Romanos
Pablo ʉ̃i jẽvari coyʉino pʉrʉbʉoinora Jʉ̃menijicʉi coyʉiye báquede Moisés bácʉre
7 Mʉja, jívʉ, coreóvaivʉbu jãve iye ji coyʉquiyede mʉjare caride. Coyʉquijivʉ Jʉ̃menijicʉi đaicõjeiyede ʉ̃i coyʉiye báquede Moisés bácʉre. Põeva đaicõjeimaramu dieque ne cʉede cãreja ijãravʉi pʉ ne yaiyeta. 2 Que baru Jʉ̃menijicʉi đaicõjeiyede ʉ̃i coyʉiye báque Moisés bácʉre yópe cũináco nomió pʉrʉbʉođope paiyebu, cʉcođo jímarepacʉque ʉ̃i yaibéde cãreja ʉ̃́queda. Ʉbenita ʉ̃i yaidú, iye đaicõjeiyede aipe đabejebu õ dinʉmʉ. 3 Que baru ico apecʉque cʉco baru jímarepacʉre jarʉvarĩ ʉ̃i cʉede cãreja, ãmeina đajebu õ aru “ãmeco” ajebu ṍre. Ʉbenita jímarepacʉ bácʉi yainíburu yóbore, cõjeimo ãmejebu õ dinʉmʉ. Que baru pʉrʉbʉođo baru apecʉque, ãmeina đabejebu õ.
4 Mʉja, jívʉ, judíova, Jesúre jʉ aivʉ, quédeca vaivʉ mʉjare. Yópe ʉ̃mʉ ʉ̃i cʉvaepe jímarepacore, Jʉ̃menijicʉi đaicõjeiye ʉ̃i coyʉiye báque Moisés bácʉre cʉvarejaquemavʉ mʉjare. Que baru iye đaicõjeiyeque đaicõjeimara marejaquémavʉ mʉja. Ʉbenita Jesucristoi yaiyede, caivʉ ina ʉ̃́re jʉ arãjivʉ máre yaidéjaquemavʉ ʉ̃́que Jʉ̃menijicʉi jã́inore. Que teni mʉja máre yaivʉ bácavʉpe barejaquémavʉ ʉ̃́que. Que baru iye đaicõjeiyeque đaicõjeimara ãmevʉ mʉja caride. Yópe nomió, jímarepacʉ bácʉi yainíburu yóbore, õi pʉrʉbʉoiyepe apecʉque, nopedeca mʉja máre mʉje coateniburu yóbo yainore jarʉvarĩ, yópe nacovaimarape paivʉ cʉrivʉbu Jesucristoque cũinávʉpe. Maje cʉede Jesucristoque cũinávʉpe, yopedecabu majare: Ʉ̃ majemarepacʉpe páyʉ pʉeno mearore đarĩ nʉre đaibi majare, maje cʉrãjiyepe ayʉ pʉeno mearo ʉ̃́que. 5 Ʉbenita maje cʉrãjiye jipocai Jesucristoque, maje ãmeina đaiyʉe báque boje, coatedejaquemavʉ maja Jʉ̃menijicʉre jarʉvarĩ.
Yopedeca barejaquémavʉ majare: Pʉeno ãmenore đare nʉrejaquemavʉ maja, pʉeno baju coatenajivʉ Jʉ̃menijicʉre jarʉvarĩ. Jʉ̃menijicʉ đaicõjeme máque apejĩene majare Moisés bácʉre ʉ̃i coyʉicõjeiye báqueque, yópe pʉeno ʉrarõ ãmenore đare đarejaquemavʉ maje ãmeina đaiyʉede. Que teni maja maje bajure đaicõjenejaquemavʉ aru maje dápiaiyede máre, pʉeno baju ãmeina tenajivʉ. 6 Ʉbenita caride đaicõjememaramu maja Jʉ̃menijicʉi đaicõjeiye ʉ̃i coyʉiye báqueque Moisés bácʉre. Jipocamia yebacavʉpe barejaquémavʉ maja. Diede jʉ aiye jaʉrejaquemavʉ majare. Ʉbenita Jʉ̃menijicʉre memecabevʉbu maja javecarõque, yópe ʉ̃i đaicõjeiye ʉ̃i coyʉiye báquepe Moisés bácʉre. Quénora Jʉ̃menijicʉre memecaivʉbu maja mamaroque caride, yópe ñai Espíritu Santoi cʉre đaiyepe majare apʉé mamaeque. Que baru đaivʉbu yópe iye đaicõjeiyepe majare jaʉé cʉbe boje, quénora maje đaiyʉe boje.
