Ҫутҫанталӑк инкекӗсем вӑхӑтӗнче эпир пӗрле ӗненекенсене мӗнле пулӑшатпӑр?

Ҫутҫанталӑк инкекӗ пулса иртсен, Иегова Свидетелӗсем инкек тӳснӗ районсенчи пӗрле ӗненекенсене тӳрех пулӑшма пуҫлаҫҫӗ. Ҫапла тунипе эпир пӗр-пӗрне чунтан юратнине кӑтартатпӑр (Иоанн 13:34, 35; 1 Иоанн 3:17, 18). Эпир мӗнле майсемпе пулӑшатпӑр?

Хамӑр ирӗкпе укҫа-тенкӗ паратпӑр. Пӗрремӗш ӗмӗрте Иудейӑра хӑрушӑ выҫлӑх пуҫлансан Антиохияри христиансем Иудейӑри христиансене укҫа-тенкӗ ярса панӑ (Апостолсен ӗҫӗсем 11:27—30). Паян та ҫавӑн евӗрлех, пӗр-пӗр ҫӗршывра пӗрле ӗненекенсем йывӑрлӑхсемпе тӗл пулнине пӗлсен, эпир вӗсене вырӑнти пуху урлӑ укҫа-тенкӗ ярса паратпӑр (2 Коринф 8:13—15).

Ӗҫпе пулӑшатпӑр. Инкек пулса иртнӗ вырӑнти старейшинӑсем пухури кашни тӑвана шыраса тупса пулӑшу кирлипе кирлӗ маррине пӗлме тӑрӑшаҫҫӗ. Пулӑшу паракан комитет апат-ҫимӗҫ, ӗҫмелли таса шыв тата тумтир валеҫсе парать, ҫавӑн пекех пурӑнмалли вырӑн тупма тата медицина пулӑшӑвӗ пама тӑрӑшать. Ҫуртсемпе Турӑ Патшалӑхӗн залӗсене ҫӗнетме-юсама пулӑшас тесе ҫак ӗҫе тума пултарулӑх пур нумай свидетель доброволец пулса ӗҫлеме хӑйсен укҫи-тенкипе килет. Пирӗн организацири пӗрлӗхе тата ҫума-ҫумӑн ӗҫлесе пухнӑ опыта пула эпир инкек-синкек тухсан пулӑшу пама хатӗр. Анчах та «хамӑрпа пӗр пек ӗненекенсене» пулӑшнӑ май эпир урӑх тӗне тытса тӑракан ҫынсем ҫинчен те манмастпӑр (Галати 6:10).

Сӑваплӑ Ҫырупа усӑ курса йӑпататпӑр. Ҫутҫанталӑк инкекӗсене пула хӗн курнӑ ҫынсене лӑплантаракан сӑмахсем уйрӑмах кирлӗ. Ҫакӑн пек вӑхӑтра пире Иегова, «кирек хӑҫан та лӑплантаракан Турӑ», вӑй парса тӑрать (2 Коринф 1:3, 4). Эпир ҫынсене Библире сӑмах панисем ҫинчен пӗлтерме тата асап кӳрекен, чуна ыраттаракан кирек мӗнле инкек-синкеке те Турӑ Патшалӑхӗ кӗҫех пӗтересси пирки шантарса калама хавас (Ӳлӗмхине 21:4).

• Ҫутҫанталӑк инкекӗсем вӑхӑтӗнче пулӑшӑва хӑвӑрт йӗркелеме Иегова Свидетелӗсене мӗн пулӑшать?

• Ҫутҫанталӑк инкекӗсене пула хӗн курнӑ ҫынсене эпир мӗнле йӑпатма пултаратпӑр?