Angelmar, Babgi agbiddemalad
Nia, nagbe sunmaggeyob imasgu, Evabo sunmaggega, aunni Eva Babgi agbidsamogad
Jehova, angelmar imasgu bela nueganbiinad. Auggi, angel wargwen isguded. Wee, Satanasga gusad. Satanas abealid dulemar e sogedba igar imagmalad. Anmar daggoena igi neg gusa.
Edengi, neg yeer dagle nagusadgi, sabbimar buggib sanmagbuggwanad, mas nuegananad. Jehova, Adanga sogsad, geb Evaga sogsabalid, we ibmar bemar masga guoye. Auggi, Jehova sogsabalid sabbi wargwen gwisye, adi mer gunmaloye. Bemar gudsale, bemar burgwemaloye (Génesis 2:9, 16, 17).
Ibagwengi Eva walagwen gudigua, nagbe, Evaga sunmasad. Auggi, anmar wisid nagbe ega sunmassulidid, Satanas yamo nagbe sunmaggeyob imasad. Nia, Evaga sogsad, sabbi mer gunnoye beg soglesad be gudsale, be, Bab Dummadyob nue ibmar wisi gumogoye. Be burgosurbarye. Weyobi Nia, Evaga gaggansasad. Evadi agga Nias binsaed galesad, sabbi san gudsad. Sorba Adanga ugsamogad, Adan abin gudsamogad (Génesis 3:1-6).
Weyob neg gusadba anmar wisid, Nia, Babba igar saedsuli, gadi gaggansabali. Nia, Evaga gaggansasad; Evaga sogsad, be, Babba igar sasulile be burgosurye. Auggi Eva burgwisad, Adan burgwismogad. Aaun Niadi burgwissulid, ar Nia ibmar isgana imassoggu anba burgwemogoed. Emidi anba gudisoggu anba dulemar yardagdiid. Anba gaggansaed indagdisulid, alamagnaid dulemar mer Babba igar imagmalaga (Juan 8:44).
Angelmar bamalad Babgi agbidsamarmogad
Sorba angelmar bamalad isgudmarmogad. Angelmar daggarmalad omegan nabbaneggi buggwadi yeer daglemala; omeganbo galagwensur guega nabbanegse agdenonimalad. Aaga nabbanegse nonimargu sanar gunonimalad, masserganga na san imagnonimalad. Geb na omegan egad egad sunonimarbalid. Jehova we ibmar imaggega angelmar imassulinad (Génesis 6:1, 2; Judas 6).
Angelmar isganamala omeganbo galagwensur guega agdenonimalad
Weyob neg imasmaladba dulemarga dummad neg oisgunonimalad. Angelmar omegan, mimmigan niggudmargu e mimmigan burwisur dungudmalad, sabsur dulemar imaggarmarbalid, geb isgana dummaganga gusmarbalid. Degsoggu nabbaneggi dulemar bela belad isgudsunnad. Aaga Jehova, dii dummad owisad dulemar isganamar obelogega. Neg dogsagu unnila Noe, geb e negyagginmaladbii bendaglesmalad, ar wemarbii dulemar nuegananad (Génesis 6:4, 11; 7:23).
Angelmar isganagandi burgwissurmalad, gannar burbar gusmalad. Bar angelmar nuegan abargi gudi gussurmalad. Uggine geg bar sanar gue, Jehova, angelmar isganagan imasbalid. Yoo neg nugudele oburgwilemarmogoed (2 Pedro 2:4; Judas 6).
Nia nibneggi onolesad
Satanas nibneggi onolesgu, angelmar isganamar onolesmarmogad
1914 gine urwed dummad nibneggi nosad. Bibliagi soglenaid igi ibmar gusa: “Nibneggi urwed dummad nagunoniggid: Miguel [Jesus], degi, Miguel e baliwiddurmar [angelmar nuegan], assu simudubaled [Satanas] ebo urwenai gusad. Assu simudubaled, degine, Assu simudubaled e baliwiddurmar [angelmar isganamar], abin imagsamarmogad. Degi inigwele, wemar, urwenanaidgi gwen Miguelgi naggwissurmalad. Degisoggu, nibneggi onolesmarsunnad. Degidbali, assu simudubaled dummad barmelledsunnad. We assu simudubaledde nagbe gebe sagladid, nia sagla Satanasye nugad. We nia sagla Satanas, dulemar bela nabneg naidgi yardagdiid duled. We assu simudubaled we nabnegse egwadlenonisunnad, e baliwiddurmar bela eba egwallenonimarmosunnad”.
¿Igi nibneggi neg gusa? Bibliagi soglenabalid: “Degisoggu, nibnegmar be wergumar. Bemar, nibneggi bugmalad, wergumarsun”. Degsoggu, angelmar nuegan yeer iddodmalad, ar Nia, geb angelmar isganamala nibneggi onolesmalad. ¿Igi nabbaneggindi neg gunonimosunna? Bibliagi soglenabalid: “Bemar, nabneggi bugmaladdi, demargi bugmaladdi, ¡be duledar wilesmar! Ar ade, bemarse nia sagla nue urwedigine agdenoniggid. Ar nia saglade na wisid, e ibagan issee nabbi naid” (Burbar-Oyolesad 12:7-9, 12).
Degsoggu, Satanas, dulemar yardaggedgi arbadiid, geb angelmar isganamar aagi arbadidimarmogad; neg oisgudidimarbalid. Angelmar isgusmaladi we niamalad, serganga na imagdidiid, dulemar burgwismaladga na imagdidiid. Wemar Jehova e isdarmaladid, bela isganamarbiid.