Иисус хӑйӗн вӗренекенӗсемпе Иерихонран килнӗренпе Вифанире виҫӗ каҫ ирттернӗ ӗнтӗ. Халӗ тунтикун, нисанӑн 10-мӗшӗ, вӗсем ир-ирех Иерусалима каяҫҫӗ. Иисусӑн ҫиес килет. Ҫавӑнпа вӑл смоква йывӑҫне курсан ун патне уттарать. Анчах та ун ҫинче ҫимӗҫ пур-ши?

Халӗ март уйӑхӗн вӗҫӗ, смоквӑна вара июнь уйӑхӗччен пуҫтармаҫҫӗ. Анчах та йывӑҫ ир ҫулҫӑ кӑларнӑ. Ҫавӑнпа Иисус ҫимӗҫӗ те ир пуласса кӗтет. Анчах Иисус унта ним те тупаймасть. Ҫулҫӑсем йывӑҫа тулашӗнчен ултавлӑн кӑтартаҫҫӗ. Иисус калать: «Малашне санӑн ҫимӗҫне ӗмӗрне те никамӑн та татса ҫимелле ан пултӑр!» (Марк 11:14.) Йывӑҫ тӳрех хӑрма пуҫлать. Ҫакӑ мӗншӗн пулса иртни тепӗр кунне ирхине паллӑ пулать.

Кӗҫех Иисуспа унӑн вӗренекенӗсем Иерусалима ҫитеҫҫӗ. Иисус храма каять, ӑна вӑл иртнӗ кун пӑхса тухнӑччӗ ӗнтӗ. Паян вара вӑл ӑна пӑхса тухать ҫеҫ мар, виҫӗ ҫул каялла, пирӗн эрӑри 30 ҫулхи Пасхӑра, мӗн тунине тӑвать (Иоанн 2:14—16). Иисус храмран сутакансене те, туянакансене те хӑваласа кӑларать. Ҫавӑн пекех вӑл «укҫа улӑштаракансенӗн сӗтелӗсене, кӑвакарчӑн сутакансенӗн тенкелӗсене тӳнтере-тӳнтере» ярать (Марк 11:15). Вӑл ҫынсене храм витӗр япала йӑтса ҫӳреме чарать, мӗншӗн тесен хулан пӗр пайӗнчен тепӗр пайне ҫитес тесе вӗсем ҫапла ҫула кӗскетеҫҫӗ.

Мӗншӗн Иисус храмра укҫа улӑштаракансене тата чӗрчунсем сутакансене хирӗҫ ҫавӑн пек татӑклӑ ӗҫсем тӑвать? Вӑл калать: «„Манӑн Ҫуртӑма пур халӑхсемшӗн те тунӑ кӗлӗ ҫурчӗ тейӗҫ“ тесе ҫырманччӗ-и-ха? эсир ӑна вӑрӑ-хурах йӑви туса хунӑ» (Марк 11:17). Иисус ҫав ҫынсене вӑрӑ-хурахсем тет, мӗншӗн тесен вӗсем ҫынсенчен — парне кӳме чӗрчунсем илекенсенчен — калама ҫук пысӑк хак тӳлеме ыйтаҫҫӗ. Иисус вӗсем тӑвакан ӗҫе укҫа сӑптӑрнипе, е вӑрӑ-хурахла хӑтланнипе, танлаштарать.

Паллах ӗнтӗ, аслӑ священниксем, кӗнекеҫӗсем тата ятлӑ-сумлӑ ҫынсем Иисус мӗн туни ҫинчен илтеҫҫӗ, вара вӗсем каллех ӑна вӗлерме май шырама пуҫлаҫҫӗ. Анчах вӗсен пӗр чӑрмав пур. Иисус тавра яланах ӑна итлес текен халӑх кӗшӗлтетет, ҫавӑнпа вӗсем ӑна мӗнле вӗлермеллине пӗлмеҫҫӗ.