Pablo “Ãmeina tede đaiye cʉe ji baju” arĩ, ʉ̃i coyʉino
7 ¿Aipe coyʉiye jaʉri majare caride? ¿Meameni Jʉ̃menijicʉi đaicõjeiye ʉ̃i coyʉiye báque Moisés bácʉre? Meame ãmevʉ. Nópe dápiaiye jaʉbevʉ. Ʉbenita ji đaicõjeiyede coreóvaquiye jipocare, coreóvabedejacacʉ yʉ ji ãmeina đaiyʉe cʉede. Cũináro iye đaicõjeiyecarõ, “Ãujimejacʉ apecʉ ʉ̃i cʉvaede”, aino cʉbedu, ãujimejebu yʉ apevʉ ne cʉvaede. 8 Ðaicõjeiye cʉbedu, maja ãmeina đaiyʉbejebu. Ʉbenita Jʉ̃menijicʉi đaicõjeiye ʉ̃i coyʉiye báque Moisés bácʉre coreóvare đarejaquemavʉ yʉre ãujiye jaʉbede põevare. Ʉbenita no yóboi, ji coreóvaiye boje diede, ʉrarõreca dápiarĩ bʉ́rejacacʉ ãujiyede. Ji ãmeina đaiyʉe boje, jʉjovaimʉmu yʉ. Que baru ãujivʉ yʉ. 9 Apenʉmʉa iye đaicõjeiyede coreóvabecʉ, torojʉcʉ barejacácʉ ji baju. Coreóvabedejacacʉ boropateyʉ ji baju. Ʉbenita cũinájãravʉ ji jápiaiyede yo đaicõjeino, “Ãujimejara” ainore, ʉre ãmeina đaiyede bʉ́rejacacʉ yʉ. Aru yaiyʉ́ bácʉpe coateyʉ barejacácʉ Jʉ̃menijicʉre jarʉvarĩ.
10 Jʉ̃menijicʉ coyʉrĩdurejaquemavʉ ʉ̃i đaicõjeiyede Moisés bácʉre, põeva jʉ arĩ diede ne cʉrãjiyepe ayʉ me ʉ̃́que ijãravʉre aru jãravʉ cũiméjãravʉ baquinóre máre. Ʉbenita bíjare đarejaquemavʉ yʉre. Ji đabe báque boje yópe Jʉ̃menijicʉi đaicõjeiyepe, coatede đaimʉ marejacácʉ yʉ Jʉ̃menijicʉre jarʉvarĩ. 11 Ji coreóvaiye báque boje, cũináro ʉ̃i đaicõjeiyecarõ ʉ̃i coyʉiye báque Moisés bácʉre, jʉjovaimʉpe tedejacacʉ yʉ ji ãmeina đaiyʉe boje. Nurié dápiabedejacacʉ yʉ. Ʉbenita ji nópe đaiye báque boje, jʉ abedejacacʉ Jʉ̃menijicʉre. Que teni ji ãmeina đaiyʉe boje, coatedejacacʉ yʉ Jʉ̃menijicʉre jarʉvarĩ yaiyʉ́ bácʉpe no đaicõjeino cũinároque. 12 Que baru ãmecʉbu yʉ. Ʉbenita Jʉ̃menijicʉi đaicõjeiye ʉ̃i coyʉiye báque Moisés bácʉre ãmeno cʉbetamu die. Que baru yo Jʉ̃menijicʉi đaicõjeino cũináro máre ãmeno cʉbenotamu. Pʉeno baju mearotamu, yópe Jʉ̃menijicʉvacari pʉeno baju meacʉpe. Aru põeva nore mearore đaivʉ torojʉrivʉbu.
