LECCION 22
¿Igi be nabir Bab Dummad ibmar nuegan imaggoedgi sunmasmogale?
Bab igar durdagmaidba sun be binsadaged: “¡Bela dulemar we ibmar wisgued abeleye!”. Eye, bela dulemar we ibmar wisgued abeleged. Auggi, sun be dobe emarga Bab igargi sunmagbaliled. Wegine be durdaggoed, igi be nabir dobed osulosale, yeer iddogedgi Jehova ibmar nuegan imaggoedgi sunmaggega.
1. ¿Igi be nabir be ibmar durdagnaid emarga sogsamogale?
Ebbenne Jesus sabbingan weyob sogsamalad: “Anmar sunnad na ibyagwar ibmar dagsamarsoggu, degi, an uayagwar an ibmar iddosmarsoggu, geg sogsuli an gumalad” (Gusmalad 4:20). Jesus sordagan ibmar nued durdas na iddosmarsoggua, aagala, bela dulemarga aa ibmargi sunmagbi guarmalad. ¿Be ibmar durdagnaid be emarga sogbidamoga? Degiile, nabir be igar amismogaled, be gwenagangardibe, be aimargardibe aa ibmargi sunmaggega, auggi, mer sabsur emarga ibmar sogdabalo (Colosenses 4:6 absogo).
Nabir be weyob imagsaled
Be gwenaganga nabir be weyob sogsaled: “We iddogedgi an ibmar nued durdasad”.
Be ai wargwen uelemadibe, buggib binsadidibe, ega be nabir Bibliagi ibmar soggwen absosaled.
Be sordagan beg soggardibe, fin de semanagi ibu be imasmoye, Bibliagi ibmar durdasadgi nabir be sunmagged, igar iddogedgi ibmar durdasadgindibe.
Nabir be aimarse be sitio jw.org oyobalid.
Nabir be emarga sogbalid, be Biblia durdagbimo sogeye, sulirdina be ega sogoed nabir be jw.org gi egisye, an Biblia durdagbimoye.
2. ¿Ibigala be anmarba Bab igargi sunmagnaedgi binsaer nuedmogale?
Ebbenne Jesus sordagan unnila e gwenagangarbi, geb e aimargarbi Bab igargi sunmassurmalad. Bibliagi soglenaid, Jesus, ‘e naoed neggweburmarse ebo ebo e iduar e sordagan barmisye’ Bab igargi sunmagnamalaga (Lucas 10:1). Weyob igar nigga Bab igargi sunmagdi gusmaladba aaun nabir buggidar dulemarga Bab igargi sunmaglesad. Na ebo ebo Bab igargi sunmagdi gusmaladba Jesus sordagan yeer iddosmarbalid (Lucas 10:17). Degsoggu, nuediled ibagwengi be anmarba Bab igargi sunmagnaedgi binsamogar.
NUEGGWA WE IBMAR DURDAGMARGOLO
Wegine be durdaggoed, igi nabir be dobed osulosale, yeer iddogedgi Bab igargi sunmagdi gumogaga.
3. Jehova be bendaggoed
Abar dulemar Bab igargi sunmagnabi gualile, binsaardamarbalid, igi dulemar an nig soggarmalardibeye.
Bedina, ¿be dobe emarga Bab igargi sunmagdamoga? ¿Ibigala?
VIDEO dagmalo, we ibmargi sunmagmarbalo:
Igi videogi soglenai be dagsa, ¿nusganagan ibu imasmala mer dobe emarga Bab igargi sunmagmalaga?
Isaías 41:10 absomalo, we ibmargi sunmagmarbalo:
Be dobe Bab igargi sunmagdaele, ¿ibigala nuedile be Bab Dummadse goler?
¿Be wisina?