Иудейсем ҫеҫ мар, иудейсен тӗнне йышӑннӑ прозелитсем те Пасхӑна килеҫҫӗ. Вӗсем хушшинче уява Турра пуҫҫапма килнӗ грексем те пур. Вӗсем Филипп патне — унӑн грекла ят пулнӑран пулас — пыраҫҫӗ те Иисуса курма пулать-и тесе ыйтаҫҫӗ. Филипп вӗсем мӗн ыйтни вырӑнлӑ пулнипе пулманни пирки иккӗленет пулмалла, ҫавӑнпа вӑл Андрейпа канашлать. Вӗсем иккӗшӗ те Иисус патне каяҫҫӗ. Иисус вара халӗ те храмра пулас.

Иисус хӑй тепӗр темиҫе кунран вилессине пӗлет, ҫавӑнпа халӗ ҫынсен кӑмӑлне ҫырлахтармалли е мухтав шырамалли вӑхӑт мар. Вӑл икӗ апостолне хуравланӑ чухне тӗслӗх илсе парать: «Этем Ывӑлӗн мухтава тухас вӑхӑчӗ ҫитрӗ. Чӑн-чӑнах калатӑп сире: тулӑ пӗрчи ҫӗр ҫине ӳксе вилмесен пӗр пӗрчӗ халлӗнех юлать; вилсессӗн — нумай пӗрчӗ пултарать» (Иоанн 12:23, 24).

Пӗр тулӑ пӗрчи ниме те тӑмасть пек туйӑнать. Анчах вӑл ҫӗр ҫине ӳксен, пӗрчӗ пулма пӑрахнипе «вилет», вара унран калча шӑтса тухать, вӑхӑт иртнӗҫемӗн нумай пӗрчӗллӗ пучах ӳссе ҫитӗнет. Иисуспа та ҫавнашкалах: вӑл — пӗр ҫитменлӗхсӗр ҫын, ун пек ҫын урӑх ҫук. Анчах вӑл мӗн виличчен Турра шанчӑклӑ тӑрса юлнипе нумай ҫынна, хӑйсене ҫавнашкалах шеллеменскерсене, ӗмӗрлӗх пурнӑҫ пама пултарать. Ҫавӑнпа Иисус калать: «Хӑйӗн чунне юратакан ӑна пӗтерет; ку тӗнчере хӑй чунне курайман ҫын ӑна ӗмӗрлӗх пурӑнӑҫ валли упраса хӑварать» (Иоанн 12:25).

Иисус хӑйӗн пирки ҫеҫ каламасть, мӗншӗн тесен вӑл малалла ҫапла калать: «Маншӑн ӗҫлесе тӑракан Ман хыҫҫӑн пытӑр; Эпӗ ӑҫта — тарҫӑм та ҫавӑнта пултӑр; Маншӑн ӗҫлесе тӑракана Атте хисеплӗ» (Иоанн 12:26). Мӗн тери пысӑк награда! Кама Атте хисеплет, ҫавсем Патшалӑхра Христоспа пӗрле патшара ларӗҫ.

Хӑйӗн кӗҫех мӗнле нумай асапланмалли тата мӗнле хӑрушӑ вилӗмпе вилмелли ҫинчен шухӑшланӑ май Иисус калать: «Халӗ Манӑн чунӑм пӑлханать; мӗн калам-ши? Эй Аттем! ҫак сехетрен хӑтарсам Мана!» Анчах Иисус Иегова Туррӑн ирӗкне тӑвассинчен пӑрӑнасшӑн мар. Вӑл малалла калать: «Анчах Эпӗ шӑпах ҫак сехетшӗн килнӗ» (Иоанн 12:27). Турӑ мӗн тума шутласа хунине пурне те тума, ҫав шутра хӑйӗн пурнӑҫне парнене пама та, Иисус килӗшет.

