Eanbe gaggabo negargaabmala

MASSERGAN ibmar gullemalad gwaad gwismalad. ¡Ibmar gullemalad be dagge! Uva san dag bibbi be dagge. Dulemar warbo abeleged suwargi sedega. Higomar geb granadamar be dagbalina. ¿Bia we ibmar yeer gullemalad daggarmala? Canaán yargi searmala. Be ebinsae Abrahán, Isaac geb Jacob, Canaángi gudigusmalad. Auggine uggud dummad nagusadbali, Jacob e gwenadgan buraggwagwa, Egiptose neg ogwasmala. Emidi, 216 años gussaale, Moisés gannar Israel dulemar Canaánse semabali. Emisgindi Cadesgi gudimala, yarmar uggubbi bibbirmagnaidgi.

Canaán ginmalad dulemar isgana. Agala Moisés dulemar 12 mergu barmisa negargamalaga geb wemarga sogsa: ‘Nue dagmalo bule e dulemar mergudibe, geb bule gangumarbardibe. Geb nue dagmarbalo bule nabba nueddibe ibmar digega. Geb mer ibmar gulleged sedaged iemalo’.

Negargaabmalad gannar Cades sega nonimargua, Moisésga sognonimala: ‘Inniggigwa, negadar nuedi’. Geb nue nabbiraye oyogega, ese ibmar gulleged oyosmala. Auggine negargaabmalad 10 mergudina sogmala: ‘E dulemala burwisurmala geb yeer gangumarbalid. Anmar emar ib neg suye sogele, anmar bela emarse oburgwelemaloe.’

Israel dulemar dobguarmala we ibmar iddoarmargu. Soggarmala: ‘Egiptogi anmar burgwisan bur nuedina, wegi anmar gudiid gindibe, yarmar uggubbi bibbirmagnaidgi. Urwenai anmar burgwesunnoe, anmar omegandi, geb anmar mimmigandi bela galemaloed. ¡Moisés anar, dummad wargwen anmar amisunna, geb gannar anmar Egiptose nae!’.

Auggi negargaabmalad ebogwaddi, Jehová bensurmala, geb neggwebur basuroiddoge imagge soggarmala. Wemar nuga Josué geb Caleb. Wemar soge: ‘Mer dobgumalo. Jehová anmar bali nai. We nabba suega ibgwensur anmarga guoe’. Auggine neggweburdi iddosuli. Agga Josué, Caleb bogwa oburgwebi guarmala.

We ibmar ulale Jehová isdariddoali geb Moisésga soge: ‘Dule 20 años nigdibe, geb aaba obindibe, wargwensaale Canaán yargi dogosuli. Egiptogi geb yarmar uggubbii bibbirmagnaidgi ibmar dagledisulid an imasad agsar dagsamala inigwale, anba angi benmalad. Degsoggu 40 años we yarmar uggubbi bibbirmagnaidgi gaamagdii gudigudmarsunno, bela dulemar an bengusmalad burgwemaladse. Unnila Josué, Caleb bogwa Canaán neggweburse dogmaloed’.