Niisgwa ganaidba nadabmala

¿BE DAGSAMOGA niisgwa binnasur ganaidi, we dule aasig goo suui oyosiid? We dulemar Jerusaléngi noarmargua, niisgwa dagleali. We dulemar Dad Naggwedsig danimala, geb niisgwamargi nergumaladi. Binsamala we niisgwa gwabbidi, dule dummadse emar semaye.

Jerusalénse oarmasmargua, egisdabmala: ‘¿Bia massigwa judíomar reyg guoed mai?’. Israel dorgan “judíomarye” nabir bilebali. ‘Anmar e niisgwa insogi dagsa Dad Naggwedsig’, we dulemar soge, ‘geb asabin sindigar sigeg anmar daniggi’.

Deunni Jerusaléngi rey Herodes neg dagmai, geb we ibmar wisguargua, surbinsa iddoali. Abesuli dule baid e anale reyg meged. Degsoggu, sacerdotemar e dummaganse egidsali: ‘¿Bia reyg guoeye soglesadi gwalulegoe?’. Sacerdotemar abinsogdemala: ‘Bibliag soge Belén neggwebur ginye’.

Degsoggu Herodes sogsa dulemar Dad Naggwedsigmaladga: ‘Massi bibbigwa be aminamalo. Geb be amismalale, be an owisomalo. Asabin sindigar an signabimoga’. ¡Auggine, Herodesdi bur we massigwa oburgwebiena!

Degiidgi, niisgwa we dulemar asabinni agbanmai gusa Belén neggweburse, geb nagunoniggi massi bibbigwa gudiid neg inniggi. We dulemar negyabali dogsamargua, daggarmala María sii, degine, massigwa Jesús. Geb ibmar Jesúsga ugsamala. Auggi sorbali, Jehová gabgine we dulemarga sogsa mer bar Herodes sega namaloye. Degsoggu, igar baid bali na e neggweburse nadmarsunna.

Herodes wisguargua dulemar nadmarye, saeiddoali. Geb igar ugsasunna, goe massimala Belén neggwebur ginmalad, birgabo agguar nigmaladi geb birgabo nigmaladse, bela oburgwelemaloye. Auggine, Jehová gabgin José owisosa iduaggwa, geb José na gwenadgan sesa Egiptose. Sorbali, José wisguargua Herodes burgwisye, gannar Nazaretse, María sesa geb Jesús sesbali. Degsoggu, Nazaretgi Jesús dunguarsunna.

¿Doa we niisgwa gwabbid binnasur ogasad be binsae? Ebinsao, we dulemar gebbeun niisgwa daggarmargua Jerusalénse arbimargwele. Nia, Babdummad Massi oburgwebiena, degine, wisbalina rey Herodes Jerusaléngi negdagmaid, we massigwa oburgwebi gudamogoe. Degsoggu, Nia imasar gebe we niisgwa binnasur gaedi.