Тунтикун, нисанӑн 10-мӗшӗнче, Иисус храмра хӑйӗн ҫывхарса килекен вилӗмӗ ҫинчен калать. Хӑйӗн вилӗмӗ Туррӑн ятне чыссӑрлатма пултарни пирки пӑшӑрханнӑран Иисус калать: «Эй Аттем! Хӑвӑн ятна мухтава кӑлар!» Ҫавӑн хыҫҫӑн тӳперен: «Мухтава кӑлартӑм, татах та мухтавлӑп»,— текен хӑватлӑ сасӑ илтӗнет (Иоанн 12:27, 28).

Ҫывӑхра тӑракан ҫынсем аптраса ӳкеҫҫӗ. Пӗрисем аслати авӑтрӗ тесе шутлаҫҫӗ. Теприсем «Унпа ангел калаҫрӗ» теҫҫӗ (Иоанн 12:29). Анчах та ку — Иеговӑн сасси! Иисус сӑваплӑ ӗҫне тума пуҫланӑранпа ҫынсем Туррӑн сассине пӗрре анчах мар илтнӗ.

Виҫӗ ҫул ҫурӑ каялла, Иисус шыва кӗнӗ чухне, Турӑ Иисуса: «Ҫакӑ Манӑн савнӑ Ывӑлӑм, Манӑн ирӗкӗм Ун ҫинче»,— тенине Шыва кӗртекен Иоанн илтнӗ. Каярахпа, пирӗн эрӑри 32 ҫулхи Пасха хыҫҫӑн, Иисус хӑйӗн апостолӗсем — Иаков, Иоанн тата Петр — умӗнче улшӑннӑ. Ҫав виҫӗ арҫын Турӑ: «Ҫакӑ Манӑн савнӑ Ывӑлӑм, Манӑн ирӗкӗм Ун ҫинче; Ӑна итлӗр»,— тесе каланине илтнӗ (Матфей 3:17; 17:5). Халӗ вара Иеговӑн сасси виҫҫӗмӗш хут илтӗнет, ӑна нумай ҫын илтет!

Иисус калать: «Ку сасӑ Маншӑн мар, сирӗншӗн пулчӗ!» (Иоанн 12:30, ҪХ.) Ҫакӑ Иисус чӑннипех Турӑ Ывӑлӗ — малтанах каласа хунӑ Мессия — пулнине ҫирӗплетсе парать.

Туррӑн шанчӑклӑ ӗҫлекенӗн, Иисусӑн, пурнӑҫ ҫулӗ ҫынсемшӗн тӗслӗх пулса тӑрать тата Сатана Шуйттан, ҫак тӗнче пуҫлӑхӗ, пӗтме тивӗҫлӗ пулнине ҫирӗплетсе парать. Иисус калать: «Халӗ ҫак тӗнчене сут пулать; халӗ ҫак тӗнче пуҫлӑхне хӑваласа ярӗҫ». Иисус кӗҫех вилӗ, анчах та ҫак вилӗм ҫухату тӳсни мар, ҫӗнтерни пулӗ. Мӗншӗн ҫавӑн пек калама пулать? Вӑл ӑнлантарса парать: «Эпӗ, ҫӗр ҫинчен ҫӗкленсен, пурне те Хам патӑма пуҫтарӑп [«тӗрлӗ йышши ҫынна хампа ҫывӑхлатӑп», ҪТ]» (Иоанн 12:31, 32). Юпа ҫинче вилнине пула Иисус ҫынсене хӑйӗнпе ҫывӑхланма парса вӗсене ӗмӗрлӗх пурнӑҫ илмелли мая уҫса парать.

Иисус хӑйӗн пирки ҫӗр ҫинчен ҫӗкленӗп тесе каласан, халӑх ҫапла хуравлать: «Христос ӗмӗр-ӗмӗрех пулмалла — эпир ҫакна саккунран пӗлетпӗр; епле-ха Эсӗ Этем Ывӑлӗн ҫӳле ҫӗкленмелле тетӗн? Ҫав Этем Ывӑлӗ кам вӑл?» (Иоанн 12:34.) Ҫирӗплетсе паракан тӗрлӗ тӗслӗхсем пур пулин те, Туррӑн сассине илтнӗ пулсан та, ҫынсенчен нумайӑшӗ Иисус чӑн-чӑн Этем Ывӑлӗ, малтанах каласа хунӑ Мессия, пулнине ӗненмеҫҫӗ.

