Aarón suwar assudde

BE SUWARGI duddumar geb nurmar gorenanaid be dagge. We suwar Aarón gadi. ¡We duddumala geb nurmar goresnanaidi ibagwen muddig agnisnanaed! Anmar daggoena ibigala deyob gusa.

Israel dulemar suiddi yarmar uggubbi bibbirmagnaidgi gaamagdii gusmala. Moisés dummadga gued abar abesurmala, abesurmarbali Aarón, Israel sacerdote e dummadga guedi. Coré deyob binsaedi geb Datan, Abiram geb 250 mergu e neggweburgi dummaganga gudimaladi, anba deyob binsamarmoga. Bela we dulemar nonimala geb Moisésga soggarmala: ‘¿Ibigala be na bur dumma anmarba imagge?’.

Moisés, Coré gala geb Coré sordaganga soge: ‘Bemar bane wagdaradbali ibmar wawadig yabbanned urbed sunamalo geb aagi ibmar wawadig yabbanned urbemalo. Degiidgi Jehová tabernáculos bemar dago. Anmar daggoed Jehová doa dule suodibe’.

Oibosgua Coré geb e sordagan 250 mergu tabernáculose nonimala. Buggidar bamamalad nonimarmoga wemar bendagmalaga. Jehová nue saeiddoge. Moisés soge: ‘We dule isganamar e dordo negmargi bela bangumalo. Mer e ibmar ei ebumalo’. Dulemar iddosmala; Coré, Datán geb Abiram e dordo negmargi bangusmala.

Degiidgi Moisés soggarbali: ‘We ibmargi be dagmaloe Jehová doa dule suoe. Nabba argadoe geb bela dule isganamar nabba yaba argwanmaloe’.

Moisés sunmagged bergusgua, nabba yog argaar nade. Coré, Datán geb Abiram e dordo negmar geb e ibmarmar, geb dulemar eba gudimaladi nabba yaba argwadsamala, geb nabba gannar addusa. Dulemar nabbayab argwadsamalad binnasur gole iddoarmargua, binnasur na ese goddemala: ‘¡Abarmagmala! ¡Nabbayab mer anmar argwanega!’.

Coré geb e sordagan 250 mergu anba tabernáculo waligga gwismala. Agala Jehová soo barmiali, geb bela we dulemar gummasmala. Degiidgi Jehová, Eleazarga soge, Aarón e massi, ibmar wawadig yabbanned urbed dule burgwismalad gadi suye, geb ibmar daddaragwadga imaggoye, ibmar ogummagged e aglaga. Israel dulemar we ibmar daggarmalale ebinsamaloe Aarón geb e masmalabii unnila Jehová igargi emar idumaladga arbamaloe.

Auggine Jehová dina nue abege magiddo gumalad Aarón, emasmala bogwa sulesmarye sacerdotemarga gumalaga. Agala Moisésga soge: ‘Israel dulemar e neggwebur e dummagana na suwar sedamalo. Ar Leví e neggwebur gaddina, Aarón suwar sedagoedi. Emisgi suwarmar mesmaloe, tabernáculogi, an igar mesisad ulu asabinni. Doa dule sacerdotega guega an suoe, e suwar assuddoe’.

Oibosgu Moisés daggali, ¡Aarón e suwargi duddu assunnai geb nurmar gorenanai! ¿Be dagsa emisgi ibigala Jehová imasa Aarón e suwargi duddu assunnega?