Filemón
Pablo ʉ̃i meaicõjeino Filemóre
(Col 4.17)
1 Yʉ, Pablo, bʉoimʉ ji coyʉiye báque boje Jesucristoi yávaiye méne, toivaicõjeivʉ apecʉre iyoca paperayocare mʉre, Filemóre. Yʉ aru Timoteo, majecʉ ʉ̃i jʉ aiye boje Jesúre, meaicõjeivʉbu mʉre, ñʉje ʉmʉre ñʉjape memeñʉre. 2 Meajarari ina Jesúre jʉ aipõeva cójijivaivʉ mi cʉ̃rami. Aru Apia máre, ñʉjeco õi jʉ aiye boje Jesúre meajacorĩ õ. Aru Arquipo máre meajacʉrĩ ʉ̃. Ñʉjape coyʉibi Jesús ʉ̃i yávaiye méne apevʉ ne maucʉvaedeca ñʉjare. 3 Majepacʉ Jʉ̃menijicʉ, maje jabocʉ Jesucristomaque, mearo đacajacʉrĩ mʉjare bojecʉbeda ʉ̃i me boje. Aru torojʉrĩ cʉre đajacʉrĩ mʉjare cãrijimevʉva.
Filemón ʉ̃i ʉrõ põevare aru ʉ̃i jʉ aino Jesucristore
4 1:4-5 Mʉ, jícʉ, Filemón, ji coyʉiyede jipacʉ Jʉ̃menijicʉque torojʉede jívaivʉ mʉre boje cainʉmʉa. Jápiaivʉ mi borore mi ʉede Jesúre jʉ aipõevare aru mi jʉ aiyede maje jabocʉ Jesúre. Que baru jívaivʉ mearore Jʉ̃menijicʉre. 5 — 6 Aru ina põevare, mi jʉ are đaimara Jesúre, mi coyʉiye boje náre ʉ̃i yávaiye méne, yʉ Jʉ̃menijicʉque náre máre jẽniavaivʉ, ne coreóvarãjiyepe ayʉ me caiye iye Jʉ̃menijicʉi mearo đacaquiyede majare, maje cʉe boje Jesucristoque cũinávʉpe. 7 Mʉ, jícʉ, caride torojʉvʉ yʉ. Mʉ torojʉre đaivʉ yʉre mi me cađateiyede ina Jesúre jʉ aipõevare, mi ʉe boje náre.
Pablo ʉ̃i jẽniaino Filemóre ʉ̃i cađatequiyepe ayʉ ñai yebacacʉre, Onésimore
(Col 4.9)
8 Que baru jẽniaivʉ mʉre mi cađatequiyepe ayʉ. Yʉ cađateicõjeiyʉbevʉ mʉre ji parʉéque, Cristoi parʉre đaiye báquede yʉre. 9 Quénora jẽniaivʉ mʉre, mi cađatequiyepe maje ʉe boje, Cristoi cʉre đaiye báquede majare. Bʉcʉcʉbu yʉ. Aru ji bueiye boje Jesús ʉ̃i yávaiye méne bʉoimʉmu caride.
10 Jẽniaivʉ mʉre mi cõmaje ãroje jã́quiyepe ayʉ ñai Onésimore. Ʉ̃i jápiaiye báquede ji coyʉiye báquede Jesús ʉ̃i yávaiye méne ji cʉedeca yui ãmeina teivʉre jẽni jacoiñami, jʉ áme Jesúre. Que baru jímacʉpe páyʉbe ʉ̃. 11 Javede ʉ̃i yebacacʉe báquede mʉre, ñai Onésimo cađatebetequemavʉ mʉre. Ʉbenita caride cađateibi mʉre aru yʉre máre. 12 Jacopaiyovaquijivʉ ʉ̃́re mi yebai cojedeca. Copʉ etajacʉ ʉ̃́re yópe mi copʉ ĩ́jʉroepedeca yʉre. 13 Yʉ́capũravʉ bʉoimʉmu caride ji coyʉiye báque boje Jesús ʉ̃i yávaiye méne. Aru yʉ coreóvaivʉ iyede: Mʉ cʉcʉ baru yui, cađatejebu yʉre. Ʉbenita mʉ cʉbevʉ yui. Que baru mautede đaiyʉrĩduvʉ Onésimore, ʉ̃i cʉquiyepe ayʉ yore ji yebai, ʉ̃i cađatequiyepe ayʉ yʉre yópe mi baju cađatejʉroepe yʉre.