Иисус унчченхи пекех хӑйӗн пирки «ҫутӑ» тет (Иоанн 8:12; 9:5). Вӑл халӑха ӳкӗтлет: «Ҫутӑ сирӗнпе пӗрле тата кӑшт анчах тӑрӗ; ҫутӑ пур чухне ҫӳрӗр, сӗмлӗх ан хупӑрлатӑр сире... Ҫутӑ хӑвӑрпа пӗрле чухне ҫутта ӗненӗр, вара ҫутӑ ывӑлӗсем пулӑр» (Иоанн 12:35, 36). Унтан Иисус вӗсем патӗнчен каять, мӗншӗн тесен унӑн нисанӑн 10-мӗшӗнче вилмелле мар. Нисанӑн 14-мӗшӗнче, Пасха кунӗнче, вӑл «ҫӗр ҫинчен ҫӗкленӗ» — шӑп ҫавӑн чухне ӑна юпа ҫине пӑталаса хурӗҫ (Галати 3:13, 14).

Иисуса иудейсем вӑл хӑйӗн сӑваплӑ ӗҫне пуҫланӑранпах ӗненменни уҫӑмлӑн курӑнать — ҫапла пророкла сӑмахсем пурнӑҫланса пынӑ. Исаия пророкла каланӑ тӑрӑх, ҫынсем ан таврӑнччӑр тата ан сывалччӑр тесе вӗсен куҫӗсем суккӑрланӗҫ, вӗсен чӗрисем чул пек хытса ларӗҫ (Исаия 6:10; Иоанн 12:40). Чӑнах та, иудейсенчен нумайӑшӗ Иисус малтанах каласа хунӑ Ҫӑлакан — пурнӑҫ патне илсе пыракан Ҫул — пулнине кӑтартакан сӑлтавсене сирсе яраҫҫӗ.

Никодим, Аримафея ҫынни Иосиф тата пуҫлӑхсенчен нумайӑшӗ Иисуса ӗненеҫҫӗ. Анчах вӗсем ӗненнине ӗҫсемпе кӑтартӗҫ-ши? Е вӗсене хӑйсене синагогӑран хӑваласа кӑларса яма пултарни хӑратса ӳкерӗ-ши? Е, тен, вӗсене «этем мухтавне» ытларах юратни чӑрмантарӗ-ши? (Иоанн 12:42, 43.)

Иисус хӑйне ӗненесси мӗн иккенне хӑй ӑнлантарса парать: «Мана ӗненекен Мана мар, Мана Яракана ӗненет; Мана куракан Мана Яракана курать». Турӑ Иисуса вӗрентме хушнӑ чӑнлӑхсем тата Иисус пӗр вӗҫӗмсӗр пӗлтерсе тӑракан чӑнлӑхсем питӗ кирлӗ. Ҫавӑнпа Иисус калать: «Мана йышӑнман ҫыншӑн, Ман сӑмахӑмсене хапӑл туман ҫыншӑн хӑйне тӳре [е судья] пур: юлашки кун ӑна Эпӗ каланӑ сӑмах айӑплӗ» (Иоанн 12:44, 45, 48).

Иисус ҫакӑн пек пӗтӗмлетӳ тӑвать: «Эпӗ Хам тӗлӗшшӗн каламарӑм; Эпӗ Хама янӑ Аттем мӗн хушнине турӑм, мӗн каламаллине, мӗнле каламаллине Мана Вӑл Хӑй каларӗ. Эпӗ пӗлетӗп: Вӑл мӗн хушни — ӗмӗрлӗх пурӑнӑҫ» (Иоанн 12:49, 50). Иисус кӗҫех хӑйӗн юнне тӑкса хӑйне ӗненекенсемшӗн парне кӳрессе пӗлет (Рим 5:8, 9).