꞊Gɛandhe do ˈbha gbö ˗ya ˈgo ga ˈgü

Blɛɛˈˈ yi ˈka ˈyö Zoova ˗ya pö Edhi ˗dhɛ: ‹˗Bhö dho Sadhɛta. ꞊Gɛandhe do ˈbhaa ˈö mü ˗dho ü gba ˗bhöpë ˈka›. Edhi ˗yö ˗kpan ꞊gɛandhe ˈˈflɛɛsü do ˗bha kö ˗yö ˈˈwɔ ˗lö ˗ni ˈgü ˗da ˈˈplöö ˗dhɛ ˈgü, ˈö˗ pö ˗a ˗dhɛ: ‹˗Bhö n gba ˈˈyi ˈka.› ˈDhɛ kun dho ˗ni ˈgü ˗a ˈsü, ˈyö Edhi ˗ya pö: ‹Dɔ ˈˈgbɩɩ˗ ü nu n dhɛ ˈbluu˗ ˈˈklu ˈnën ˈbhaa ˈka.› ˈYö ꞊gɛandhe ˗ya pö: ‹ˈBluu˗ ˈyaa n gɔ kö ˈa˗ nu ü ˗dhɛ.› ‹Pë n gɔ ʒian ˈyö ˗tɔ ˈbluu˗ ˗bi waa ˈˈɲɔn dɔɔni ˈö maan˗ ˈsü kö ˗a ˗bhöpë ˈdɛdɛ ˗kpa yaa n gbö yi ˗bha ˈka.› ˈYö Edhi ˗ya pö: ‹ˈBha ˈbluu˗ kë ˈbha˗ nu n ˗dhɛ, Zoova ˗ya ˗pö ü ˗bha ˈbluu˗ ˗bi waa ü ˗bha ˈˈɲɔn ˈti dho ɲën ˈö dho ˈö yö ˈka dha nu yi ˗bha.›

꞊Gɛandhe ˈö bhë ˗yö ˗dho ö ˗gɔ ˈkɔɔ ˈö ˈbluu˗ ˗pëkë Edhi ˗bha ˈka ꞊dhɛ ˗kɔ ˈö Edhi ˗ya pö ˗a ˈka ˗a ˈdhö. ꞊Gɛandhe waa ö ˗bha ˈnën ˗wo ˗bhöpë ꞊slɔɔ yi ꞊gban ˈka blɛɛˈˈ yi ˈˈtʋ̈ŋ ˈö bhë ˗a ˈgü. ˗A ˗bha ˈbluu˗ ˗bi waa ˈˈɲɔn ˗lo ˗a ˈgü pë wo ˈti bhʋ̈ʋ̈ˈˈ.

ˈDhɛ ˗kë ˈˈdhʋ̈, ˈwɔn ˈgbɩɩ˗ bha ˗yö ˗kë. ˈˈYua ˈˈgbɩɩ˗ ˗yö ˗ya ꞊gɛandhe gbö ˗bha ˈö ga. ˗Yö ˗bhɛɛ Edhi ˗dhɛ kö ˗ya ˗takun. ˈYö Edhi ˗yö ˈnëngɔn ˈnën bhë˗ sü ˈö dho ˈka ˈkɔ bhë ˗a ˈˈdhi do ˈgü. ˈYö˗ ˗wɔ ˈdhii˗ ˗ta ˈö ꞊bhɛɛ Zoova ˗dhɛ ˈö˗ pö: ‹Zoova ˗bhö dɔ ˈˈgbɩɩ˗ ˈü ˈnën ˈö yö ˗a bho ga ˈgü. Pë ˈö˗ ˗dhɛ Zoova ˗gɔ bhë, ˈpë ˗kë ˈö kun ˈwɔn ˈˈmlünmlünsü ˈka ü˗ ˗dɔ ˗ee? ˗A ˗gɛn ˗mü ˗dhɛ kö mɛn ˈbha ˈti go ga ˈgü do. ˈGo mü ˈzü ꞊gɛandhe waa ˗a gbö ˈwaa kun Izraɛdhömɛn ˗nu ˈka.

ˈNëngɔn ˈnën bhë ˈö ˗ya ˈˈtɛɛ ˗sü bha ˈzü ˗dɛɛwo! ˈYö Edhi -ya pö ꞊gɛandhe bhë˗ ˗dhɛ: ‹˗Dhɛ ˗ga, ü gbö ˗yö ˈˈbhɩɩ˗.› ˈYö˗ ˗pö Edhi ˗dhɛ zuʋ̈gblüdhi ꞊dede ˈka: ‹˗Zlan ˗bha mɛn ꞊dede ˗mü ü ˈka a˗ ˈwɔn dɔ ꞊dhɛ pë ˈˈpɛpɛ ˈü˗ pö ˗yö ˗go ˗Zlan ˈnën ˈˈpiʋ̈ ˈö pë ˈü˗ pö ˗a ꞊gban ˗yö ˗kë yi ꞊gban ˈka.›