Mas gwabbidi

¿BE WISI ibu we dulemar nabba gine wenanai? Hielo ubimaggaled yobi daglege. We ibmar sibbuu daglege, daddaragwa geb burwigwa. We ibmar nabir gullege.

Niigwen gussaale Israel dulemar Egipto gine nosad aggale. Uggubbi yarmar bibbirmagnaid bali gudimala. Wegine mas doggus sanmagsuli, geb dulemar issaggwa sunmaggarmarsunna geb sogdemala: ‘Ar bur Jehová nued imasana Egipto gine gudigu anmar oburgwisan. Agindina, iddolleged bali anmar mas gundidiinad’.

Degsoggu Jehová soggarsunna: ‘Mas bemar gala an obaddoe’. Geb deyobi imasa. Oibosgua Israel dulemar, we ibmar sibbu sibbugana baddisadi daggarmala, geb egidsarmala: ‘¿Ar we ibua?’

Moisés soge: ‘Jehová we mas gunne gala bemarga barmiali’. Geb dulemar we mas onugsasmala MANÁ. Maná madu maddargwa ossigwad yobi gullege.

Moisés dulemar gala soge: ‘Na warwargwen gine gunnoe wilub be sumalo’. Degsoggu, banebane wagdarad bali deyob imagdamala. Geb maná nabba gine besaddina Dad uue gualile, daluddae.

Moisés sogsabali: ‘Mer maná banegidgala sabomalo’. Auggine abar dulemar sabosmalad. ¿Be wisi we igi gusdae? ¡Maná sabolesadi nus biin oiboardae geb sunnasur yabban dabali!

Auggine Jehová soge iddoged irbali, ibagwena, ilabogwa wilub maná wemaloye, ibnergwagi. Geb Jehová soge sabomaloye banegidgala, ar ibgugle gine bar obaddilegosulid. ¡Geb maná iba guglegidgala sabosmargua, adi nus niggussuli geb issaggwa yabban gussurbali! ¡We ibmar dagledisulid baid gusbali!

Birga bali Israel dulemar uggubbi yarmar bibbirmagnaid gine, manábi unnila gundii gusmala.