Dina boni dummad aminoniggi

¿BE DAGSA, Dina doamarse addagnadabbi? Canaán neggwebur ginmalad yaaganse addagnadabbi. E bab Jacob, ¿bur yeer we ibmar dagsadibe? Be wisguega, be binsaena Abrahán, Isaacbo, igi omegan Canaán ginmaladgi binsadamala.

¿Abrahán, abes be binsae e massi Isaac Canaán gined ome nigguedi? Suli. ¿Isaac, Rebecabo abesmar be binsae e massi Jacob, Canaán gined ome nigguedi? Suli. ¿Be wisi ibigala?

Ar Canaán ginmalad ibmar baigan na e babdummadga imagbuggwa gusmala. Anba dule nuegan surmarbar soggu, e massergan gwen niggued sulid, e omegan gwen omega suedsulid, anba gwen aimar nueganga imagged surbalid. Degsoggua, anmar bensuli, Jacob nued dagsasurmoga e sisgwa Canaán ginmalad ayamar amigele.

Dina, boni dummad amisa. ¿Wegi sobarnaidgi be dagsa we massered, Dina daggwissidi? We massered Canaán ginedi, nuga Siquem. Ibagwengi Dina emarse addagdiidgi, Siquem yamo ebo gabedga imasa, anba Dina abessur inigwale. We ibmar gusadi nuedsuli, ar unnila massergan, geb omegan na niggumamaidbii nabir nabo gabmalad. Weyob Siquem ibmar isgana imasadba, Dina gine dodosgua, agga bur bule neggagalede.

Dina e susmala we ibmar gusad wisgunonimargu, belabela saeiddosmala. Warbogwa, Simeón, Levíbo belabelad saeiddogedba, espadamar anniggi, neggweburgi, uggiagwar emargi dognonimala. Wemala, e gwenadgan buraggwa Siquem oburgwismala, geb bela bamalad massergan oburgwismar bali. Jacob masmala weyob ibmar isgana imasadba, Jacob nue saeiddosad.

¿Ibigala weyob negbeedse guali? Wegi ibmar gunoniggi, Dina, dulemar babigarba dasurmalad e aimarga imasadbali. Anmardi dulemar wegimalad anmar aimarga imagbisulid, ¿insoa?