LECCION 59
Isdar daglealir mer Jehovagi banguo
Bela Cristo sordagan isdar daglegoedbimalad. Auggi, mer dobguo.
1. ¿Igi anmar wisi, dulemar isdar anmar dagdagoe?
Bibliagi soglenaid: “Bela Cristo Jesusgi nue islimaggar nanabimaladga, solegagwar naibi iddoged igar nue maibalid” (2 Timoteo 3:12). Ebbenne Jesus, dulemar bamaladyob ibmar imassulidba isdar daglesad. Anmar, Jesusyob ibmar imagmosoggua, dummagan neg dagmamaid isdar anmar dagdamogoed, noar Bab igar odurdagmalad, isdar anmar dagdamarmogoed (Juan 15:18, 19).
2. ¿Ibu anmar emisgwagi imagger gebe, ibmar aggar guarlir mer dobguega?
Emisgwagine anmar bela beladse alamagger gebed, ibmar aggar gualir anmar mer iegega, Jehova anmar bendaggoedi. ¿Ibu anmar imagger gebsunna? Aagala, anmar bane bane Jehovas goled abeleged, bane bane Biblia absobalid, igar iddogedse nanaed mer iggubalid. Anmar we ibmar imagged indagsulile, anmar negyagginmalad Jehova igargi anmar obanbi gualirdibe, dulemar isdar anmar daggalirdibe, bibbisaar anmar dobguosulid. Apostol Pablo, ebbenne isdar dagledi gusmogadi, weyob sogsad: “Bab Dummad an bendaggedid, degisoggu, an ibmar dobsulid” (Hebreos 13:6).
¿Ibigala bali bali Jehova igargi sunmagged abelebali? Ar deyob be imaggele, be sunnad be daggoed, igi Jehova be bendagmai, bar be, dulemar dobe iddogosurbalidd (Proverbios 29:25). Emisgwagi be deyob imagdiile, ibagwengi gobiernomar soggarsundibe, mer bar Bab igargi sunmagmaloye, be dobe Bab igargi sunmaggosurbalid (1 Tesalonicenses 2:2).
3. ¿Ibigala anmar isdar daglealir siggirmagged abelesuli?
Anmar abesurmoganad, dulemar isdar anmar dagged. Auggi, anmarga deyob neg gualir anmar siggirmagsurdaele, anmar, Jehova igargi bangusulile, bur bule Jehova ai nuedga anmar gudoed, bar anmar Jehova benguosurbalid, ar anmar sunnad daggoed, igi Jehova anmar bendagmai guoe (Santiago 1:2-4, TNM absogo). Jehova wile iddodaed, dulemar isdar e sordagan daggalir, auggi, yeer iddodabalid, e sordagan siggirmagsurmalar. Aagala Bibliagi soglenaid: ‘Ibmar nued imagged ular, dulemar sabsur be imagger, Bab Dummad yeer be daggoed’ (1 Pedro 2:20). Degsoggu, Jehova na e sordagan deyob walagdimalad iegosulid, yoogidse sadegu gudi gumalaga imaggoed. Aagindi, Jehova sordagan bar isdar daglegosurmalad (Mateo 24:13).
NUEGGWA WE IBMAR DURDAGMARGOLO
Wegine be durdaggoed, igi abar imasdamala, isdar daglealir mer Jehova igargi banguega. Geb igi Jehova na e sordagan bendasdamoga.
4. Be gwenagan, Jehova igar durdagged be abesurmalale, ¿ibu be imaggoe mer Jehova igargi banguega?
Jesus sogsad, abar anmar gwenagan anmarse uludamaloye, anmar, Jehova igar durdaggalir. Mateo 10:34, 36 se absomalo, we ibmargi sunmagmarbalo:
Dule, Jehova igar durdaggalir, ¿sun igi abar e gwenagan gudamaloe?
Be wisgubiele, abar anmar sordagan deyob gusdamardibe, VIDEO dagmalo. Sorba we ibmargi sunmagmarbalo:
¿Igi be imasale, be negyaginmaladdibe, be aimardibe, abesurmalar be Jehova igar durdagged?
Salmo 27:10 geb Marcos 10:29, 30 (TNM) absomalo. Sorba we ibmargi sunmagmarbalo:
¿Bibliagi ibmar soglenaid igi be bendagmoga, be negyaginmaladdibe, be aimardibe, abesurmalar be Jehova igar durdagged?
5. Isdar daglealir, bur Jehova sogedba igar imaggo
Jehova igargi be obanbi guarmalale, be dobsurmogar gebed, Jehova sogedba igar imaggega. VIDEO dagmalo, we ibmargi sunmagmarbalo:
Videogi ibmar oyolesad, ¿igi be bendagmoga, mer be dobe Jehova igargi sunmagmogaga?
Gusmalad 5:27, 29 se geb Hebreos 10:24, 25 absomalo. Sorba we ibmargi sunmagmarbalo:
Gobiernomardibe, neggweburgi dummagan mamaiddibe, anmarga soggarmalale mer bar Bab igargi sunmagmaloye, mer bar igar iddogedse nanamaloye, ¿ibigala bur anmar Jehova sogedba igar imagged abelegoe?
6. Jehova be bendaggoed
Buggidar anmar sordagan isdar daglealir bibbisaar siggirmassurdamalad. Be wisgubiele, ibigala nabir siggirmassurdamala, VIDEO dagmalo. Sorba we ibmargi sunmagmarbalo:
¿Ibigala we dulemar nabir Jehova igargi bangussurmala?
Romanos 8:35 geb 37, 39 se, geb 2 Corintios 4:7 absomalo. Sorba we ibmargi sunmagmarbalo:
¿Igi Bibliagi soglenai, be isdar daglealir, doa be bendagmogoe mer be siggirmaggega?
Mateo 5:10, 12 se absomalo, we ibmargi sunmagmarbalo:
¿Ibigala be isdar daglealir wile iddogedsuli?
Anmar sordagan isdar daglealir siggirmassurdamalad. ¡Jehova be bendagmogoed, mer be siggirmagmogaga!
ABAR SOGDAMALAD: “Andi isdar daglealir, gwen gusar an na iddosulid”.
¿Bia Bibliagi ibmar soglenanaid nabir we dule bendasale?
WE IGARGI SUNMAGLESAD
Jehova yeer iddomadaed, anmar isdar daglealir egine bangusulir. Degsoggu, ¡Jehova be bendagmogoed, mer be siggirmagmogaga!
Ibu be durdasa
¿Igi be wisi, dulemar isdar anmar dagdagoe?
¿Ibu be emisgwagi imagger gebe, ibmar aggar guarlir mer dobguega?
¿Igi be wisi, igi neg guarsundibe, be, Jehovagi banguosurmoga?
NABIR BE WE IBMAR DURDASBALILED
Wegine soglenaid, anmar sorda wargwen preso galesgu, igi Jehova we dule bendasa.
Wegine soglenaid, anmar sordagan isdar dagledi gusmar inigwale, ibigala Jehovaga arbaed indassurmala.
Wegine soglenaid, isdar daglealir mer dobguegala, be ibu imagger gebe.
“Isdar dagleged idu, be ibu imagger gebe” (La Atalaya, julio 2019 gad)
Negyaggi isdar anmar daggarmalale, ¿ibu anmar imaggoe, mer emarbo urwed amiega, geb mer Jehovagi bangubaliga?
“Bab igar durdaglealir, inbaggwa neguyagi urwed noddaed” (La Atalaya, octubre 2017 gad)