Ka-kî-mamisîtotawâw Ana Kâ-kî-osihtât Kahkithaw Kîkway!

ÔTA 1879, Joseph kî-okimâhkâniwiw, Nez Percé Ithiniwak ohci Kîwîtinâhk America. Îkospî Joseph îkâ mithwîthihtahk ôho okimâwiwina, ômisi kî-itwîw: “Nitayîskonitohtîn ayamiwina kâ-mîscipathiki. Nitâhkosin nitîhihk î-kiskisiyân anihi mitho-ayamiwina îkwa î-pîkonikâtîki anihi asotamâkîwina.”

Mihcît Nîhithawak Kîwîtinâhk America ohci natawîthimîwak awîya kita-kî-mamisîtotawâcik. Tâskôc, Lone Man, Teton Sioux Ithiniwak ohci, kî-itwîw: “Nikî-wâpahtîn ôma, kîspin mistahi isihcikîwina, namwâc nâpîw kita-kî-mamisîtotâsot.”

Awîyak cî ihtakow kâ-wî-mamisîtotawâyahk kita-kwayask-tôtamawîw kahkithaw âthisithiniwa? Îhî! Ka-kî-mamisîtotawânaw Ana Kâ-kî-osihtât Kahkithaw Kîkway.

ANA KÂ-KANAWÎTHIHTAHK OTAYAMIWIN

Ana Kâ-kî-osihtât Kahkithaw Kîkway kî-ayamihîw âthisithiniwa, otayamiwina masinahikâtîthiwa masinahikanihk. (2 Timothy 3:16, 17) Masinahikanihk ôma, Kihci-Masinahikan, kî-asotam î-wî-oskisihtât kahkithaw kîkway. (2 Peter 3:13) Ispimihk Kâ-ayât nama wîhkâc wanikiskisiw otasotamâkîwina. Îkosi kî-itîw otâthisithinîma: “Kita-kî-cî-wanikiskisitotawîw iskwîw kâ-nôthât otawâsimisa, kita-îkâ-kitimâkinawât okosisa kâ-kî-nihtâwikihât? Îhî, îwakonik kita-kî-wanikiskisiwak, mâka nîtha namôtha kika-wanikiskisitotâtin.” (Isaiah 49:15) Okimâhkân Joseph kî-itwîw: “Nikî-kiskinohamâkawinân kita-tâpwîhtamâhk Kisî-Manitow î-wâpahtahk mîna î-pîhtahk kahkithaw kîkway îkwa mîna îkâ wîhkâc î-wanikiskisit.”

Ana Kisî-Manitow kî-mîthisow wîhthowin kita-aspîthimoyahk. Îwako “Jehovah”, “Kâ-kî-osihtât î-kâ-kisipâhk askiy.” (Isaiah 12:2; 40:28) Wîhthowin ôma Jehovah itwîmakan “Wîtha Kâ-wî-itôtahk Kita-ihkinthik.” Ayâw anima wîhthowin wîtha î-ispathihtât kîkway kita-kanawîthihtahk otasotamâkîwina. Tânihi otitâtisiwina kâ-ayât Jehovah kita-kî-mamisîtotamahk?

TÂNÎHKI KA-KÎ-MAMISÎTOTAWÂYAHK ANA KÂ-KÎ-OSIHTÂT KAHKITHAW KÎKWAY?

Sâkihiwîwin: Askiy ôma kiwîhtamâkonaw î-sâkihikoyahk Ana Kâ-kî-osihtât Kahkithaw Kîkway. Geronimo okimâhkânipan, Apache Ithiniwak ohci, kî-itwîw: “Nikî-kîsônik pîsim, nikî-wîwîpitik thôtin, nikî-âkawâstîsimon mistikôk tâskôc kotaka Nîhithawak oskawâsisak. . . . Pikwîtî nika-kî-itohtân î-mithomahcihoyân.” Ana Kâ-kî-osihtât Kahkithaw Kîkway kita-kanawîthihtam otasotamâkîwina wîtha î-sâkihât kahkithaw âthisithiniwa kahkithaw î-itahtotîwisithit mîna î-itahtoskânîsithit ohci. Kihci-Masinahikan itwîmakan: “Cikîmâ Jehovah mithwâtisiw; okisîwâtisiwin kâkikî ayâthiw; mîna otâpwîwin î-ayâthik kahkithaw î-ati-ayâniski pimâtisithit âthisithiniwa.”​—Psalm 100:5.

