¿Anmar Burgwisale Igi Gusdae?

Burgwedi dula gudigued e mudsubbudi. Burgwedi belabela gabed yobi gue (Juan 11:11-14). Burgwarmaladi ibmar iddosurmala, ibmar dagsurmala, geg sunmagmarbali, degine, binsasurmarbali (Eclesiastés 9:5, 10). Noar babigar odurdagmaladi, odurdagmalad burgwarmaladi, burbarmalad neg sega naddaye e sergan burgwismalad bogwa gudisaegala. Auggine Biblia dina we ibmar odurdagsuli.

Dulemar burgwismaladi geg bar dulemar bendagmala degine geg bar dulemar oaggalomar bali. Dulemala neguan gine dule burgwismalad gala mas gullegedi sidamala geb ega nabba oadamarbali, binsamalad bali we ibmar imaglegedi burgwarmalad nued dagye. Deginigwale, we ibmar imaglegedi Babdummad dina nued dagsuli, ar we ibmar imaglegedi Nia e gaggan saed gine daniggid. Anba dule burgwismalad bela we ibmar bali nued iddogosurmogad, ar emar dina dula gudisurmalad. Degisoggua burgwarmaladi dobguleged suli geb ega ibmar imaglegedsurbali. Anmar unnila Babdummadsebii goledi (Mateo 4:10).

Burgwismalad gannar durgumaloe. Yoogidsega Jehová dulemar burgwismalad odaggoe Nabbaneggi neg yeerdaglegedgi gudisamalagala (Juan 5:28, 29; Gusmalad 24:15). Babdummadi nabir gannar burgwarmalad odagge, igi anmar nabir dule gammaile odagmoga (Marcos 5:22, 23, 41, 42).

Dule burgwisad e burba gudigusdaye binsaedi gaggana, Nia dulemar deyob binsamala gala imagnai. Nia geb e ángel isganamar bogwa imagnanai dulemar binsae gala, dule burgwismalad e burba dula gudidaye geb sun dulemar gala bonigan ugmarye, degine, dulemar gala negbeedsegidi senonidabarye. Inbaggwa Nia dulemar yardagbali gabdagged gine, ibya aburedgindibe. Aa gala, Jehová isdar dagge dulemar burgwarmalad bogwa sunmagmaladi (Deuteronomio 18:10-12).