1 Pedro
Aipe đaiye jaʉrõ pʉrʉbʉoivʉre
(Ef 5.22, 25; Col 3.18-19; 1 Ti 2.9)
3 Mʉja ʉ̃mʉcʉrivʉ máre, jʉ ajarã mʉjemarepacʉre nopedeca ina memecaivʉ ne jʉ aiyepe ne jabovare. Que teni apevʉ nácavʉ ne jʉ abedu Jʉ̃menijicʉi yávaiyede, mʉja yávabevʉva jʉ are đarãjaramu náre, mʉje mearo đaiye boje. Jaʉbequiyebu mʉje coyʉrãjiye náre, ne jʉ arãjiyepe aivʉ Cristore. 2 Quénora ne jã́iyede mʉjare mearo đaivʉre pʉcaũmea cʉbevʉva aru pueđaivʉre máre, jʉ arãjarama Cristore. 3 Mʉje meađaiyede mʉje bajure, đabejarã jã́icõjenajivʉ apevʉre mʉjare. Que baru mʉje vaivéiyeque mʉje pođare, aru mʉje ađaiyeque cõđeimeare máre, aru mʉje doiyeque cuitótecajeare máre, jã́icõjemejara apevʉre. 4 Quénora meara májara mʉja, mʉje meaũme boje. No mearo oatʉvabenotamu aru cũiménotamu, mʉje ũme jijecʉbeque aru cãrijimeque máre. No mearo bojecʉvʉ me Jʉ̃menijicʉi jã́inore. 5 Quédecabu ina nomiva mácavʉ javede Jʉ̃menijicʉre mearore jívʉ bácavʉ. Napini coredejaquemavʉ na mácavʉ Jʉ̃menijicʉre, ʉ̃i mearo đacaquiyepe aivʉ náre. Aru jʉ arejaquemavʉ némarebʉcʉva bácavʉre. Que teni meara đarejaquemavʉ ne bajure. 6 Quédecabe cũináco nácaco, Sara báco. Õ máco jʉ arejaquemavʉ jímarepacʉ Abraham mácʉre. “mʉ, ji jabocʉ”, ađo barejaquémavʉ. Aru mʉjavacari ṍpe paivʉbu bʉojaivʉ, mearore đaivʉ baru jidʉbevʉva.
7 Aru mʉja nomicʉrivʉ máre, me coreóvajarã aipe đaiye jaʉrõre mʉjare mʉjemarebʉcʉvare. Na mʉje cãchino parʉrivʉbu. Que baru pueđajarã náre. Aru na cʉvarãjarama jãravʉ cũiméjãravʉ baquinóre cũinátʉrʉ mʉjaque. Que baru pueđajarã náre. Me cʉjarã náque, mʉje jẽniari bʉojarãjiyepe aivʉ Jʉ̃menijicʉque yópe mʉjare jaʉépe.
Jesúre jʉ aivʉ ne mearo đaiye boje ñájiyede coyʉino
(Mt 5.10)
8 Quénora coyʉyʉbu mʉjare die borore. Dápiajarã caivʉ mʉja mʉje ũmei cũinátʉrʉ. Apevʉ ne chĩoru, chĩojara náque. Aru apevʉ ne torojʉru, torojʉjarã náque. Ʉjarã mʉjevʉre yópe mʉje ʉepe mʉjeyovare. Cađatejarã ina cõmaje ãrojarivʉre. “¿Meara márica apevʉ pʉeno?” arĩ dápiabejarã. 9 Apevʉ ne ãmeno đaru mʉjare, copʉ ãmeno đabejarã náre. Apevʉ ne ãmeina yávaru mʉjare, copʉ ãmeno yávabejarã náre. Quénora jẽniajara Jʉ̃menijicʉque, ʉ̃i mearo đacaquiyepe aivʉ caivʉ náre, mʉje coreóvaiye boje Jʉ̃menijicʉ cutuyʉ bácʉre mʉjare, mʉje mearo đarãjiyepe ayʉ yópe ʉ̃i mearo đacaquiyepe mʉjare. 10 Yópe arĩ, Jʉ̃menijicʉ toivaicõjenejaquemavʉ ʉ̃i yávaiyede:
Ácʉ põecʉ torojʉiyʉcʉ baru aru cʉiyʉcʉ baru me ijãravʉi, ãmeina yávabejacʉrĩ, aru dajocajacʉrĩ ʉ̃i borocʉede máre. 11 Dajocajacʉrĩ ʉ̃i ãmeno đaiyede. Aru đajacʉrĩ mearo. Ʉetʉbecʉva pʉeno baju vorĩ eajacʉrĩ ʉ̃i ũmeque cãrijimene đacʉyʉ apevʉre. 12 Maje jabocʉ jã́ri coreyʉbe ina mearo đaivʉre. Jápiayʉbe ne jẽniaiyede. Ʉbenita maucʉvacʉbe ina ãmeno đaivʉre, arĩ toivaicõjenejaquemavʉ.
