Abrahán. . . Babdummad ai

DII Dummad wisad sorbali, abar dulemar gudigunadmala neggwebur, Ur nugadse. Ur, neggwebur dummadga gunoniggi, e negmala yeerdaglege. Auggi, we neggweburgi dulemar gudimaladdi ibmar baigan na e babdummadga imagbuggwa gusmala. Anba Babel neggweburgi deyob imagbuggwa gusmarmoga. Noé, e massi Sem nugadbo, Jehovág arbadii gusmala, auggi Ur ginmalad geb Babel neggwebur ginmaladi, Jehovág arbassurmala.

Dii dummad wisad sorba, 350 años nasadgi, Noé, dule nue Babdummadba nai gudigusadi burgwenoniggi. We sorba birga bogi gwalulenoniggi, massered gwissi be daggedi we sobarnaidgi. Babdummad bur bule we dule binargusa. Onugsalenoniggi Abrahán. Ur neggweburgi na e gwenadganbo gudigusa.

Ibagwengi Jehová, Abrahánga soggali: ‘Ur neggweburgi noo, geb be gwenadgangi banguo, geb neggwebur an bese oyogoedse nao’. We dule, ¿Babdummad sogedba ibmar imasa? Geb, Ur neggweburgi na ibmar niggadi, ¿bela indasa? Eye. Abrahán bela Babdummad sogedba ibmar imas soggua, onugsalenoniggi Babdummad aiye.

Abrahán, Ur neggweburgi bangudgua, abar e gwenadgan eba nadmarmoga. E bab Taré nadmoga. E nig Lot anba eba nadmoga. Geb, e ome Sara anba eba nadmoga, ar sun adi mellegosi. Beedsegi, belagwable owarmasmala Haránse, geb Taré aagi burgwenoniggi. Aunni, bad Ur neggweburgi diggasur gusmala.

Sorba Abrahán, e gwenadgan buraggwa Harángi nodmarbali, geb owarmasmala Canaánse. Agine, Jehová ega soggali: ‘We yala an be mimmiganga uggoe’. Abrahán, Canaán neggweburgi megisa, geb gudigusa urmorneggi.

Babdummad Abrahán bendaggali, geb Abrahán ovejamar buggib niggunoniggi, geb bamalad ibmar durgana, geb dulemar ega arbamalad niggusbali. Auggine, Abrahán, Sara bogwa mimmigandi saddemalana.

Abrahán 99 años niggadgi Jehová ega soggali: ‘An beg soge, be, neggweburmar buggib e babga guoe’. Auggi, Abrahán, Sarabo bad seredmala mimmi nigguega, ¿igi we nabir guoe?