Moisés aggwa sarsosa

BIRGAMAR nanamai... ¡10 años, 20 años, 30 años, 39 años! Geb Israel dulemar anba yarmar uggubbi bibbirmagnaidgi gudimala. Bela we birgamargi Jehová na e neggwebur aggwemai gusa. Maná wemarga ugmai gusa gunmalaga. Ibgine emar idumai guega mogir wala suid nasisdae, geb muddig emar idugegardi, soo wala suid. Anba e mormar nungussurmarbali geb nag mamarissurmarbali.

Emisgindi Egiptogi nosmalad aggale 40 años gude, gebe aa birgagi nii yolesad gine, gannar Cades sega Israel dulemar nonimarbali. Wegine buggusmarbali 40 años saar, dulemar 12 mergu Canaán neggwebur argaega barmilesgua. Míriam, Moisés e buna, Cadesgi burgwisa. Geb idualed yobi, anba nue igar abured nigbali.

Dulemar dii amiarmargua, dii amissurgusmala. Geb Moisésga urwedgi soggarmala: ‘Bur anmar burgwissunnan nabir sunnana. ¿Ibigar be Egipto neggweburgi anmar onosa negisganase anmar sedagega, geg ibmar gued neg sega? Wegine ibmar gullemalad sadded, higomar sadde, granadamar sadde, geb uvamar ber sadded. Dii gobedgar bela sadded’.

Moisés, Aarón bogwa tabernáculose Babdummad sega gornadmargua, Jehová Moisésga sogsa: ‘Neggwebur be buraggwa oanbaggue. Degiidgi emar asabinni be sunmaggo we aggwa siidga. We aggwa gine issesur dii aryodagoe neggweburga geb ibmar durganga’.

Degsoggu Moisés dulemar buraggwa oanbaggusa, geb sogsa: ‘¡Bemar, dulemar Babdummadgi bengudimaladi nue iddomalo! ¿Aarón an bogwa we aggwagi bemarga dii onosunnode?’. Degiidgi, Moisés suwargi irbo aggwa sarsosa, geb we aggwagi dii binnasur aryoali. Bela dulemar geb ibmar durgan dii niggusmala.

Auggine Jehová, Moisés abin geb Aarón abin saeiddoali. ¿Be wisi ibigar wemar abin saeiddosa? Ar Aarón, Moisés bogwa sogsamalad emala dii aggwagi aryoedga imagmaloye. Auggi ar Jehová bur imasadid. Moisés, Aarón bogwa nueggwa we ibmar sogsasurmar soggua, Jehová sogsa e sega odurdaglemarsunnoye. Babdummad Jehová soge: ‘An imaggosuli bemar an neggwebur Canaánse sededi’.

Sanargussuli Israel dulemar Cadesgi nodmala. Dogdar undar gussuli Hor yarse owarmasmala. We yar birgi Aarón burgwenoniggi. Aa unni 123 años niggad. Israel dulemar nue wileiddobugmala, geb 30 días Aarón binar bodii gusmala. Eleazar, Aarón e massi, sacerdote e dummadga gunoniggi, Israel neggweburga.