Gálatas
Cađatejarã mʉje baju
6 Mʉja, jívʉ, cũinácʉ mʉjacacʉ ʉ̃i vainí tʉru ãmeina đayʉ, mʉja ñai Espíritu Santoi đaicõjeimara cađatejarã ʉ̃́re, ʉ̃i dajocaquiyepe aivʉ ʉ̃i ãmeina teiyede. Ména meađarĩ, cađatejarã ʉ̃́re. Aru me jã́jara, mʉja máre vainí tʉbenajivʉ ʉ̃́pe. 2 Mʉje baju cađatejarã, apecʉ ʉ̃i ñájimequiyepe aivʉ. Nópe đaivʉ baru, đaivʉbu mʉja yópe Cristoi đaicõjeiyepe.
3 Ácʉ põecʉ “Mearo đaivʉ yʉ”, arĩ dápiayʉ baru mearore đabecʉvacari, ʉ̃i bajuma jʉjovayʉbe ʉ̃. 4 Caivʉ jã́ri corevajarãri ne baju đaiyede, coreóvarãjivʉ mearore o ãmenore. Aru ñai mearore đayʉ torojʉjacʉrĩ ʉ̃i nópe đaiye boje. Ʉbenita jã́mecʉva apevʉ ne đaiyede, “¿Ñame pʉeno mearore đari?” arĩ jẽniari jã́mejacʉrĩ ʉ̃. 5 Que baru mʉja coapa me jã́ri corevaiye jaʉvʉ mʉjare mʉje đaiyede.
6 Ñai bueyʉ Jʉ̃menijicʉi yávaiye méne jíjacʉrĩ ʉ̃́re bueipõecʉre apejĩe ʉ̃i me cʉvaede, que đarĩ cađatecʉyʉ ʉ̃́re bueipõecʉre jaʉéde.
7 Mʉje bajumia apecʉre jʉjovaicõjemejara. Jʉ̃menijicʉ bojeđacʉyʉme caivʉ põevare yópe ne đaiyepedeca. Que baru põecʉ cʉbebi jʉjovarĩ bʉojayʉ Jʉ̃menijicʉre. 8 Ñai đayʉ yópe ʉ̃i baju ãmeina đaiyʉepe ʉ̃i baju ãmeđarĩ coatecʉyʉme Jʉ̃menijicʉre jarʉvarĩ aru ñájicʉyʉme cainʉmʉa. Ʉbenita ñai đayʉ yópe ñai Espíritu Santoi mearo đaicõjeiyepe cʉvacʉyʉme jãravʉ cũiméjãravʉ baquinóre Cristoque. 9 Que baru ʉetʉbevʉva mearo đarãjarevʉ, Jʉ̃menijicʉi bojeđaquiyepe aivʉ majare me ãnijãravʉ, ʉ̃i beoijãravʉ baquinói. Majare me bojeđacʉyʉme, maje ʉetʉbevʉva dajocabedu maje đaiye méne, cađatenajivʉ apevʉre. 10 Que baru mearo đarãjarevʉ caivʉ põevare cainʉmʉa. Aru pʉeno mearo đarãjarevʉ majacavʉ Jesúre jʉ aivʉre.
Pablo ʉ̃i majicaino aru meaicõjeino Galaciacavʉre
11 Jã́jara mʉja caride yo ji toivacainore mʉjare ʉrarõa toivaivʉ ji bajui. 12 Ina põeva buraicõjene đaiyʉrĩduivʉ mʉjare mʉje cajede nópe đaivʉbu, judíova ne me jã́rajiyepe aivʉ náre. Ʉbenita nópe đaivʉbu, ina judíova ne ñájine đabenajiyepe aivʉ náre yópe ne ñájine đaiyepe ina coreivʉre Jʉ̃menijicʉi meađaquiyede náre Cristoi yaiye báque boje jocʉcʉjaravena. 13 Ina buraicõjeivʉvacari ne cajede đabenama yópe Jʉ̃menijicʉi đaicõjeiyede ʉ̃i coyʉiye báquepe Moisés bácʉre. Ʉbenita buraicõjene đaiyʉrivʉbu mʉjare, yópe torojʉrĩ “Ina põeva jʉ arĩ, buraicõjeđama ne cajede yópe ñʉje đaicõjeiyepe náre”, arĩ coyʉrãjivʉ. 14 Ʉbenita ye baju ãmevʉ yʉre yópe ne đaicõjeiye. Quénora torojʉvʉ yʉ ji ũmei yo boje: Jesucristo yaidéjaquemavʉ jocʉcʉjaravena yʉre boje. Que baru caride ʉbevʉ yʉ caiye iye ãmeina teiyede ijãravʉcavʉ ne đaiyede. Yʉ ye dápiabevʉ yópe ijãravʉcavʉ ne dápiaiyepe. Aru na máre ʉbenama yʉre caride. 15 Que baru ye baju ãmevʉ põecʉi buraicõjenu ʉ̃i cajede o buraicõjemenu. Quénora bojecʉvʉ majare maje cʉede mamarʉmʉ põeteivʉpe meaũmeque. 16 Jʉ̃menijicʉ torojʉrivʉ me cʉre đajacʉrĩ cãrijimevʉva aru cõmaje ãroje jã́jacʉrĩ caivʉ ina đaivʉre yópe ji bueiyepe Jesucristoi đaicõjeiyede. Ina nópe đaivʉ jãve Jʉ̃menijicʉi põevatamu na.
17 Yʉrecabu cʉvacʉ ji churiá báquede ji bajui, ji memecaiye boje Jesúre. Que baru yo jipocare ina Jesucristore jʉ aivʉre cãrijovaivʉ chĩore đabejarãri yʉre.
18 Mʉja, jívʉ, maje jabocʉ Jesucristo mearo đacajacʉrĩ mʉjare mʉje ũmei bojecʉbeda ʉ̃i me boje. Quédecabu. Quénoramu.