Zoova ˗yö ö ˗kɔ ˗yɛ Ʒozue ˗bha

Kö Moizö ˗ya ˈˈdhiʋ̈sü Izraɛdhömɛn ˗nu ˈka ˗kwɛ ꞊va ˈˈpiʋ̈ ˈö˗ ga yi ˈyaa ꞊gblɛɛn ˈzü, Zoova ˗ya ˗pö ˗a ˗dhɛ: ‹Bhi ˈyaa ˈnën ˈü dho ˈdho ˈˈsɛgümɛn ˗nu ˈka ˈˈsɛ ˈa˗ ˈˈplüün bho ˗an ˗dhɛ bhë ˗a ˈgü, ˈˈkɛɛ a dho ˗a kë kö ˈü ˗kpan ˈˈsɛ ˈö bhë ˗a ˗bha.› ˈYö Moizö ˗ya pö Zoova ˗dhɛ ˗yö ö ˗kɔ ˈˈyɛ mɛn do ˗bha kö ˗yö ˈˈdhiʋ̈sü ˈˈsɛgümɛn ˗nu ˈka. ˈÖ Zoova ˗ya pö ˗a ˗dhɛ: ‹˗Bhö ˈdho Ʒozue ˈˈpiʋ̈ kö ˈü˗ pö ˗a ˗dhɛ ꞊dhɛ yö ˈnën ˈdho ˈˈdhiʋ̈sü ˈˈsɛgümɛn ˗nu ˈka ꞊taabha.›

ˈYö Moizö ˗ya pö ˈˈsɛgümɛn ˗nu ˗dhɛ ꞊dhɛ ˗a ga yi ˗ya yö ˈklöö˗, ˈˈkɛɛ Zoova ˗ya ö ˗kɔ ˈˈyɛ Ʒozue ˗bha kö ˗yö ˈˈdhiʋ̈sü ˗an ˈka ˗wo ˈdho ˈˈsɛ ˈö˗ ˈˈplüün bho ˗an ˗dhɛ ˗a ˈgü. ˈYö Moizö ˗ya pö Ʒozue ˗dhɛ: ‹ˈˈSuʋ̈ ˈyaa dho ü ˗kë Zoova ˗dho ü ˗takun.› ˈDhɛ go mü, ˈyö Moizö ˗yö ˗da Nebo ˗tɔn ˗ta, ˈö Zoova ˗yö ˈˈsɛ ˈö˗ ˈˈplüün bho Ablaamö, Izaakö waa Zakɔbö ˗an ˗dhɛ bhë, ˗a ˗zɔn ˗a ˗dhɛ. ˈDhɛ ˈö Moizö ˗kwɛ ˗yö ˗kë 120, ˈö ga.

ˈYö Zoova ˗ya pö Ʒozue ˗dhɛ: ‹˗Bhö Zuudɛn ga ˈˈkan, kö ˈü ˗da Kanaan ˗sɛ ˈgü. A ˗dho ü ˗takun ꞊dhɛ ˗kɔ ˈa Moizö ˗takun ˗a ˈka bhë ˗a ˈdhö. ˗Bhö n ˗man ˈtɔŋ˗ ˗nu ˗wo pö yi ꞊gban ˈˈpɛpɛ ˈka. ˈˈSuʋ̈ ˈyaa ˈdho ü kë, ü ˈgü ˗yö kë ˈˈgbɩɩ˗. ˗Bhö ˈdho, ˗a kë ꞊dhɛ ˗kɔ ˈa˗ pö˗ ˈka ü ˗dhɛ bhë ˗a ˈdhö.›

ˈDhɛ ˗kë ˈˈdhʋ̈, ˈyö Ʒozue ˗yö ˗dhɛsuanbhomɛn ˗nu ꞊plɛ bɔ Zedhiko. ˗Kwɛzlan ˈdhɛ ˈö dɔ ˗a ˗dhɛ ˈö yö ˗a ˈˈpiʋ̈ ˗a ˈgü, kwa dho ˈpë ˈö ˗kë mü ˗a ˗wɔn blɛɛˈˈ ˗së ˈka. ˈDhɛ ˈwo wo yɛɛkë, ˈyö ˈwo˗ pö ꞊dhɛ ˗da Kanaan ˗sɛ ˈgü ˈˈtʋ̈ŋ ˗së ꞊dede ˗ya ˗wo. ˈDhɛ ˈö˗ ˗tadhɛ ˗yö ꞊kpɔɔ, ˈyö Ʒozue ˗ya pö ˈˈsɛgümɛn ˗nu ˗dhɛ ꞊dhɛ ˗wo wo ˗bha ꞊kwɛɛ˗ baaˈˈ kö ˗wo ʒiö. ˈÖ˗ pö ˈˈsaabhomɛn ˗nu ˗dhɛ ˗wo ˗mlɛɛn ꞊gbëë ˈö bhë ˗a ˈsü kö ˗wo yö ˗an ˗dhɛ ˈˈdhiʋ̈ Ʒuudɛn ga ꞊bhaa. ˈˈYiga bhë ˗kun pa sü ˈka ꞊dedewo. ˈˈKɛɛ ˈdhɛ ˈˈsaabhomɛn ˗nu ˗gɛn ˗yö pa ˈˈyi ˈka, ˈö ˈˈyi ˗gɔ ˈgodhɛ ˗nu ˈwo ˈduannu ˈö ˈˈyi ˗yö ꞊bhʋ̈ʋ̈ ˗dhɛ ˈö ˈwo dho ʒiö ˗a ˗bha ˗a ˈgü. ˈˈSaabhomɛn ˗nu ˗wo ˈˈtasü ˈwo yö ˈˈyi ˈkpii˗ bhë˗ ꞊zinŋgü ˈwo ˗duaannu mü kö ˈˈsɛgümɛn ˗nu ˗wo ˈˈyi ˈˈkan. ˗Dhidha ˈö Zoova ˗ya kë ˈˈdhʋ̈, ka ˗bhaa ˈgü yö ˈti ˗an ˗zobüö pë ˈö Zoova ˗ya ˗kë ꞊weeyi ꞊zɔɔndhö ꞊bhaa bhë ˗a ˈka ˗ee?

ˈKö ˗kë ꞊dhɛ ˗kwɛ ꞊va ˗yö ʒiö, Izraɛdhömɛn ˗nu ˗wo ˗lo ˈˈsɛ ˈö ˗Zlan ˗ya ˈˈplüün bho ˗an ˗dhɛ bhë ˗a ˈgü. ˗Wo ꞊mɔɔn˗ ˗bha ꞊taabha ˈwo wo ˗bha ˈkɔ waa ˈˈkwipö ˗nu dɔ, ˈwo pë ˗nu ta, ˈwo ꞊drɔɔn waa ˈˈdhü ˈˈwɛɛ ˗nu ta. ˗Yö ˗kun ˈˈsɛ ˈö ˈˈnɔnnɔn waa ˈˈzo ˈˈɲɔɔn ˈwo kun mü ˗a ˈka.