Ертсе пыракан советра ҫӗнӗ арҫын тӑван

ЮНКУН ирхине, 2018 ҫулхи январӗн 24-мӗшӗнче, Пӗрлешӳллӗ Штатсенчи тата Канадӑри Вефиль ҫемйисенче пӗлтерӗшлӗ пӗлтерӳ тунӑ пулнӑ: Кеннет Кук тӑван Иегова Свидетелӗсен Ертсе пыракан совечӗн ҫӗнӗ членӗ пулса тӑнӑ.

Кеннет Кук тӑван АПШри Пенсильвани штатӗнче ҫуралса ӳснӗ. Вӑл чӑнлӑха шкула пӗтерес умӗн пӗрле вӗренекенрен пӗлнӗ, 1980 ҫулхи июнӗн 7-мӗшӗнче вара вӑл шыва кӗнӗ. 1982 ҫулхи сентябрӗн 1-мӗшӗнче Кук тӑван пионер пулса ӗҫлеме тытӑннӑ. Икӗ ҫул иртсен, 1984 ҫулхи октябрӗн 12-мӗшӗнче, вӑл Уолкилри (Нью-Йорк штачӗ) Вефильте ӗҫлеме пуҫланӑ.

Тепӗр 25 ҫул хушши Кук тӑван типографире тата Вефиль бюровӗнче тӗрлӗ ӗҫсене тунӑ. 1996 ҫулта вӑл Джеймине качча илнӗ, вара вӗсем Уолкилри Вефильте пӗрле ӗҫлеме тытӑннӑ. 2009 ҫулхи декабрьте Куксен ҫемйине Паттерсонри (Нью-Йорк штачӗ) Хурал Башнин Вӗренӳ центрне куҫарнӑ. Унта Кук тӑван вулакансен ҫырӑвӗсем ҫине хуравлакан уйрӑмра ӗҫленӗ. 2016 ҫулхи апрель уйӑхӗнче Кук тӑван хӑйӗн арӑмӗпе пӗрле нумайлӑха мар Уолкила таврӑннӑ, унтан вӗсене Бруклина (Нью-Йорк) янӑ. Пилӗк уйӑхран вӗсем Уорвикри (Нью-Йорк штачӗ) ҫӗнӗ тӗп управление куҫса кайнӑ. 2017 ҫулхи январь уйӑхӗнче Кук тӑвана Ертсе пыракан советӑн Ҫыравҫӑсен комитетӗнчи пулӑшаканӗ пулма лартнӑ.