Isaac gala ome nued amilesa

WEG sobarnaidgi ome daniggidi, ¿be magdagge? Rebecaye nuga. Abin daggwissid dina Isaacye nuga; Rebeca, Isaac nigguoe. ¿Igi ibmar weyob gunonisunna?

Abrahán, Isaac e baba, ome nued na massiga abege. Abessuli Isaac omegan Canaán ginmalad nigguedi, ar we omegandi ibmar bamalad na e bab dummadga imasdamala. Agala, Abrahán, e maiga gudiidse godsa geb ega sogsa: ‘Haránse be gannar naed an abege an gwenadganse, geb be an massi Isaac gala ome amigega’.

Degsoggu, Abrahán e maiga gudiidi, camellomar waarbe amisa geb diggasur nade. Abrahán e gwenadgan mamaid owarmagbingua, dia nagabali obunnononiggi. Bad negmuddig gubinne, omegan neggwebur ginmaladi dii wedanimala. Degsoggu, Abrahán e maiga gudiidi Jehováse goddesunna: ‘Biddiggi ome anga dii weoedi geb camellomar gala, adi be susan gadina Isaac nigguega’.

Sanar gussuli Rebeca dii wedaniggi. Abrahán maiga gudiidi ese dii egissagua, Rebeca ega dii wesa. Geb sorbali buggidar dii wesbali camellomarga. Dummad alamasa, ar camellomar nabbiragwad dii gobmalad.

Rebeca arbaed bergusgua, Abrahán e maiga gudiidi ese e sergan nug egissali. Geb anba ese egissabali nabir muddiggidba emar negyag obunnosar sogeye. Rebeca abinsogde: ‘An bab Betuel nuga, geb an neggi be nabir megisale’. Abrahán e maiga gudiidi wisi, Betuel, Nacor e massi, geb we Nacor, Abrahán e gwenadi, na bab mesamaladi. Degsoggu, yoggorgi sigwis geb nuedye Jehovága sogsa, Abrahán e gwenadganse e sesadbali.

Aa muddiggidba Abrahán e maiga gudiidi Betuelbo sunmasa, geb Labánbo; Labán dina, Rebeca e susud. Geb Abrahán e mai, wemarga sogsa ibu ular daniggi. Ebober sogsamala Rebeca nabir naye, nabir Isaac nigguoye. ¿Igi Rebeca dina sogsamoga ese egisleargua? Eye, nabimoye sogsa. Degsoggua, oibosgu camellomar birgi naggwismala, geb diggasur nadmarsunna, Canaán neggweburse owarmaggega.

Owarmagdabmargua, bad muddiggi. Rebeca dina daggali massered garmagdii. Daggargua, Isaac garmagdii. Isaac dina yeeriddoali Rebeca daggargu. Sara, Isaac e nana, birga baa gusa bad burgwisad aggale, aaulale Isaac anba wileiddodii. Auggine, emisgindina belabela Rebeca abeali, degsoggu, gannar yeeriddo gunonibali.