Romanos

13 Caivʉ ina jabovare Jʉ̃menijicʉ jaboteicõjeimi ijãravʉre. Que baru caivʉ põevare jʉ aiye jaʉvʉ ina jabovare coapa. Aru ina jabova Jʉ̃menijicʉi epeimaramu. 2 Ácʉ põecʉ maucʉvacʉ baru jabocʉre, maucʉvaibi Jʉ̃menijicʉi epeimʉ mácʉre. Que teni ñai põecʉ ñájicʉyʉme ʉ̃i maucʉvae boje. 3 Ina mearore đaivʉ jidʉbema jabovare. Quénora ina ãmenore đaivʉ jidʉma jabovare. Que baru mʉja jidʉiyʉbevʉ baru jabovare, mearo đajarã. Aru ina jabova me jã́rajarama mʉjare. 4 Ina jabova Jʉ̃menijicʉi epeimaramu na, me cađatenajivʉ mʉjare, aru mʉjare cađatede đarãjivʉ apevʉre máre. Ʉbenita mʉja ãmenore đaivʉ baru, jidʉjarã náre. Ñájine đaivʉ bʉojađama na. Aru ñájine đađama na ãmeno đaivʉre. Que teni ina jabova Jʉ̃menijicʉi epeimara ñájine đarãjivʉbu ãmeno đaivʉre. 5 Que baru jʉ aiye jaʉvʉ mʉjare ina jabovare, ne ñájine đabenajiyepe aivʉ aru “Boropatebevʉ yʉ”, mʉje arĩ dápiarãjiyepe aivʉ máre. 6 Que baru bojeđaiyede máre jíye jaʉvʉ ina jabova ne tãutʉra ĩ́cõjeiye boje caivʉ ne jaborõcavʉre. Jʉ̃menijicʉvacari ʉ̃i epeinore memeivʉbu ina jabova. 7 Bojeđajarã mʉja ina jabovare caino mʉjare bojeđaiye jaʉrõre. Aru pueđajarã caivʉ ina jabovare, mʉjare cõjeivʉre máre.

8 Bojecʉbe đabejarã apevʉre. Quénora cũinárora đaiye jaʉvʉ mʉjare: Ʉjarã apevʉre. Ácʉ põecʉ ʉcʉ baru apevʉre, đaibi caiyede yópe Jʉ̃menijicʉi đaicõjeiye coyʉiyepe. 9 Yópe đaicõjenejaquemavʉ Jʉ̃menijicʉ põevare: “Cʉbejarã apevʉque mʉjemarebʉcʉvare jarʉvarĩ. Boarĩ́ jarʉvabejarã põevare. Ñavamejara. Ãujimejara apevʉ ne cʉvaede”, arĩ đaicõjenejaquemavʉ. Caiye iye đaicõjeiye aru caiye ape đaicõjeiye máre cũináromia yópe aiyʉrõmu: “Mʉja coapa ʉjarã mʉjevʉre, yópe mʉje ʉepedeca mʉje bajure”, aiyʉebu iye. 10 Ácʉ põecʉ ʉcʉ baru ʉ̃ jivʉre, ye ãmenore đabecʉyʉme náre cainʉmʉa. Que baru põecʉ ʉcʉ baru ʉ̃ jivʉre, ñai đaibi caiyede iye đaicõjeiye coyʉiyepe.

11 Aru caiye iye ji coyʉiyepe đaiye jaʉvʉ mʉjare, mʉje majié boje ijãravʉi vaiyede. Cãivʉpe paivʉbu mʉja. Ʉbenita coedaiye jaʉvʉ mʉjare. Jesúi copaidaquijãravʉ, ʉ̃i nʉvaquijãravʉ baquinó majare cavarõ mearo ʉ̃i cʉrõi, joabevʉ caride, maje Jesúre mamarʉmʉ jʉ aijãravʉ bácarõ pʉeno. 12 Maje cʉede ijãravʉi yópe ñamipe painomu. Ʉbenita joabevʉ miađáe tʉiyepe paino maquinó, Jesúi copaidaquiyede yore. Que baru dajocaiye jaʉvʉ majare caiye iye ãmeina teiyede, põeva ne đare nʉiyede ñami, apevʉ ne jã́ri bʉojabede náre. Quénora đaiye jaʉvʉ majare caiye iye me teiyede yópe Jʉ̃menijicʉi ʉrõpe, põeva ne đare nʉiyede jãravʉ, apevʉ ne jã́iyede náre. Que baru yópe churara boaicarovede ĩni, ʉ̃i meateiyepe boacʉ́yʉ ʉ̃i mauvare, nopedeca Jʉ̃menijicʉi majiéque meateiye jaʉvʉ majare, đabeburĩ ãmenore. 13 Que baru jaʉvʉ majare maje đare nʉiye yópe cʉrivʉpe jãravʉ, apevʉ ne jã́ri bʉojaiyede náre. “Ũcurajare” abeni, ʉrarõ boqueiyede ũcumeni, pacotebejarã mʉja. Aru ãmeina đabejarã mʉja apevʉque mʉjemarebʉcʉva ãmevʉque. Aru jarabeni jorojĩmejara mʉja apevʉque máre. 14 Ʉbenita maje jabocʉ Jesucristore jẽniajara, ʉ̃i cađatequiyepe aivʉ mʉjare, mʉje cʉrãjiyepe aivʉ yópe ʉ̃i ʉrõpe. Aru mʉje ãmeina đaiyʉepe dápiaiyede dajocarĩ, đabejarã mʉje ʉrõ ãmenore.