Ithinîsiwin: Mihcît kâ-nîkânohtîcik nôhtî-wîcihîwak anihi kâ-kitimâkisithit mâka namwâc îkwathiko ayâwak ithinîsiwin. Pîtosisâyâw Jehovah, otithinîsiwinihk mîthîw mitho-kîkwaya kahkithaw pimâtisithit. (Psalm 145:16) Standing Bear okimâhkânipan, Dakota Ithiniwak ohci, kî-itwîw: “Micihcîy kâ-kî-osihtât askiy asici osihtamawîw nâpîwa ita kâ-ayâthit.” Kihci-Masinahikan itwîmakan: “O Jehovah tânithikohk mihcîtinwa kitatoskîwina! Ithinîsiwinihk kahkithaw kikî-osihtân. Askî môskinîw kiwîthôtisiwina.” (Psalm 104:24) Ana Kâ-kî-osihtât Kahkithaw Kîkway kâ-ithinîsit kita-itôtahk tânisi kâ-kî-asotamawât.

Kwayask-isihcikîwin: Okimâhkân Joseph kî-itwîw: “Kahkithaw nâpîwak kî-osihikowak ana pîyak Kisî-Manitowa.” Tâpwî mâka, Kisî-Manitow kita-itôtam kwayask-isihcikîwin kahkithaw âthisithiniwa ohci. Kihci-Masinahikan itwîmakan: “Cikîmâ Jehovah sâkihtâw kwayask-isihcikîwin.” (Psalm 37:28) Mîna, Ana Kâ-kî-osihtât Kahkithaw Kîkway “îkâ katâc î-kakîkinât awîya: Mâka kahkithaw kâ-itahtoskânîsit âthisithiniw anihi kâ-kosikwîthimikot, mîna kâ-atoskâtamithit kwayaskihtâtisiwin î-mitho-otinât.” (Acts 10:34, 35) Ana Kâ-kî-osihtât Kahkithaw Kîkway okwayask-isihcikîwin ka-kî-aspîthimonânaw kita-tâpwît kita-kanawîthihtam otayamiwin.

Maskawisiwin: Âtiht kâ-nîkânohtîcik nôhtî-wîcihîwak ithiniwa mâka îkâ îkwathikok î-ayâcik maskawisiwin. Pîtosisâyâw Ana Kâ-kî-osihtât Kahkithaw Kîkway. Itwîw acâhkosa ohci: “Ispimihk itâpik, wâpahtamok mâka. Awîna ôhi kâ-kî-osihât? Kâ-môskinâkohât kâ-osâmîyatihthit î-ihtasithit; wîhthîw kahkithaw î-isithihkâsothit; î-isi-kihcâyiwanithik osôhkâyawisiwin, îkosi î-isi-sôhkithitâkwanithik omaskawisiwin, namwâc pîyak nôhtîpathithiwa.” (Isaiah 40:25, 26) Ana Kâ-kî-osihtât Kahkithaw Kîkway omaskawisiwin ohci ka-kî-tâpwîhtînânaw kita-kî-itôtahk ôho tânisi kâ-itwît.

Ana Kâ-kî-osihtât Kahkithaw Kîkway otitâtisiwina ohci kitâpwîhtînânaw kâ-asotamâkoyahk. Kihci-Okimâhpan Solomon kî-itwîw: “Namwâc pîyak itwîwin nôhtîpathithiw kahkithaw omitho-asotamâkîwina kâ-kî-asotamâkît.”​—1 Kings 8:56.

KÎKWÂTHIW KÂ-KÎ-ASOTAMÂKÎT ANA KÂ-KÎ-OSIHTÂT KAHKITHAW KÎKWAY?

