Ырӑ хыпар сарас ӗҫе мӗнле йӗркеленӗ?

Хӑй виличчен кӑшт маларах Иисус каланӑ: «Пур халӑха та Турӑ Патшалӑхӗ ҫинчен пӗлтермешкӗн ҫак Евангелие пӗтӗм тӗнчипе пӗлтерсе тухӗҫ; вара пӗтес вӑхӑт ҫитӗ» (Матфей 24:14). Анчах та ҫак хыпара пӗтӗм тӗнчипе сарас тесен мӗн тумалла? Иисус кӑтартнӑ тӗслӗхе тытса пымалла (Лука 8:1).

Эпир ҫынсемпе килӗсенче курса калаҫма тӑрӑшатпӑр. Иисус хӑйӗн вӗренекенӗсене килтен киле ырӑ хыпар сарма вӗрентнӗ (Матфей 10:11—13; Апостолсен ӗҫӗсем 5:42; 20:20). Пӗрремӗш ӗмӗрте хыпарҫӑсен ырӑ хыпар сарма уйӑрса панӑ ятарлӑ территори пулнӑ (Матфей 10:5, 6; 2 Коринф 10:13). Паян та ырӑ хыпар сарас ӗҫе лайӑх йӗркеленӗ. Кашни пухӑвӑн хӑйне уйӑрса панӑ территори пур. Ҫакна пула эпир Иисус шанса панӑ ӗҫе — ҫынсене вӗрентес тата тӗплӗн пӗлтерес ӗҫе — туса тӑма пултаратпӑр (Апостолсен ӗҫӗсем 10:42).

Эпир ырӑ хыпара ҫынсем пур вырӑнсенче саратпӑр. Иисус час-часах ҫынсем пур вырӑнсенче ырӑ хыпар сарнӑ, тӗслӗхрен, тинӗс хӗрринче е пусӑ патӗнче (Марк 4:1; Иоанн 4:5—15). Унран тӗслӗх илсе, эпир те ҫынсемпе пур ҫӗрте те Библи ҫинчен калаҫма тӑрӑшатпӑр: урамра, ӗҫлӗ территорире, паркра е телефонпа. Унсӑр пуҫне, май килнӗ чухне эпир ырӑ хыпара хамӑр кӳршӗсене, пӗрле ӗҫлекенсене, пӗрле вӗренекенсене тата хурӑнташсене пӗлтеретпӗр. Ҫакна пула «ҫӑласси ҫинчен... ырӑ хыпара» пӗтӗм тӗнчипе миллион-миллион ҫын илтет (Псалом 95:2).

Эсир Турӑ Патшалӑхӗ ҫинчен тата пуласлӑхпа ҫыхӑннӑ лайӑх шанчӑк ҫинчен кама каласа пама пултарнӑ пулӑттӑр? Ҫак пӗлӳсене хӑвӑрта тытса ан тӑрӑр. Ҫак хыпара кама та пулин май пулсанах каласа парӑр!

• Мӗнле хыпара пӗтӗм ҫӗр ҫийӗпе пӗлтерсе тухмалла?

• Иегова Свидетелӗсем Иисус кӑтартнӑ тӗслӗхе мӗнле тытса пыраҫҫӗ?