mácʉ barejaquémavʉ. Nahúm mácʉ Esli bácʉi mácʉ barejaquémavʉ. Esli bácʉ Nagai bácʉi mácʉ barejaquémavʉ. 26 Aru Nagai bácʉ Maat bácʉi mácʉ barejaquémavʉ. Maat bácʉ Matatías bácʉi mácʉ barejaquémavʉ. Matatías bácʉ Semei mácʉi mácʉ barejaquémavʉ. Semei mácʉ Josec bácʉi mácʉ barejaquémavʉ. Josec bácʉ Judá bácʉi mácʉ barejaquémavʉ. 27 Aru Judá bácʉ Joanán mácʉi mácʉ barejaquémavʉ. Joanán mácʉ Resa bácʉi mácʉ barejaquémavʉ. Resa bácʉ Zorobabel bácʉi mácʉ barejaquémavʉ. Zorobabel bácʉ Salatiel bácʉi mácʉ barejaquémavʉ. Salatiel bácʉ Neri bácʉi mácʉ barejaquémavʉ. 28 Aru Neri bácʉ Melqui bácʉi mácʉ barejaquémavʉ. Melqui bácʉ Adi bácʉi mácʉ barejaquémavʉ. Adi bácʉ Cosam mácʉi mácʉ barejaquémavʉ. Cosam mácʉ Elmadam mácʉi mácʉ barejaquémavʉ. Elmadam mácʉ Er bácʉi mácʉ barejaquémavʉ. 29 Aru Er bácʉ Josué bácʉi mácʉ barejaquémavʉ. Josué bácʉ Eliezer bácʉi mácʉ barejaquémavʉ. Eliezer bácʉ Jorim mácʉi mácʉ barejaquémavʉ. Jorim mácʉ Matat bácʉi mácʉ barejaquémavʉ. 30 Aru Matat bácʉ Leví bácʉi mácʉ barejaquémavʉ. Leví bácʉ Simeón mácʉi mácʉ barejaquémavʉ. Simeón mácʉ Judá bácʉi mácʉ barejaquémavʉ. Judá bácʉ José bácʉi mácʉ barejaquémavʉ. José bácʉ Jonam mácʉi mácʉ barejaquémavʉ. Jonam mácʉ Eliaquim mácʉi mácʉ barejaquémavʉ. 31 Aru Eliaquim mácʉ Melea bácʉi mácʉ barejaquémavʉ. Melea bácʉ Mena mácʉi mácʉ barejaquémavʉ. Mena mácʉ Matata bácʉi mácʉ barejaquémavʉ. Matata bácʉ Natán mácʉi mácʉ barejaquémavʉ. 32 Aru Natán mácʉ David bácʉi mácʉ barejaquémavʉ. David bácʉ Isaí bácʉi mácʉ barejaquémavʉ. Isaí bácʉ Obed bácʉi mácʉ barejaquémavʉ. Obed bácʉ Booz bácʉi mácʉ barejaquémavʉ. Booz bácʉ Sala bácʉi mácʉ barejaquémavʉ. Sala bácʉ Naasón mácʉi mácʉ barejaquémavʉ. 33 Aru Naasón mácʉ Aminadab bácʉi mácʉ barejaquémavʉ. Aminadab bácʉ Admin mácʉi mácʉ barejaquémavʉ. Admin mácʉ Arni mácʉi mácʉ barejaquémavʉ. Arni mácʉ Esrom mácʉi mácʉ barejaquémavʉ. Esrom mácʉ Fares bácʉi mácʉ barejaquémavʉ. Fares bácʉ Judá bácʉi mácʉ barejaquémavʉ. 34 Aru Judá bácʉ Jacob bácʉi mácʉ barejaquémavʉ. Jacob bácʉ Isaac bácʉi mácʉ barejaquémavʉ. Isaac bácʉ Abraham mácʉi mácʉ barejaquémavʉ. Abraham mácʉ Taré bácʉi mácʉ barejaquémavʉ. Taré bácʉ Nacor bácʉi mácʉ barejaquémavʉ. 35 Aru Nacor bácʉ Serug bácʉi mácʉ barejaquémavʉ. Serug bácʉ Ragau bácʉi mácʉ barejaquémavʉ. Ragau bácʉ Peleg bácʉi mácʉ barejaquémavʉ. Peleg bácʉ Heber bácʉi mácʉ barejaquémavʉ. Heber bácʉ Sala bácʉi mácʉ barejaquémavʉ. 36 Aru Sala bácʉ Cainán mácʉi mácʉ barejaquémavʉ. Cainán mácʉ Arfaxad bácʉi mácʉ barejaquémavʉ. Arfaxad bácʉ Sem mácʉi mácʉ barejaquémavʉ. Sem mácʉ Noé mácʉi mácʉ barejaquémavʉ. Noé mácʉ Lamec bácʉi mácʉ barejaquémavʉ. 37 Aru Lamec bácʉ Matusalén mácʉi mácʉ barejaquémavʉ. Matusalén mácʉ Enoc, ñai yaibécʉ, ʉ̃i mácʉ barejaquémavʉ. Enoc Jared bácʉi mácʉ barejaquémavʉ. Jared bácʉ Mahalaleel bácʉi mácʉ barejaquémavʉ. Mahalaleel bácʉ Cainán mácʉi mácʉ barejaquémavʉ. 38 Aru Cainán mácʉ Enós bácʉi mácʉ barejaquémavʉ. Enós bácʉ Set bácʉi mácʉ barejaquémavʉ. Set bácʉ Adán mácʉi mácʉ barejaquémavʉ. Aru Adán mácʉ Jʉ̃menijicʉi mácʉ barejaquémavʉ.