¡Neg Yeerdaglegedi Iddagga Gusa!

Nabbaneg gine ibmar isgana gunaidi oyoge Neg Yeerdagleged iddagga gusa. Bad diggasurgusa Biblia gine soglesa Neg Yeerdagleged daged iduale, anmar negbeedsegid dagdagoye. Emi iba gine anmar aa ibagan gine buggwa. Anmar daggoena ibu ibmar gudagoye Biblia sogsa.

Neggweburmar urwed dummagan onoged. “Dulemar-yar-baid-baidgi-bugmalad na bila ononanai-gudamaloed, degi, reymar na mudsub-mudsub egi yolenanai na gudamarbaloed” (Mateo 24:7). We ibmar iduaggwa soglesadi bad gusa. 1914 daggale ilabogusa neggweburmar nabo abinabin urwed dummagan ononanai gusmalad. Aa daggale urwed yaigana mergusmogad, degine, millónba dulemar aa urwedba burgwismalad.

Bonigan yaisurgusa. “Yar baid-baidgi [...] uelemalad-buggidar-agnimai-gubaloed” (Lucas 21:11). Wegi guoye soglesadi ¿deyob gunai? Eye, deyob neggunai. Millón bali dulemar burgwemamai: cáncer gine, gwage gine bonigan nigguleged bali, boni dollodollo dule imagged bali, malaria gine, sida gine geb bonigan bamaladba.

Mas gunned galaggude. Bela negdirbimaggale abar dulemar nue mas gunsuli. Birga irba millón bali dulemar burgwemamai uggudba. We ibmala oyobali Neg Yeerdaglegedi iddagga gusa. Biblia soge: “Uggud-dummad [...] nai-gudabaloed” (Marcos 13:8).

Negabandur noed. “Yar baid baidgi [...] negabandur-dummagan nagumai-gudabaloed” (Mateo 24:7). Wegi ibmar soglesadi anmar iba gine anba bad gunabali. 1914 daggale negabandur gine millón bali dulemar burgwemamai gude.

Dule isganamar. Dulemar “maniginbi binsamalad” geb “na duggin e-sanginbi binsamalad noniggoed”. Dulemar “unnila bur-bule na duggin san-yeer-iddogedgi binsamalad, Babdummadgindi” binsasurmalad nigguoe. Mimmigan “e-babgan-sogedba-dasurmalad” niggudoed (2 Timoteo 3:1-5). ¿Emi iba gine dulemar wegi damaladi nue nigsur be dagge? We dulemala ibgwensur Babdummad dagmala, geb dule babigar durdagbimalad gine agga dodoar damarbali, ega undar babigar durdagged gue gala.

Igar mamaidgi annaleged. Anba ‘ibmar-isgana-yaisur’ gudabaloe (Mateo 24:12). Sun be weyob binsamogaled: dulemar emi iba gine igar mamaidba dasurmaladi yaisurgusa birgamar nanasad bali. Bia dule gudidibe sun e ibmar addursalege, dule baid sega yardaglegodibe, dule baid sega nagbi imaglegodibe.

Bela we ibmala oyonai Babdummad e Reino iddagga gusa. Biblia sognai: “We-ibmarmar an-bemarga-sogsamaladi deyob guar bemar daggalir, bemar wisdo, Babdummad-neg-dagmaid [“e reino”, NM] bad warmagdaniggid” (Lucas 21:31). Auggine, ¿ibusunna Babdummad e Reino? We gobierno dina nibneg ginedi, we Nabbaneg neg yeerdaglegedga imaggoedi. Bela dulemar gobiernomar anale negdagmai guoe (Daniel 2:44).