Jesus nabbaneggi gudi gusgu, ¿ibu ibmar imagdi gusa?

Abar dulemar Jesusgi binsadele, anba goe bibbi maiyob egi binsadamalad, abar Jesus bioggar naidgi binsaddamalad. Abar sogdamarbalid, Jesus unnila binsa dule nued gudi gusmoye. Auggi, be wisgubiele Jesus nue doa dule gue, bin be durdaggweler gebed igi ebbenne Jesus ibmar imagdi gusa. Aagala, we lecciongi be durdaggoed, bur ibu ibmar imaggedgi Jesus arbadi gusa. Geb be durdagbaloed, ibigala be we ibmar wisgued nue abelemoga.

1. ¿Jesus bur ibu imaggedgi arbadi gusa?

Jesus bur we ibmar imaggedgi arbadi gusad: Bab Dummad neg dagmaid gayaburba nuedgi dulemarga sunmaggedgi (Lucas 4:43 absogo). Dulemarga sogdi gusad, Bab Dummad gobierno dulemarga neg nudaggoedye.a Birga baa abala Jesus, dulemarga we ibmargi sunmagdi gusad (Mateo 9:35).

2. ¿Ibigala Jesus ibmar dagledisurmalad imasa?

Bibliagi soglenaid, ‘Jesus, Bab Dummad nuggi ibmar dagledisurmalad imasye’ (Gusmalad 2:22). Jehova ega gangued ugsadbali, Jesus nabir dii burwa boo imasad, miliba mergu masgi dulemar ogudsabalid, buggidar boni nigmalad onudasbalid, abar dulemar burgwismalad odurgusbalid (Mateo 8:23-27; 14:15-21; Marcos 6:56; Lucas 7:11-17). Jesus ibmar dagledisurmalad imasad, dulemar mag daggega, Bab Dummad e barmiali. Aagala, anmar bensurmogad, yoogidse Jehova nabir anmarga neg nudagmogoe.

3. ¿Jesus doa sogedba ibmar imagdi gusa? ¿Ibu igargi anmar odurdagmoga?

Jesus nueggwa Jehova sogedba ibmar imagdi gusad (Juan 8:29 absogo). Dulemar Jehova igargi Jesus obanbi gusmar inigwale, auggi, Jesusdi bibbisaar Jehova igargi bangussulid, bur Jehova sogedba ibmar imasdaed. Degsoggu, anmarga ibmar ibigwensur gusurmogale, nabir anmar Jesusyob nueggwa Jehova sogedba ibmar imagdi gusmogaled. Jesus ebbenne weyob ibmar imasad, e sordagan e sorba nabir eyob ibmar imagdi gumarmogaga (1 Pedro 2:21).

5. Jesus ibmar nuegangi dulemar odurdasad

Jesus unnila Bab gobierno ibmar nuegan imaggoedginbi dulemarga sunmassulid, ibmar nuegan imaggedgi dulemar odurdasbalid. Dagmaloena, ibu ibmar nuegangi dulemar odurdasa. Mateo 6:14, 34 geb 7:12 absomalo, we ibmargi sunmagmarbalo:

• ¿Ibu ibmar nuegangi Jesus dulemar odurdasa?

• Weyob Bibliagi ibmar soglenaidi, ¿emi ibagi nabir dulemar bendasmogardibe?

6. Jesus ibmar dagledisurmalad imasad

Jehova Jesusga gangued ugsad, ibmar dagledisurmalad imaggega. Dagmaloena ibu ibmar imasa, Marcos 5:25, 34 se absomalo, sulirdina, VIDEO dagmalo. Sorba we ibmargi sunmagmarbalo:

VIDEO: Jesus, ome boni niggad onudasad (5:​10)

• Be dagsa, ¿ome ibu ibmar bibbisaar bengussuli?

• ¿Igi Jesus ibmar imasad bur be nued dagsa?

Juan 5:36 absomalo, we ibmargi sunmagmarbalo:

• Jesus weyob ibmar dagledisurmalad imasadbali, ¿nue doa Jesus barmiali daglesunna?

WE IGARGI SUNMAGLESAD

Jesus, Bab gobiernogi dulemarga sunmagdi gusad, ibmar dagledisurmalad imagdi gusbalid, geb Jehova sogedbarbi igar imagdi gusbalid.

Ibu be durdasa

• ¿Jesus bur ibu imaggedgi arbadi gusa?

• Ibmar dagledisurmalad imasadbali, ¿nue doa Jesus barmiali daglesunna?

• ¿Ibu ibmar nuegangi Jesus dulemar odurdasa?

NABIR BE WE IBMAR DURDASBALILED

¿Jesus bur ibu igargi dulemarga sunmagdi gusa?

“¿Ibigala Jesus dulemarga bur Bab gobiernogi sunmasdae?” (La Atalaya, octubre 1, 2014 gad)

Wegine soglenaid, ibigala anmar bensuli, ebbenne nue Jesus ibmar dagledisurmalad imasa.

“Jesus ibmar dagledisurmalad imasadi, ¿ibu igargi be odurdagge?” (La Atalaya, julio 15, 2004 gad)

Wegine soglenaid, igi dule wargwen na e daed ogwasa, durdagnonigu, Jesusdi na eginbi binsasurdaye.

“Unnila an na anginbi binsadi daenad” (La Atalaya, octubre 1, 2014 gad)

Wegine be nabir dagsaled, Jesus bur ibu ibmarmar imagdi gusa.

“Jesus nabbaneggi gudi gusgu” (La Biblia. Traducción del Nuevo Mundo, apéndice A7)