Мӗншӗн Иисус панӑ парне — «нумайӑшне тӳлесе илмешкӗн» панӑ парне?

Библире мӗн каланӑ?

Иисус Христос панӑ парне вӑл — Иегова этемлӗхе ҫылӑхпа вилӗмрен хӑтармалли май. Библире Иисус тӑкнӑ юн пирки тӳлесе илме панӑ хак тенӗ (Эфес 1:7, Ҫӗнӗ Халал; 1 Петр 1:18, 19). Ҫавӑнпа Иисус хӑйӗн пирки «нумайӑшне тӳлесе илмешкӗн хӑйӗн пурнӑҫне пама килнӗ» тесе каланӑ (Матфей 20:28, Ҫӗнӗ тӗнче куҫарӑвӗ).

Мӗншӗн нумайӑшне тӳлесе илмелле пулнӑ?

Пӗрремӗш ҫынна, Адама, пӗр ҫитменлӗхсӗр, пӗр ҫылӑхсӑр тунӑ пулнӑ. Унӑн ӗмӗр-ӗмӗр пурӑнас май пулнӑ, анчах вӑл Турра итлеменнипе ҫав мая ҫухатнӑ (Пултарни 3:17—19). Адамӑн ачасем ҫуралсан, унран ачисем ҫине ҫылӑх куҫнӑ (Рим 5:12). Ҫавӑнпа ӗнтӗ, Библире Адам хӑйне те, хӑйӗн ачисене те ҫылӑхпа вилӗм чуралӑхне сутса янӑ тенӗ (Рим 7:14). Ҫылӑхлӑ пулнӑ пирки вӗсенчен нихӑшӗ те Адам мӗн ҫухатнине каялла тӳлесе илме пултарайман (Псалом 48:8—10).

Адамран пулса кайнӑ ҫынсен пӗр шанчӑк та пулманнине кура Турӑ вӗсене хӗрхеннӗ (Иоанн 3:16). Анчах та Турӑ пӗр сӑлтавсӑрах вӗсен ҫылӑхӗсене курмӑш пулма е каҫарма пултарайман, мӗншӗн тесен ҫакӑ Туррӑн тӗрӗслӗх нормисемпе килӗшсе тӑман пулӗччӗ (Псалом 88:15; Рим 3:23—26). Турӑ ҫынсене юратать, ҫавӑнпа та вӑл вӗсен ҫылӑхӗсене каҫарас тата вӗсене хӑтарас тесе законлӑ май туса панӑ (Рим 5:6—8). Ҫавӑн пек законлӑ май вӑл — тӳлесе илни.

Тӳлесе илни мӗн вӑл?

Библире каланӑ тӑрӑх, «тӳлесе илни» шутне виҫӗ уйрӑмлӑх кӗрет:

1. Ҫакӑ тӳлемелли хак (Йыша шутлани 3:46, 47).

2. Вӑл хӑтарать (Тухни 21:30).

3. Вӑл мӗн тӳлессе илмелле, ҫавӑн хакӗпе пӗр тан, е унӑн хакне саплаштаратьa.

Иисус Христос тӳлесе илме панӑ парнепе ҫав виҫӗ уйрӑмлӑх мӗнле ҫыхӑннине пӑхса тухар.

1. Хак. Библире христиансене «пысӑк хак парса илнӗ» тенӗ (1 Коринф 6:20; 7:23). Ҫак хак вӑл — Иисус Христос юнӗн хакӗ. Вӑл хӑйӗн юнӗпе «тӗрлӗ йӑх-ӑру, тӗрлӗ чӗлхеллӗ тӗрлӗ халӑх ҫыннисене, Турӑ валли... тӳлесе» илнӗ (Ӳлӗмхи 5:8, 9, Ҫенӗ Халал).

2. Хӑтарать. Христосӑн тӳлесе илме панӑ парни ҫылӑхран хӑтарать (1 Коринф 1:30; Колоссӑ 1:14; Еврейсем 9:15).

3. Пӗр тан. Христос панӑ парне Адам мӗн ҫухатнипе пӗр тан. Адам вара пӗр ҫитменлӗхсӗр пурнӑҫа ҫухатнӑ (1 Коринф 15:21, 22, 45, 46). Библире ҫапла каланӑ: «Пӗр ҫын [Адам] илтеменнипе нумайӑшӗ ҫылӑхлӑ пулса тӑнӑ, Пӗри [Иисус Христос| итленипе вара нумайӑшӗ тӳрре тухать» (Рим 5:19). Ҫакӑ пӗр ҫыннӑн вилӗмӗ ҫылӑхлисене нумайӑшне мӗнле тӳлесе илме пултарнине ӑнлантарса парать. Ҫапла вара, Иисус Христос «мӗн пур ҫынсене ҫылӑхран тӳлесе» илме мӗн кирлӗ пулнӑ, ҫавна панӑ — «Хӑйӗн пурнӑҫне панӑ». Анчах ҫынсен ҫакӑнтан усӑ илес тесен кирлӗ утӑмсем тумалла (1 Тимофей 2:5, 6, Ҫӗнӗ Халал).