Jesús moli negyab gwalulesa

¿BE WISI we goe, doawa? We Jesús. Moli neg yabali gwalulesa. María, Jesús mesnai, moli mas maed ulu yagi. Auggi ¿ibigala María, Josébo ibmar durgan buggwadse nonimala? Ar goemala gwen neg wegiidgi gwalulegedsulid, ¿insoa?

Suli. Auggine, emar dina, we ibmar ulale, molimar negse nonimala: Dule Romag negdagmaidi, César Augusto, igar mesisa bela dulemar na e neg gwalulesadse namaloye, gardag nug mesegarye. Geb Josédi, Belén neggweburgi gwalulesa. Auggine, José, Maríabo Belénse owarmadabmargua, gabed neg amissurmala. Degsoggu, ibmar durgan gabed neg siidse nae daglearmala. ¡Geb aa ibag, María goe niggunoniggi, Jesús! Auggine, be daggena, goe nueganbii.

¿Be dagsa oveja aggwemalad Jesús sega addagdanimaladi? We dulemar negmuddiggi sabburba gudimalana, geb gwallu mee emar diggarba ganoniggi. ¡Daggargua, ángel gudiina! Oveja aggwemalad nue gwaggismala. Auggine, ángel wemarga sogsa: ‘¡Mer dobgumalo! An bemarga gaya nuegan berbedaniggid. Emi Belén neggweburgi, Cristo, Dule Dummadi, gwalulesa. ¡We dule neggwebur bendaggoedid! Samorgi obibbirmaggar maoe, degine, moli mas maed ulu yagine maoe’. Geb uggiagwale ángelmar buggidar nonimarmogad geb Babdummad nug odummoarmalad. Degiidgi, oveja aggwemalad gwae abarmadmalad Jesús amigega, geb emisgi amidabmalad.

¿Be wisi ibigala Jesús aggala, goe bamaladbo? ¿Be wisi nue doawa? Ebinsao, we garda gebbe nodedgi anmar sunmasad, Babdummad Massi gebe obinyilesadgi. Jehovábo nibneg imaggedgi arbasa geb Nabbaneg imaggedgi, degine, bela ibmar bamalad imaggedgi. ¡We Jesús, aadi!

Jehová na e Massi nibneggi gudiidi Nabbanegse barmiali, geb María e nan gala gunoniggi. Igi goemar bamalad e nangi danidamala, deyobi Jesús e nan gine gwalulenonimogad. Auggine, we goedi Babdummad e Massi. Geb Belén neggweburgi, moli neg yabali gwalulesa. ¿Mag be iddoge emisgi, ibig ángelmar yeeriddosmala dulemar owisoarmargua, Jesús gwalulesye?