Abar anmar sordagan ebbenne binsasmarmoganad, andi an bibbisaar Bab igargi sunmaggosur guoye. Sergey deyob gusad, gadi bingegguedbali, dobe emarbo sun magdaenad. Ibagwengi anmar sordaganbo Biblia durdaggalid. Sergey soged ed binsaarye: “An dobe sunnmagdae inigwale, auggi an we ibmar emarga soged abelemoye. Sergey sogbalid, dule bamaladga ed we ibmargi sunmaggargua, egala dobed bergudye, geb edega bur bule Bab igar durdadbarye”.
4. Mer sabsur emarga ibmar sogdao
Emarga Bab igargi sunmagged iduale, mer unnila binsadao ibu ibmargi be sunmaggoe, binsadabalo igi be emarga ibmar sogoe. 2 Timoteo 2:24 geb 1 Pedro 3:15, 16 absomalo, we ibmargi sunmagmarbalo:
¿Igi be nabir Bibliagi ibmar absolesadba igar imasmogale, Bab igargi sunmaggalir?
Sun abar be gwenagan, be aimardibe, be iddobisur gudamaloed. Be iddobisur guarmalale, ¿ibu be imaggoe? ¿Ibudi be imaggosuli?
¿Ibigala anmar sabsur emarga ibmar soged abelesurbali?
5. Jehova igargi sunmagged yeer iddo dule imagged
Jehova, Jesusga sogsad, yoogidse an ibmar nuegan imaggoedgi be dulemarga sunmaggoye. ¿Jesus igi we arbaed dagsasunna? Juan 4:34 absomalo, we ibmargi sunmagmarbalo:
Mas gunnedba nabir anmar dula gudiid, aadi yeer iddo anmar imagbalid. ¿Ibigala Jesus sogsa, Bab igargi sunmagged mas gunnedyob guye?
Jehova ibmar nuegan imaggoedgi be emarga sunmagmogale, ¿be yeer iddosmogardibe? ¿Ibiga be deyob soge?
Sun nabir be weyob imasaled
Nue dagdao, igar iddogedgi Bab igargi sunmaggedgi anmar odurdaglealile, igi imasdamala nabir emarbo sunmadega.
Be emar abargi sunmagbimogale, be odurdagnaidga sogo, ibu an imagged abeleye nabir an discurso imagmogaga. Discurso imagmaidba be dobed surgudoed, nabir be emarga Bab igargi sunmagmogaga.
Be durdagbiele dulemar bes ibmar egissalir igi be abin sogoe, we librogi weyob sognaid daggo, “Abar sogdamalad”.
ABAR SOGDAMALAD: “Degidde, ¿be nueganbii?”.
Dule deyob beg soggalile, ¿igi be imasale Bibliagi ibmar durdagnaidgi nabir be ega sugmaggega?
WE IGARGI SUNMAGLESAD
Yoogidse Jehova ibmar nuegan imaggoedgi sunmagged yeer iddo anmar imagged. Aa ibmargi sunmagged beedsesulid.
Ibu be durdasa
¿Ibigala be emarga Bab igargi sunmagbi gudamogoe?
Emarga Bab igargi sunmaggalile, ¿igi anmar emarga ibmar soged nuedsuli?
¿Ibu be nabir imasale, dobed osulogega?
NABIR BE WE IBMAR DURDASBALILED
Wegine soglenaid, igi be nabir tarjeta de contacto jw.org gad ebusale, Bab igargi sunmaggega.
Wegine soglenaid, igi be ibmar imagged abelegoe, nabir be Bab igargi sunmagmogaga.
“¿Bule be Bab igargi sunmagbimoga?” (La Atalaya, septiembre 2020 gad)
Wegine soglenaid, igi Jehova burwigan bendasdamoga mer dobe e igargi sunmagmalaga.
Wegine be durdaggoed, igi be nabir be gwenaganga Jehova igargi sunmasmogale.
“Igi be nabir be gwenaganga Bab igargi sunmasale” (La Atalaya, marzo 15, 2014 gad)