Jehovah, Ana Kâ-kî-osihtât Kahkithaw Kîkway, kikî-mîthikonaw okosisa Jesusa kâ-tipîthihcikîthit, kita-mîthikoyahk kwayask-isihcikîwin iyawis. Jehovah itwîw: “Wâpamihk! Nitatoskîthâkan kâ-sîtonak! Ninawasônâkan kâ-mithwîthimak nitahcâhkohk! Nikî-kikiskamotithâw nitahcâhkwa; kita-wâpahtithiw othasowâsiwiwin î-itahtoskânîsithit âthisithiniwa.” (Isaiah 42:1) Jehovah kâ-kî-nawasônât Kihci-Okimâwa ka-wîcihithiwa kâ-kitimâkisithit. Kitayamihtânânaw Jesus ohci: “Kita-pimâcihimîw otawasimîsithiwa okwitamâwa; îkosi kita-pisatawîw okitimahiwiwa. . . . Cikîmâ kita-paspihîw okwitamâwa mawimostâkoci; mîna okitimâkisiwa îkâ kâ-ayâwâthit awîya kita-nîsôhkamâkothit.”​—Psalm 72:4, 12.

Nistam ohci Ana Kâ-kî-osihtât Kahkithaw Kîkway kî-isihtâw ôma askî kita-mithwâsik mîna kita-pîyâhtakahk. Wîpac kita-kî-ispathihtâw otitîthihtamowin. Kihci-Masinahikan itwîmakan: “Kita-kâsîhamawîw kahkithaw ohcikawâpiwin oskîsikowâhk ohci; mîna nipôwin kita-namatakwan; namôtha mîna kita-ihtakwan pîkwîthihtamowin, âhpo mâtowin, âhpo wîsakîthihtamowin; athis anihi nistam kâ-kî-ayâki îkwa pônihpathiwa.” Ka-kî-tâpwîhtîn nâ Ana Kâ-kî-osihtât Kahkithaw Kîkway kâ-kî-asotamâkoyahk? Itwîw: “Cikîmâ ôho itwîwina ayâkwâmithihtâkwanwa mîna tâpwîmakanwa.”​—Revelation 21:4, 5.

MAMISÎK OTITHINÎSIWIN ANA KÂ-KÎ-OSIHTÂT KAHKITHAW KÎKWAY

Jehovah itwîw: “Kîspin piko kî-natohtaman nothasowîwina! Kipîyâhtakîthimowin kita-kî-isi-ayâpan tâpiskôc sîpiy, mîna kikwayaskihtâtisiwin tâpiskôc î-mâmahkâhahk kihcikami.” (Isaiah 48:18) Ka-kî-kiskinohamâk Ana Kâ-kî-osihtât Kahkithaw Kîkway î-mâwaci-mithwâsik pimâtisiwin nitawi-kiskîthihtamani. Kîspin kakwî-kiskîthihtaman Kihci-Masinahikan ohci, ka-kiskinohamâkon tânîhki ohci kâ-pimâtisiyahk, tânisi mîna kita-kî-isi-mitho-otôtîmimacik âthisithiniwak mîna kita-miskaman tâpwî mithwîthihtamowin.​—Micah 6:8; Luke 6:27-31; 11:28.

Ana Kâ-kî-osihtât Kahkithaw Kîkway piko kiwîhtamâkonaw tâpwîwin kakwîcihkîmowina ohci kâ-kakwîcihkîmoyahk, tâpiskôc: Tânîhki mitho-âthisithiniwak âskaw kâ-kakwâtakihtâcik? Tânisi kî-ihkik ispî kâ-nipiyahk? Awîyak kâ-nipicik kîhtwâm cî kita-kî-pimâtisiwak?

Ana Kâ-kî-osihtât Kahkithaw Kîkway kâkikî kî-wâpahtithikonaw kita-kî-mamisîtotawâyahk. Kika-cîhkîthihtîn cî î-sâkihisk, kita-nawac-nôhtî-nitawi-kiskîthimat? Jehovah’s Witnesses kita-mithwîthihtamwak kita-wîcihiskwâwi tânisi Kihci-Masinahikan tâpwî kî-isi-kiskinohamâkoyahk. “Mamisîtotaw Jehovah mîna mitho-tôta . . . Mithawâtikwîthim mîna Jehovah, îkosi kika-mîthik kâ-isi-natawîthihtaman kitîhihk.”​—Psalm 37:3, 4.