Эпир тӗлпулусене мӗншӗн капӑр тумланса ҫӳретпӗр?

Эсир ҫак брошюрӑри сӑнӳкерчӗксем ҫинче Иегова Свидетелӗсем хӑйсен тӗлпулӑвӗсене тирпейлӗ тумланса ҫӳренине асӑрхарӑр-и? Мӗншӗн тумтирпе ҫи-пуҫ пирӗншӗн пысӑк пӗлтерӗшлӗ?

Хамӑрӑн Туррӑмӑра хисепленине кӑтартма. Чӑннипе, Турӑшӑн ҫыннӑн тулаш енӗ мар, вӑл шал енчен мӗнле пулни пӗлтерӗшлӗрех (1 Патшасен 16:7). Апла пулин те, Иеговӑна пуҫҫапма пуҫтарӑннӑ чухне пирӗн Ӑна тата пӗрле ӗненекенсене чунтан хисепленине кӑтартас килет. Пирӗн президент умне тӑмалла пулсан, паллах ӗнтӗ, ӑна хисепленӗрен эпир мӗн тӑхӑнасси пирки тӗплӗн шухӑшланӑ пулӑттӑмӑр. Ҫавӑн евӗрлех христиансен тӗлпулӑвӗсене эпир сӑпайлӑ ҫи-пуҫпа кайни «ӗмӗрсенӗн... Патшине», Иегова Турра, тата ӑна мухтава кӑларма пуҫтарӑннӑ вырӑна хисепленине кӑтартать (1 Тимофей 1:17).

Туррӑн пысӑк нормисемпе килӗшӳллӗн пурӑнма. Библи христиансене «таса шухӑшлӑ» пулса «сӑпӑ», е сӑпайлӑ, тумланма хавхалантарать (1 Тимофей 2:9, 10). Сӑпайлӑ тумланни вӑл — хамӑр ҫине ытлашши пӑхтаракан, ытла уҫӑ тата тӗрӗс мар туйӑмсене вӑратакан тумтиртен асӑрханмаллине пӗлтерет. Таса шухӑшлӑ пулни пире хитре, килӗшӳллӗ тата виҫине пӗлсе тумланма пулӑшать. Ҫак принципсене шута илсен, мӗн тӑхӑнас тӗлӗшрен пирӗн суйласа илме майсем нумай. Тивӗҫлӗ, килӗшӳллӗ тумланнипе Ҫӑлакан Туррӑмӑр вӗрентӗвне илем кӳрсе тӑма тата Ӑна мухтава кӑларма пултаратпӑр (Тит 2:10; 1 Петр 2:12). Тӗлпулусене эпир мӗнле тӑхӑнса кайнине пула ыттисем, тен, Иеговӑна пуҫҫапасси ҫине урӑхла пӑхма пуҫлӗҫ.

Сирӗн капӑр тумтир ҫук пулсан ан кулянӑр! Турӑ Патшалӑхӗн залӗнче сире курма яланах хавас пулӗҫ. Чи кирли вӑл — тумтир таса та тирпейлӗ пулни.

• Эпир тӗлпулӑва мӗнле тумланса кайни мӗншӗн пысӑк пӗлтерӗшлӗ?

• Тумтирпе ҫи-пуҫ тӗлӗшӗнчен эпир мӗнле принципсемпе усӑ куратпӑр?