Lección 13

Igi be nabir amisale biti mision napirag wadi

¿Sogbigwa misionmar nikadi Bab Dummad nued dake? (1)

¿Ibigala yaisuli misionmar Cristo sordaye sogmaladi? (2)

¿Igi be mag daksale, doamala Cristo sordamar napiramaladi? (3-7)

1. Mision Cristo sorda napiragwadi Jesús unnila soggwenna sisa. Degisoggua, emi iba gine unnila soggwenna nikar gebe dulemar napiragwad bali Bab Dummad Jehová sega gormaladi. (Juan 4:​23, 24; Efesios 4:​4, 5.) Biblia odurdake unnila ichegwa dulemar nadapye igar warakwagwad bali. We igala sadegu gudigued sega dule semai. (⁠Mateo 7:​13, 14.)

2. Biblia iduakwa sogsa dulemar Jesús nug gine barmilesmalad burgwed sorbali, binna binna Cristo sordamar bukmalad gine dogmai guoye, ibmar odurdakleged napirasulidi geb ibmar imakleged Cristo sordamargad sulidi. Dulemar nodagoe, Bab Dummadba nanaid ebipidii gumaladi e sorbali geb Cristo gine emar obangumaladi. (Mateo 7:​15, 21-23; Hechos 20:​29, 30.) Aa gala misionmar Cristo sordaye sogmaladi yaisuli anmar dake. ¿Igi anmar mag daksale doamala Cristo sordamar napiramaladi?

3. Ibmar soggwen bur birigined Cristo sordamar napiramaladi nikadi, adi muchup muchup nagi sabed nue nikmaladi. (Juan 13:​34, 35, Bab Dummad Jesucristoba Igar Mesisad Garda.) Odurdaklegarsurmala dule bamalad gine o wagmar gine na dummarba itogoye. Amba odurdaklegarsurmar bali yarmar baidsik bukmalad istar dakodeye. (Hechos 10:​34, 35.) Aa ulale neggweburmar nabo urwealile eba wissur akamala. Cristo sordamar napiramaladi na muchup muchup susmar yobi o bunmar yobi na dakmala. (⁠1 Juan 4:​20, 21.)

4. Baid ibmar oyobalidi biti mision napiragwadi, adina belagwable e sordamala Biblia bela bela dodoakwa daksurmala. Bab Dummad Gaya Burba narmakaled gue dakmala, geb bensurmar bali. (Juan 17:​17, Bab Dummad Jesucristoba Igar Mesisad Garda; 2 Timoteo 3:​16, 17.) Bab Dummad Gaya Burba narmakar maidi bur birigined emar gardina gue, dulemar e binsaed o dulemar ibmar imaked bali. (Mateo 15:​1-3, 7-9.) Bane bane gudiid gine bela eba daed gine binsamala. Degisoggua na ibmar odurdakdiid bali damar bali. (⁠Tito 1:​15, 16.)

5. Mision napiragwadi Bab Dummad e nuga odummobaloe. (Mateo 6:⁠9.) Jesús emar gala sogsa Bab Dummad e nuga Jehováye, geb Cristo sordamar napiramaladi deyobi imakmarmogoe. (Juan 17:​6, 26; Romanos 10:​13, 14.) ¿Doamala be neggwebur gine Bab Dummad nug gine sunmakmala?

6. Cristo sordamar napiramaladi Bab Dummad e Reino gine sunmakmala. Jesús we imaksa. Sunmakalile Reino gine sunmakar dae. (Lucas 8:⁠1.) Ukinbali, e sapingan barmisbali bela neg dirbimakale we igar gine emar gala sunmakmalaga. (Mateo 24:14; 28:​19, 20.) Cristo sordamar napiramaladi binsae, unnila Bab Dummad e Reinobii neg boogwadi geb dobed suli gudisaedi Napaneg sega sedagoye. (⁠Salmo 146:​3-5.)

7. Jesús e sapingana we neg isgusnaid e sordasurmala. (Juan 17:16.) Politika igar bali wissur akamala geb na dulemar gobiernobo gachimakna gualile, eba akasurmar bali. We neg isgusnaid e ibmar imaked bali geb e daed bali, dasurmala. (Santiago 1:27; 4:⁠4.) Bela wegi daedi Cristo sordamar napiramalad gadi. ¿Be dakdii be neggwebur gine mision soggwen bela we ibmar imakedi?

[Picture on page 26, 27]

Cristo sordamar napiramaladi muchup muchup nagi sabed nikmala, Biblia dodoakwa daksurmala geb Bab Dummad e Reino gine sunmakmala