13 Ñame ãmeno đabenama majidivʉ mʉjare mʉje ũmei, mʉje torojʉrĩ đaru mearo. 14 Ʉbenita mʉja ñájivʉ baru, mʉje mearo đaiye boje, ʉrarõ torojʉrãjaramu mʉja. Jidʉbejarã ina ñájine đaivʉre mʉjare. Aru cuecumamejara. 15 Quénora mearore jíjarã Cristore mʉje ũmei. Aru pueđajarã ʉ̃́re, mʉje jabocʉre. Ñame ne jẽniaru mʉjare, mʉje coyʉrãjiyepe aivʉ iye mʉje napini coreiyede Cristoque, maumena coyʉrĩ majijarã me iye borore mʉje napini coreimʉre. 16 Aru coyʉjarã náre jijecʉbevʉva aru pueđaivʉ náre. Cainʉmʉa mearo đajarã, yópe mʉje majiépe, “Boropatebevʉ yʉ”, mʉje arĩ dápiainoque. Que teni apevʉ ãmeina yávaivʉ baru mʉjare, mearo đaivʉreca mʉje jʉ aiye boje Jesucristore, návacari cʉyoje tenajivʉbu ne ãmeina yávaiye báquede mʉje borore. 17 Que baru Jʉ̃menijicʉi ñájicõjenu mʉjare, yópe ʉ̃i ʉrõpe, mʉje ñájiye meavʉ, mʉje mearo đaiye boje. Ʉbenita meamevʉ, mʉje ãmeno đaiye boje.
18 Cristocapũravʉ ñájini yaidéjame cũinára, põevare maje ãmeina teiye boje, maje boropatebenajiyepe ayʉ diede. Ñai meacʉ ñájinejame ãmeina teivʉre boje, meara đacʉyʉ majare Jʉ̃menijicʉi jã́inoi aru cũiné đacʉyʉ maje coateiye báquede Jʉ̃menijicʉre jarʉvarĩ, maje Jʉ̃menijicʉ jina tenajiyepe ayʉ. Cristobe põeva ne boarĩ́ jarʉvaimʉ mácʉ ʉ̃i bajure, ʉbenita Jʉ̃menijicʉi ũmedavaimʉ mácʉ ʉ̃i ũmene. 19 Aru decocʉpe ʉ̃i baju cʉbecʉva, coyʉcʉnʉrejaquemavʉ ina yaivʉ bácavʉ bʉoimarape paivʉre. 20 Na mácavʉ apʉrivʉ cãreja jʉ abedejaquemavʉ Jʉ̃menijicʉi yávaiyede ãnijãravʉa báquei, Noé mácʉ ʉ̃i đaiye báquede jiađocũ ʉracũre. Dinʉmʉre Jʉ̃menijicʉ napini coreyʉ barejaquémavʉ, na mácavʉ ne jʉ arãjiyepe arĩduyʉ ʉ̃́re. Ʉbenita obebejĩna baju, ocho paivʉ quévʉra, na mácavʉ meađaimara marejaquémavʉ dicũque muiváibore jocarĩ. Ocoi jorĩ, ocoque meađaimara marejaquémavʉ. 21 Quédecabu iye mʉje jã́đovaiye Jʉ̃menijicʉre ocoi. Yópe Jʉ̃menijicʉi meađaiye báquepe Noéja mácavʉre ocoque, nopedeca caride Jʉ̃menijicʉ meađaibi mʉjare máre ocoque mʉje jã́đovaiyede ʉ̃́re Jesucristoi nacajaiye báque boje yainore jarʉvarĩ. Aru maja jã́đovamevʉ Jʉ̃menijicʉre ocoi, joarãjivʉ maje docʉre. Quénora jã́đovaivʉbu Jʉ̃menijicʉre ocoi, jẽniarajivʉ ʉ̃́re, “Boropatebevʉ yʉ” ʉ̃i arĩ dápiare đaquiyepe aivʉ majare. Aru boropatebevʉ maja, ʉ̃i ãrʉmeteiye báque boje maje ãmeina teiyede. 22 Javede ñai Jesucristo nʉrejaquemavʉ cavarõ mearo Jʉ̃menijicʉi cʉrõi. Caride cʉbi Jʉ̃menijicʉi meapũravʉi, ʉ̃i parʉéde cʉvae boje. Jaboteyʉbe caivʉ ina ángelevare, aru cavarõcavʉ jabovare aru parʉrivʉre máre.