Lección 10
¿Igi dule daedi Bab Dummad istar dake?
Ibmar soggwen ichakwaye Bab Dummad sogele, ¿igi bedi dakmogoe? (1)
¿Bitimar galagwensur daedi ibmar isgana gumala? (2)
¿Cristo sordamar igi dakoe gakansaed? (3) ¿Geb mani binale dodoged? (3) ¿Geb atursaed? (3) ¿Geb sabsur emar saed? (4) ¿Geb anger isganamarbo sunmaked? (5) ¿Geb mungued? (6)
¿Igi nabir be indasale ibmar isgana imaked? (7)
1. Bab Dummad gala arbamaladi ibmar nuegana binarmala, aukine amba durdakmarbalir gebe ibmar isgana istar daked. (Salmo 97:10.) We obare, Bab Dummad sogele ibmar soggwen ichakwaye, we ibmar anmar ichakwa dakmogoe. ¿Bitimar abar we ibmar gusunna?
2.Galagwensur daed: Bab Dummadi nued daksuli: dule na yoo nikumalad iduale ebo gabedi, abirgin nika dikar bali amigedi, ibdurgan bogwa galagwensur guedi, na e gwenadgan gine aibinedi geb omegiid gala na san saedi. Bela we ibmar imaklemaladi, Bab Dummad igar gine dummad yolemaladi. (Levítico 18:6; Romanos 1:26, 27; 1 Corintios 6:9, 10.) Machered ome bogwa gudi dibe lei gine na nue nikussurmala, bur na indakmaloe; sulir dina, lei gine na nikumaloe. (Hebreos 13:4.)
3. Gakansaed, mani binale dodoged, atursaed: Bab Dummad Jehová wissur gakansae. (Tito 1:2.) Degisoggua dulemar Bab gala arbabiele mer gakansamarmogar gebe. (Proverbios 6:16-19; Colosenses 3:9, 10.) Belagwable mani binale dodogedi bur bule mani nikubie dule imake. Aa gala Cristo sordamar wissur dodoge loteriagi, bingogi, moli yardakedgi na mani gamaladgi geb bela ibmar wegimaladgi. (Efesios 5:3-5.) Amba atursasurmar bali geb ibmar atursalegarye wisile yogsaar baksurmar bali, ibmar egicha suli yogsaar sedosurmar bali. (Éxodo 20:15; Efesios 4:28, Bab Dummad Jesucristoba Igar Mesisad Garda.)
4. Galesuli urwed geb sabsur emar saed: Galesuli urwedi, sabsur emar imaked sega sun oarmake. (Génesis 4:5-8.) Sabsur emar imakmaladi Bab Dummad ai gala geg gumala. (Salmo 11:5; Proverbios 22:24, 25.) Dule wargwen akar anmar imaksale, nued suli anmar abin samogadi. (Proverbios 24:29; Romanos 12:17-21.)
5. Emar gine ina isgana imaked geb anger isganamarbo sunmaked: Abar dulemala burbarmalad sega gordamala e bendake gala bonigan nudakega. Bamalad dina e istarmalad gine ina isgana imakmala, ega boni dake gala, o iblogegar dibe. Bela we ibmar imaklegedi Nia gine daniki. Degisoggua Cristo sordamar we ibmar imakedi abelesuli. (Deuteronomio 18:9-13.) Ina isgana mer anmar gine nague gala, anmar Jehová gine walika guer gebe. (Proverbios 18:10.)
6. Mungued: Vino iche gobedi, serbesa dibe o sisa dibe, ichakwa suli. (Salmo 104:15; 1 Timoteo 5:23.) Aukine Bab Dummad nued daksuli wilup obicha gobedi o munguedi. (Romanos 13:13, Bab Dummad Jesucristoba Igar Mesisad Garda; 1 Timoteo 3:8.) Wilup obicha gobedi sun boni gala be san gala gue, geb neguya beibe sun oisgubali. Amba ibigwensur bamalad ibmar isgana imake sun be imakbali. (Proverbios 23:20, 21, 29-35.)
7. Bab Dummad ibmar ichakwaye soged imakdimaladi, “Bab Dummad e reino gine dogosurmala”. (Gálatas 5:19-21.) Be nue napira Bab Dummad sabele geb nued be daked be abegele, ibmar isgana imaklemalad gine nabir be nosale. (1 Juan 5:3.) Ibmar ichakwaye Bab Dummad sogedi, istar dake gued be durdake. (Romanos 12:9.) Dulemar Bab igar wisi damalad bali be akae. (Proverbios 13:20.) Anmar sordamar undargus Cristo bali nai gudimaladi nabir anmar bendake. (Santiago 5:14.) Degine, Bab Dummad sega anmar golele Bab Dummad anmar bendakoe, wee anmar bendaked bur birigined gala gue. (Filipenses 4:6, 7, 13.)
[Picture on page 20, 21]
Bab Dummad istar dake mungued, atursaed, mani binale dodoged geb sabsur emar saed