Mer be saggamarbo urwed amidii guo

Dule abirgin niggusale, na e abirginbobii gudigudoed. Auggine soglesurbalid e sergandina bar sabgulegosurye. Anba be ibgwensur be sergan imaggosur inigwale, emidi bur, be, be abirgingin inso binsadagweloed. Sunna be gwenagan deyob dae be daggalile, geger be dagdamaloed. Auggine be, Biblia sogedba igar imaggele, be, be sagmarbo urwed amidii guosulid, be, be bogwad meddedgi binsadii guosurbalid.

1 MER DOGGUS BEGINBI BINSABALO

BIBLIAGI SOGLENAID: “Be babba, degine, be nanba be ibsadii nanamalo” (Efesios 6:2). Anba be seredgus inigwale soglesulid be ibgwensur be sergan imagdii guoye. Ebinsabalo, be bogwad na e serganse nanamogoed. “Sabguedi, [...] geg nobgued”, degsoggu mer binsao be abirgin e serganse nanaedbali bedi ieledsunnoye (1 Corintios 13:4; Gálatas 5:26).

WEYOB BE NABIR IMAGGED:

• Mer doggus weyob ibmar obulodao: “Be gwenagan gadi angi sunmagdamalad”, sulirdina, “Be nan gwen nabir ibmar imag an dagsurdaed”

• Bee be degi sogsiina, igi be bogwad iddomogoen be binsae

2 MER IBGWENSUR BINSAED GALEGO

BIBLIAGI SOGLENAID: “Massered e babgi bangudoed, e nangi bangudoed. Geb massered e ome ebo garmagdii guoed. Ebogwadi, san wargwennagwadga gunoniggoed” (Génesis 2:24). Be sergandina bemar bendagbiedbali sun bemarga ibmar sogdamogoenad, auggine sun doggus bemargi nai nai gudamalad.

Bemarbi wissunad deyob be sergan bemar imaggalile, igi bemar imaggoe, auggi mer urwedgindi we ibmargi serganga sunmaggo. Urwedgi ibmar soged abelesulid (Proverbios 15:1). Be, be serganbo nued gudiguega, mer ibgwensur emar imaggo, mer gwae gwae sae iddodao, geb sabedgi igar onugudabalo (Efesios 4:2).

WEYOB BE NABIR IMAGGED:

• Be iddogele ibmar aggar gualir be sergan bemarse godde godde guardamoga, mer urwenaidgi be bogwadbo we igargi sunmaggo

• Igar amimalo nabir bemar we igar nuedgi onudaggega