Jericó muro

¿IBIGALA Jericógi muro maid ayaride? Birgi bomba dummad argwadsayob daglege. Auggine ar aa ibagan gindi bombamar saddenad; ar gingimar saddebalinad. ¡Jehová gannar ibmar dagledisulid imasbali! Anmar daggoena igi we gusa.

Be iddogena igi Jehová, Josué gala soge: ‘Be soldadomar buraggwa be nae, neggwebur ebirnamalo. Ibnergwa neggwebur ebirmalo; ibagwengi unnila irgwen ebirar. Bab igar mesisad ulugwa sedmalo. Egugle sacerdotemar Bab igar mesisad ulugwa semamaid iduar namalo, geb wemar gar ogormaloedid.

‘Iba gugle gindi irgugle mergu neggwebur ebirmalo. Degiidgi suiddi gar ogormalo, geb belagwable urwesoggaliyob binnasur gormalo. ¡Geb muralla maid ayaridoe!’.

Josué geb bela neggwebur ginmaladi Jehová ibmar sogsadba imasmala. Neggwebur ebiridmargua, bela boo nadabmalana. Unnilagwa gar goledbii iddollege geb neggwebur ebirnanaid e nag goledbii iddollebali. E isdarmalad, Jericógi bugmaladi, dobguarmalar gebed. ¿Be dagsa dub ginnid ventanagi bannubannu naidi? We ventana ¿doa gadi? Nabiri, Rahab, negargamalad sogsadbali ibmar imasa. Bergwable e gwenadganmala buraggwa we negyab bugmala, dagbugmala igi neggudodibeye.

Degiidgi nabbis, iba guglegi, irgugle neggwebur ebirisadgi, gar ogollede, binnasur urwemaladi goddemala geb muralla maidi ayaride. Josué soge: ‘Dulemar oburgwemala, geb bela neggweburdi geb e ibmarmardi ogummagmalo. Unnilagwa mer ogummagmaloe: mani, olo, esnun, geb esgoro; we ibmarmardi tabernáculo gine sabolegoed’.

Dulemar warbo negargamaladgardina Josué soge: ‘Rahab negse namalo, Rahab onomalo geb bela e gwenadgan onomarbalo’. Negargamalad ega ibmar sogsad yobbiragwa, wemar bendaglesmala.