Ibmar nuegan gusoggalid

Satanas, geb niamar bamaladi bar undar dulemar yardagdii guosurmalad. Jehova bad nabbanegse niamar barmeddealid (Burbar-Oyolesad 12:9). Undar nabsulid gannar niamar oiddobaloed. Apostol Juanga neg burgan oyosgua, Juan sogsad: “Nibneggi baliwiddur (angel) wargwen aidedani an dagsad, burba isgana ambiggued e yaa dummad e yabe sedaniggid. Degine, e argangi esgoro dub dummad sedanibalid. A baliwiddur (angel) assu simudubaled ganoniggid. We, nagbe seredid, nia sagla Satanas gued. A gasgua, birga miligwen edidsad. Geb degi, burba isgana ambiggued e yaa dummad siidgi medded. A yaa nue sagdigar edisad, adi, assu simudubaled melle bar dulemar yar baid baidgi bugmalad yardaggegar. Birga miligwen guedse edisad. A sorbali, assu simudubaled issesaar wis gannar esiglegoed” (Burbar-Oyolesad 20:1-3). Yoogi, Satanas, geb niamar bamaladi obelolemaloed (Burbar-Oyolesad 20:10).

Dulemar isganagan anba obelolemarmogoed (Salmo 37:9, 10; Lucas 13:5).

Dulemar burgwismalad gannar durgudamaloed

Niamar galesad sorbali, Jehova buggib ibmar nuegan dulemarga imadoed. Mer iego, burgwismalad gudisurmalad, ibmarga gussurmarbalid. Jesus sogsad, burgwedi gabedyobye... gabdagmasuli ise gabar megedyobye (Juan 11:11-14). Jesus weyob sogsad, ar edi wisinad burgwismamaid ibagwengi gannar durgudamaloe, gabmaiyob mamasoggua gannar addagdamaloed. Bibliagi soglenaid: “We dulemar bensurmalad, dule nuegan burgwismaladi, dule isganamar burgwismaladi, gannar ega durgued ibagan noniggoye” (Gusmalad 24:15).

Burgwismalad nabbaneggi gannar durgunonimaloed. Yoogidse bar soglenai guosulid, dule burgwisye; bur yeer iddoged abargi soglenai gudoed, dule durgusye. ¡Yeer iddolledoed, dulemar anmar na gadi binar gusad durguarmalar, geb anmar na abindaggwissi guder!