-Zlan -bha ˈˈkië -nu -wo Yesu bhɔ ˗sü ˗wɔn ˗blɛɛ

Sezaa Ogisö ˈö kun Wlɔmö ˈˈsɛkɔɔnmɛn ˈka, ˗ya ˗pö Zuifö ˗nu ˗dhɛ ˗wo ˈdho wo bhɔ ˗a ˈgü ˗pö ˗nu ˈgü kö ˗wo wo ˈtɔ ˗ya. ˈDhɛ ˗kë ˈˈdhʋ̈, Zozɛfö waa Madhi ˗wo ˗dho Betedhɛmö ˈö ˗kë Zozɛfö ˗go ˗a ˈgü ˈpö˗ ˈka bhë, ˗a ˈgü. ˈÖ kun ˈˈdhʋ̈ kö Madhi ˈnën ˈkpɔ ˈˈtʋ̈ŋ ˈyaa ꞊gblɛɛn ˈzü.

ˈDhɛ ˈwo ˗wo Betedhɛmö, ˗dhɛ ˈbhaa ˈwo dho ˈto ˗a ˗bha ˈyaa kun ˗dhö, kö ˈyii kë ˗tuëë ˗nu wɔdhɛ ˈka. ˗Dhɛ ˈö bhë ꞊nën˗ ˈgü ˈyö Madhi ˗yö ö gbö Yesu kpɔ ˗a ˗bha. ˗Yö sɔ ˗plʋʋ ˗a ˈka, ˈö˗ ˗wɔ ˗tuëë ˗nu pëbhö ˗a ˈgü ˗pë ˈgü.

˗Tuëëmaankëmɛn ˈbhaa ˗nu ˗kun wo ˗bha ˗tuëë ˗nu ˗maankë ˗ni ˈgü Betedhɛmö ˗dhɛ ˈˈsɔɔ, gbeŋ. ˈDhɛ ˈwo dho ˈˈkan wo ˗ta, kö Zoova ˗bha ˈˈkiö do ˗ya ˗wo ˗an ˈˈɲandhiʋ̈. ˈYö ˈˈshiʋ̈ ˈbhü ˈö go Zoova ˈˈpiʋ̈ ˈö ˗dhɛ ˗pʋ ˗an ˗züzüdhɛ ꞊gban ˈgü. ˈˈSuʋ̈ ˗yö ˗da ˗an ˈgü ꞊dedewo, ˈˈkɛɛ ˈyö˗ ˈˈkiö ˗ya pö ˗an ˗dhɛ: ‹ˈˈSuʋ̈ ˈyaa dho ka kë. Nɔɔn˗ ˗së ˈbha ˗yö n ˗gɔ. Mesi ˗ya bhɔ Betedhɛmö ꞊dɛɛ.› ˈDhɛ ˈö˗ pö ˈˈdhʋ̈, ˈyö ˗Zlan ˗bha ˈˈkiö ꞊va ꞊dede ˗wo wo, ˈö ˈwo ˗ya ˗a pö ˗sü ˗bha: ‹˗Zlan ˈö pë ꞊gban ˈˈpɛpɛ ˗gɔ ˗ta dhaŋ˗ ˈgü, ˗a ˈtɔ ˗yö bhɔ. ˗Dhikodhɛ ˗yö kë ˗Zlan waa mɛn ˗nu ˈö ˗an ˗dhɔ ˗ya ˗kë ˈˈsɛ ˗ta ˗an ꞊zinŋgü›.

ˈDhɛ ˗kë ˈˈdhʋ̈ ˈyö ˗tuëëmaankëmɛn ˗nu bhë ˈwo ˗ya ˗a pö ˗sü ˗bha wo ˈko ˗nu ˗dhɛ: ‹˗Kwa ˈdho Betedhɛmö.› ˈDhɛ ˗kë ˈˈdhʋ̈, ˈyö ˈwo dho mü ˈzozodhö ˈö ˈwo ˗kpan Madhi waa Zozɛfö ˗an ˗bha kö ˈnën ˈˈblë ˈˈpuu ˈö bhë ˗yö wɔ ˗sü ˈka ˗tuëë ˗nu pëbhö ˗a ˈgü ˗pë ˈgü.

ˈYö mɛn ˈˈpɛpɛ ˗wo pë ˈö ˗tuëëmaankëmɛn ˗nu ˈwo kun ˗a pö ˗ni ˈgü bhë ˗a man, ˈyö˗ ˈwɔn ˗yö ˗an kun. Madhi ˗zë ˗yö ˗kun ˗wo ˗nu ˈwo bhë ˗an ꞊gban ˈkun ˗ni ˈgü ö zuʋ̈ˈˈ ˈˈpiʋ̈, ˈö ö ˗zota ˗an ˈgü. ˈDhɛ ˗kë ˈˈdhʋ̈, ˈyö ˗tuëëmaankëmɛn ˗nu bhë ˈwo wo ꞊yɛɛ ˗kë ˈwo dho, kö ˗wo ˗Zlan ˈtɔ bhɔ ˗ni ˈgü pë ˈwo˗ man waa pë ˈwo˗ ˗kpan ˗a ˗bha bhë, ˗an ˗wɔn ˈgü.