Jerusalén muro

¡BE DAGGE, yeer gangu weg arbalenai! Israel dorgan Jerusalén muro sobnanai. Nabucodonosor Jerusalén obelosad aggale, 152 años gusa, aunni e muro earilesa geb neggwebur wagagmar ogummaglesa. Auggine Israel dorgan Babiloniag gudii nonimargua, abgayala muro gannar sobsasurmala.

¿Igi iddodii gusmar be binsae bela we birgamar nasadgi, e neggwebur muro sadde gudigusmaladgi? Dobgubuggwa gusmala. E isdarmalad ibigwensur egi dogsamalale. Auggine emisgindi we dule nononiggi, nuga Nehemías. Nehemías, dulemar bendaggali Jerusalén muro gannar sobedgi. ¿Be wisi, we Nehemías doa dule gue?

Nehemías, Israel dule, Susa neggweburgi daniggi, Mardoqueo Ester bogwa aa neggweburgi gudimarmoga. Nehemías rey neggi arbaena, degsoggua Mardoqueo ai nued gusar gebed, geb anba Ester ai nued gusbalir gebed. Auggi, Bibliadi sogsuli, Nehemías arbasdeye rey Asueroga, Ester sui. Bur arbasgusa rey sorba megnoniggidga, rey Artajerjes gala.

Ebinsao, Artajerjes rey nuedi, Esdrasga mani buggidar ugsa gusadi, Jerusalénse sedega geb Jehovás goled neg nudaggega. Auggi Esdrasdi neggwebur e muro ayarisadi, sobsasuli. Anmar daggoena igi Nehemías we ibmar imaggedgi dognonimosunna.

Artajerjes, Esdrasga mani ugsad aggale Babse goled neg nudaggega, 13 años gusa. Emisgindi Nehemías, reyg nog dagged dummadga gue. Reyg vino eyogedgi arbae, geb ise daggagwale gudidae, abaggale ina nusu egi eyolesale. Degsoggu, we arbaedi binsa yogasaaled suli.

Degine, ibagwengi Hanani, Nehemías gwenad daniggi dagleali bamalad dulemar Israel neggwebur ginmaladbo, Nehemías sega addagdanimala. Geb we dulemar Nehemíasga soggarmala, Israel dorganga negibigwensur gusurye, geb Jerusalén muro anba ayarar mellediye. Nehemías wileiddoali, geb Jehová sega godsa we ibmar ulale.

Ibagwengi rey daggali Nehemías wileiddoge, geb ese egissali: ‘¿Ibig be wileiddoge?’. Nehemías ega soge, Jerusalén sunnasur daglesiye, e muro ayarisad barye. Geb rey ese egissali: ‘¿Be ibu abesunna?’.

Nehemías rey abinni soge: ‘Jerusalénse be an barmide, an nabir gannar muro sobega’. Artajerjes dule nued dae. Degsoggu Nehemíasga soge be nabir naye, geb ega urgomar amisbali nabir muro soblegega. Jerusalénse owarmasad sorba, Nehemías bela neggweburga sogsa ibu imagdaniggi. Bela dulemar nabir iddomala, geb sogmala: ‘Anmar arbaed onodoye’.

Israel dorgan e isdarmaladi daggarmargu, muro onaglemai, soggarmala: ‘Anmar emar oburgwenamala, mer bar muro soblegega’. Nehemías we ibmar wisguargua, bela arbananaidga espadamar geb lanzamar uggeugge imasa, degine, wegi emarga sogsa: ‘Mer dobgumalo. Bemar gwenadgan ulale urwemalo, bemar mimmigan ulale, bemar omegan ulale, geb bemar negmar ular’.

Dulemar bulegana. Ibginedba geb muddiggidba guaggwa gudidamala, geb arbaed indassurmala. Degsoggu, unnila 52 días gine, muro soblegedi obelolenoniggi. Emisgi neggweburgi dobsuli nabir gudigumala. Degine, Nehemías, Esdrasbo Babdummad igar odurdaggarmala, geb neggwebur yeeriddo buggwa gusa.

Auggine, neg naid, Israel dorgan Babiloniag galebuggwa gusad idualedyob suli. Persia rey emisgindi negdagmai, geb bela neggwebur we rey e maig gue daglearmala. Auggine Jehová sogsa gusa rey gwabbid barmidagoye, geb we reydi negboogwad neggweburga sedagoye. ¿Doagi we rey? ¿Igi negboogwad sedagoe Nabbanegga? We igar durdagleged iduale, 450 años saar nanasgwele. Geb ibmar bur birigined gunoniggi, goe gwalulenoniggi. Auggi we ibmar gusaddi, igar gwabbid gubali.