13 ¿No đaicõjeino mearo aru torojʉre đaino máre coatede đaidi yʉre Jʉ̃menijicʉre jarʉvarĩ yaiyʉ́ bácʉpe? ¡Bi, ye que ãmevʉ! ¡Aipinʉmʉ vaibéjarõri nópe! Quénora ji baju ãmeina đaiyʉe boje, coatedejacacʉ yʉ Jʉ̃menijicʉre jarʉvarĩ yaiyʉ́ bácʉpe. Ji jʉ abede no đaicõjeino mearore, jã́đovaivʉ aipe pʉeno ãmeno baju ji ãmeina đaiyʉede. Que teni Jʉ̃menijicʉ coyʉrejaquemavʉ no đaicõjeinore, ji majiquiyepe ayʉ aipe pʉeno ãmeno baju ji ãmeina đaiyʉede. 14 Maja judíova majidivʉbu Jʉ̃menijicʉi đaicõjeiye ʉ̃i coyʉiye báque Moisés bácʉre pʉeno mearo baju Jʉ̃menijicʉi Espíritu Santoi epeiye báque boje diede aru ʉ̃ jie báque boje máre. Ʉbenita yʉ́capũravʉ đaicõjeimʉmu ji ãmeina đaiyʉeque. Aru ãmecʉbu yʉ. Yʉ́vacari đayʉbu yópe ji ãmeina đaiyʉepe. Yópe yebacacʉ, apecʉi bojeđaimʉpe páyʉbu yʉ. Aru ji ãmeina đaiyʉe ñai yebacacʉi jabocʉpe painomu. Que baru yʉrecabu đaicõjeimʉ ji ãmeina đaiyʉeque.
15 Jãve coreóvabevʉ aipe vaiyede yʉre aru ji đaiyede máre. Yópe ji đaiyʉepe đabevʉ yʉ. Ʉbenita iyebu ji jã́iyʉbe ji đaiye. 16 Ji đaiyʉbede đayʉ baru, jã́đovaivʉ yʉ Jʉ̃menijicʉi đaicõjeiyede méne. 17 Yʉ́vacari đayʉbu iye ãme ji đaiyede. Ʉbenita que đabevʉ ji ʉe boje. Quénora ji ãmeina đaiyʉe cʉe boje cãreja ji ũmei, diebu ãmeina tede đaiye yʉre. 18 Yʉ majivʉ yʉre me cʉbede. Ji ũmei mearo cʉbevʉ. Yʉ́vacari đaiyʉvʉ méne. Ʉbenita ye bʉojabevʉ đayʉ méne yópe ji ʉrõpe. 19 Iye méne, ji đaiyʉede, đabevʉ yʉ. Quénora iye ãmene, ji đaiyʉbede, đaivʉ yʉ. 20 Yʉ đayʉ baru ji đaiyʉbede, yʉ ãmevʉ đayʉ diede. Quénora ji ãmeina đaiyʉe cʉe cãreja ji ũmei, diedecabu ãmeina tede đaiye yʉre.
21 Que baru yʉ coreóvaivʉ aipe vaiyede yʉre cainʉmʉa. Méne đaiyʉvʉ yʉ. Ʉbenita quénora ji đaiyeque ãmene eaivʉ yʉ. 22 Torojʉrĩ ʉvʉ Jʉ̃menijicʉi đaicõjeiyede ji ũmei. Aru đaiyʉrĩduivʉ yʉ diede. 23 Ʉbenita ji ãmeina đaiyʉeque đaicõjeimʉmu yʉ. Yópe boaipõeva ne maucʉvarãdaiyepe ĩmaro jabocʉre, nopedeca ji ãmeina đaiyʉe maucʉvare đaivʉ yʉre.
24 Que baru jãve yʉ, põecʉ, cõmaje ãrojacʉbu yʉ. Ʉrarõreca jaʉvʉ yʉre meađaipõecʉre, đaicõjeimʉ ãmequiyepe aivʉ ji ãmeina đaiyʉeque aru coateimʉ ãmequiyepe aivʉ Jʉ̃menijicʉre jarʉvarĩ. 25 Yʉ mearore jíyʉbu Jʉ̃menijicʉ pʉeno meacʉ bajure. Ʉ̃́recabe maje jabocʉ Jesucristore cađatede đayʉ yʉre. Yópe cʉvʉ yʉ: Yʉ́vacari Jʉ̃menijicʉre jʉ aiyʉvʉ yʉ. Aru ʉ̃́re memecaiyʉvʉ yʉ. Ʉbenita nópe ji đaiyʉepe đaiye majibevʉ yʉ cainʉmʉa. Quénora apenʉmʉa đaivʉ yʉ yópe ji ãmeina đaiyʉeque.