Babdummad Aimala Ibmar Isgana Imagsurmala

Nia anmar wilubdagdae anmar ibmar isgana imaggegala. Babdummad ai gala anmar gubisundibe, Jehová ibmar isdar daggedi anmar isdar dagmogar gebe (Salmo 97:10). Anmar daggoena ibu ibmarmala Babdummad aimala mer imagmaloe:

Galagwensur daed. “Mer be na abirgunagwarsuli negsidsigi be yolemalo” (Mateo 5:27). Anba nuedsurbali nue na yoo niggumala negsidsi gine nanadidiile (1 Corintios 6:18).

Mungued. “Munguerbamalad [...] Babdummad [“reino” gine, NM] gwen dogosurmalad” (1 Corintios 6:10).

Emar oburgwed geb goe osuloged. “Mer dule-oburgwemaloye” (Marcos 10:19).

Addursaed. “Mer addursamaloye” (Romanos 13:9).

Gaggansaed. Jehová isdar dagge “gwabin gadi gaggansaed” (Proverbios 6:17, NM).

Sabsur emar imagged geb sae iddoged geg bargaed. Jehová “isdar dagge dule sabsur daed binalerbad” (Salmo 11:5, NM). “Dulemar na e-san-ibmar sabiedba damaladi, weyob damalad: [...] sae-ibmar-iddomalad” (Gálatas 5:19, 20).

Mani binale dodoged. “Maniginbi binsadiid [...] dulemarba mer be aggamarye” (1 Corintios 5:11).

E dule sulid isdar dagged. “Be-isdarmalad be sabgumar, [...] degi, be-baregindimaladga Babdummadse ega be gormar” (Mateo 5:43, 44).

Babdummad anmar gala ibmar sogdae anmar gala ibmar nued gue gala. Ibigwensur gusuli ibmar isgana abin obanedi, auggine Jehová geb e gine Sunmagmaladi nabir be bendagmala, Babdummad ibmar isdar daggedi mer be imaggegala (Isaías 48:17; Filipenses 4:13; Hebreos 10:24, 25).