Lección 15
Anmar dule bamalad bendake Bab Dummad ibmar abeged imakmalaga
¿Ibigala be sunmakoe be ibmar durdaknaid gine? (1)
¿Doamar gala be nabir sunmaksale ibmar nuegan danikoed gine? (2)
¿Igi be daed gine dule bamaladi be nabir bendaksale? (2)
¿Ibu be imaked abelege, nabir gwenadgan bali noe gala Bab igar gine sunmakega? (3)
1. Bat be bukidar Biblia gine ibmar nuegan naidi durdaksa. We ibmar be wisgusadi, nabir be bendake Cristo sordamar yobi be dae guega. (Efesios 4:22-24.) Ukinbali, we ibmar be wisgusadi nue abelege, sadegu gudigued nikuega. (Juan 17:3.) Aukine ibmar nuegan danikoedi dule bamaladi itoged abelemoga, nabir bendaklemalaga. Belagwable Cristo sordamar napiramaladi emar gala sunmakmaloe we igargi. Bab Dummad we igala uksa. (Romanos 10:10; 1 Corintios 9:16; 1 Timoteo 4:16, Bab Dummad Jesucristoba Igar Mesisad Garda.)
2. Dulemar be walika gudimalad gala be nabir sunmake ibmar nuegan be durdaknaid gine: be gwenadgan gala, be aimar gala, be sordamar esgwelaginmalad gala geb bebo arbamaladga. Mer urwed gine be sunmakoe, bur itoakwa be sunmakoe. (2 Timoteo 2:24, 25.) Ar be nue wisi, dulemala bur atakdae emar daed gine, e sunmakedgindina suli. Degisoggua, be nued daele dule bamaladi nabir be itosale. (Mateo 5:16, Bab Dummad Jesucristoba Igar Mesisad Garda; 1 Pedro 3:1, 2, 16.)
3. Degine, undarad gine be sun nabir nodabmogoe gwenadgan Jehová gine sunmakmalad bali, Bab igar gine sunmakega. Aukine, igarmar mamaid bali bin be gudigugweloe. Be aa sega oarmaksale, be nue nasgusye soglegoe. (Mateo 24:14.) Be nabir dule wargwen bendaknonisundibe, geb we dule Jehová gala arbaed gala gunonisundibe, degine, sadegu gudigued sega oarmaksale, ¡ibiyob wergued dummadile! (1 Tesalonicenses 2:19, 20.)