Abrahán Wilubdaglesa

BE DAGGENA, ¿Abrahán ibu imagnai? Esddin ganiggi, e massi iblosoggaliyob daglege. ¿Ibigala we ibmar imagnai? Bin anmar daggoloena igi Abrahán, Sara bogwa nabir mimmi niggusmala.

¿Be ebinsae? Babdummad wemarga sogsa, bemar mimmi nigguoye. Auggine, we ibmar gwen gued daglesulina, ar Abrahán, Sara bogwa bad nue seredgusmalanad. Auggine, Abrahán dina bengussuli Babdummad nabir imagge ibmar gwen gued daglesulidi. Degsoggu, ¿igi we ibmar gussunna?

Babdummad, Abrahánga ibmar sogsad sorba birga gwen nasa. Degiidgi, Abrahán 100 años niggadgi, geb Sara 90 años niggadgi goe niggusmala, nuggusa Isaac. ¡Babdummad na ibmar sogsadi, imasa!

Auggine, Isaac bad yagba gusadgi, Jehová, Abrahán wilubdagge soggali, bule e bensurdibeye. Jehová ese godsa: ‘¡Abrahán!’. Geb Abrahán abinsogsa: ‘¡Anna, an be iddomai!’. Geb Babdummad ega sogsa: ‘Be massi be sue, be massi wargwennagwad, Isaac, geb an bese yar oyogoedse nao. Agine, be massi oburgo, geb ibdurgan anga ogummaggar uglegedyob be anga uggoe’.

¡Abrahán nue buggibiddosa, ar Abrahán na belabelad massi sabe iddoged! Geb be ebinsabalina, Babdummad sogsa Abrahán mimmigan Canaán yargi anbaggumaloye. Ar ¿igi we ibmar gusarsunna Isaac burgwisale? Abrahán agguiddoge inigwale, anba Babdummad sogedba ibmar imasa.

Yarbirse owarmasgua, Abrahán, Isaac edidsa geb agla imasad birgine mesisa. Geb degiidgi esddin onoali e massi oburgwega. Auggine, we ibmar gued iduale Babdummad ángel ese gornoniggi: ‘¡Abrahán, Abrahán!’. Geb Abrahán abinimagde: ‘¡Wegi an gunai!’.

Babdummad soggali: ‘Mer massigwa oaggalogo. Emisgindi an wisi be an bensulid, ar be massi wargwennagwadbela, melle anga uggoye be sogsasuli’.

¡Ibiyob Abrahán Babdummad bensuli! Ar Abrahán dina bengussuli Jehová ibmar soggwen geg imaggedi sadde, geb nabir Isaac gannar odulosale burgwarmalad abargine. Auggi, Babdummad abesulinad Abrahán Isaac oburgwedi; imasa sabbi madduggwagwadgi oveja galegedi, geb Abrahánga sogsa we oveja e gala ogummaggar uggoye, Isaac anar.