14 Ʉbenita yʉ mautede đabevʉ ʉ̃́re ji yebai, mi jʉ aiye jaʉé boje yʉre cãreja. Que baru ʉbevʉ yʉ cađatecʉyʉre yʉre ji cõjeiye boje mʉre. Quénora ʉvʉ yʉ cađatecʉyʉre yʉre mi baju ʉe boje. 15 Ñai mi yebacacʉ Onésimo apenʉmʉ coateyʉ bácʉ bateichʉame mʉre jarʉvarĩ, mi cʉvaquiyepe ayʉ ʉ̃́re bedióva cojedeca aru cainʉmʉa. 16 Caride yebacacʉ bacʉyʉ́ ãmemi ʉ̃. Ʉ̃ máre, majape, jʉ aibi Jesúre. Que baru majecʉpe, maje ʉmʉme ʉ̃. Ʉ̃ pare cađateibi yʉre. Ʉbenita pʉeno baju cađatecʉyʉme mʉre.
17 Que baru mʉ coreóvayʉ baru majare cʉrivʉre Jesucristoque cũinávʉpe, copʉ etajacʉ Onésimore nopedeca mi copʉ ĩ́jʉroepe yʉre. 18 Ʉ̃i cʉe báquede mʉ́que, mʉre ãmeđaru, meađacʉyʉmu yʉ mʉre ʉ̃́re boje. Aru ʉ̃i cʉe báquede mʉ́que, mʉre bojecʉbe đaru, bojeđacʉyʉmu yʉ mʉre ʉ̃́re boje. 19 Yʉ́vacari toivaivʉ ji pʉrʉque. Jãve bojeđacʉyʉmu mʉre. Ʉbenita ãrʉre đaiyʉbevʉ mʉre mi baju bojecʉbe đayʉre yʉre, ji coyʉiye báque boje Jesús ʉ̃i yávaiye méne mʉre. Que baru mʉ́vacari bojecʉbe đaivʉ yʉre mi cʉvaquiyede jãravʉ cũiméjãravʉ baquinóre. 20 Mʉ, jícʉ, maje jʉ aiye boje cũinátʉrʉ maje jabocʉ Jesucristore, cađateni, torojʉre đajacʉ yʉre.
21 Yʉ toivaicõjeivʉ apecʉre iyoca paperayocare mʉre, ji majié boje đacʉyʉre jãve yópe ji jẽniainope, aru ji jẽniainore mʉ́que pʉeno baju máre. 22 Aru meađacajacʉ yʉre cũinátucubʉre, ji cʉquitucubʉva ji jã́cʉnʉquiyede mi yebai. Mʉja jẽniađavʉ Jʉ̃menijicʉque, ʉ̃i etavaquiyepe aivʉ yʉre ãmeina teivʉre jẽni jacoiñamine jocarĩ. Que baru mʉjare jã́cʉnʉiyʉrĩ, napini coreyʉbu yʉ.
Pablo ʉ̃i meaicõjeino Jesúre jʉ aipõevare
(Hch 12.12, 25, 13.13, 15.37-39, 19.29, 27.2; Col 1.7, 4.10, 12, 14; 2 Ti 4.10-11)
23 Épafras meaicõjeimi mʉre. Ʉ̃ máre bʉoimʉme yʉ́que, ʉ̃i coyʉiye boje Jesús ʉ̃i yávaiye méne. 24 Ina apevʉ máre, Marcos, Aristarco, Demas, aru Lucas máre meaicõjeđama mʉre. Caivʉ ina yʉ́que memecaivʉbu Jesúre. 25 Maje jabocʉ Jesucristo mearo đacajacʉrĩ mʉjare bojecʉbeda ʉ̃i me boje. Quénoramu.