Zoova ˗yö ö ˗kɔ ˗kpa Yesu ˗ta

ˈˈSɛgɔ do ˈbhaa ˗kun Izraɛdhö ˈɲaan˗ ˗wo ˗ʒian ˈka, ˈö˗ ˈgümɛn ˗nu kun wo ˗zoyö ˗ni ˈgü ꞊dhɛ ˈˈsusënŋga ˗nu ꞊mɔɔn˗ ˗bha ˈwo ʒiaan bho mɛn ˈka. Gbeŋ do ˈka, gɔɔn˗ ˈbha ˗nu ˈwo ˈˈsɛ bhë ˗a ˈgü ˗wo ˗kpan ˈˈsusënŋga do ˈö˗ ˈbhü ˈdhö kun bhɔ ˗ni ˈgü ˗a ˗bha, kö ˗yö ˈgo ˗ni ö ˈˈgblʋʋ. ˗Wo ˗ʒiö «ˈˈsusënŋga» ˈö bhë ˗a ꞊kee˗, ˈö dho ˗an ˈka Zedhizadhɛmö. ˗Wo ˗ya mɛn ˗nu dhɛɛˈˈ ˈkpɔ ˗sü ˗bha ˈwo˗ pö: ‹ˈNën ˈö ˗dho kë Zuifö ˗nu ˗bha ˗gblüdë ˈka bhë, ˗yö ˈˈmɛn? Yi nu kö ˈyi ꞊dhɔŋ ˗da ˗a ˗dhɛ.›

ˈDhɛ Edhɔdö ˈö kun ˗gblüdë ˈka Zedhizadhɛmö ˗yö ˈwɔn ˈö ˗gban ˗gblüdë ˗dɛɛ ˈbha ˗bha ˗a man, ˗ya zuʋ̈dhiʋ̈tɛɛ ꞊dedewo. ˗Yö ˈˈsaabhomɛn ˗nu ˗gɔmɛn dhɛɛˈˈ ˗kpɔ ˈö˗ pö: ‹˗Wa ˗pö ˗gblüdë bhë ˗dho bhɔ ˈˈmɛn?› ˈYö ˈwo˗ pö: ‹˗Zlan ˗wodhiʋ̈lomɛn ˗nu ˗wa ˗pö ꞊dhɛ ˗yö ˗dho bhɔ Betedhɛmö.› ˈDhɛ ˗kë ˈˈdhʋ̈ ˈyö Edhɔdö ˗ya pö gɔɔn˗ ˗nu ˈwo go ˈɲaan˗ ˗wo ˗ʒian ˈka bhë ˗an ˗dhɛ: ‹˗Ka ˈdho Betedhɛmö ˈka ˗wo ˈnën ˈö bhë ˗a ˗bha, kö ˈka nu ˈka˗ ˗dhɛ ˗zɔn n ˗dhɛ. A˗ ˈˈpiʋ̈ kö ˈa ꞊dhɔŋ ˗da ˗a ˗dhɛ ˈpö.› ˈˈKɛɛ ꞊sua ˈnën kun ˗a ˈka.

«ˈˈSusënŋga» ˈö bhë ˗yö ˗go ö ˈˈgblʋʋ ˈzü ˈö gɔɔn˗ ˗nu bhë ˗wo to ˗a ˈˈpiʋ̈ ˈwo ꞊lo Betedhɛmö. ˗Yö dho ˈö ˈduannu ˈkɔ do ˈbhaa ˗ta ˈˈdhʋŋ, ˈö gɔɔn˗ ˗nu bhë ˗wo ˗da ˗a ˈgü. ˈDhɛ ˈwo ˗da mü, ˗wo ˗kpan Yesu waa˗ dhe Madhi ˗an ˗bha. ˗Wo ˈˈgblëënnu ˈnën ˈö bhë ˗a ˗dhɛ ˈˈshia˗ ˈyö ˈwo ˈˈsënŋ ˗nu, pë ˗bi ˈö ꞊waa˗ ˈˈgʋ̈ ˈö˗ ꞊fii ˗yö ˗kë ˗së waa ˈˈɲɔn ꞊fii ˗së ˗sü ˈö ˈwo˗ ˈmiidhö ˗kë bhë, ˗an gbɔɔ ˗a ˗gɔ. Zoova ˈnën mɛn ˗nu bhë ˗an bɔ Yesu ˈˈpiʋ̈ ˗ee? ˗Abin!

Gbeŋ do ˈö bhë ˗a ˈka Zoova ˗ya ˗pö Zozɛfö ˗dhɛ ˈˈɲɛɛn ˈgü ꞊dhɛ: ‹Edhɔdö ˗ya ˈˈpiʋ̈ ˈö Yesu zë. ˗Bhö ü -bha dhebɔ waa ü ˗bha ˈnën ˈsü ˈü ˈdho ˗an ˈka Ezitö. ˗Ka ˈto mü ˗yö yö˗ ˈka ˈˈtʋ̈ŋ ˈa dho ˗a pö ˗a ˈka ü ˗dhɛ ꞊dhɛ ˈka ka yɛɛkë bhë˗ ˗bha.› Zozɛfö ˗to ˈˈshia˗ mü ˈö ö ˗bha ˈkɔdhigümɛn ˗nu sü ˈwo dho Ezitö.

Zoova ˗ya ˗pö mɛn ˗nu ˈwo go ˈɲaan˗ ˗wo ˗ʒian ˈka bhë ˗an ˗dhɛ ꞊dhɛ ˈwaa ˈdho wo yɛɛkë Edhɔdö ˈˈpiʋ̈. ˈDhɛ Edhɔdö ˗ya ˈwɔn dɔ ꞊dhɛ wo ˈti dho wo yɛɛkë ˈzü ˗a ˈˈpiʋ̈, ˈyö ˈwɔn ˗yö ꞊shiö ˗a ˗dhɛ. ˈDhɛ ˗kë ꞊dhɛ yö ˈti ˗kpan Yesu ˗bha bhë, ˗ya ˗pö ˗wo ˈnën ˗nu ˈö waa Yesu ˗nu ˗kwɛ ˈdhö do ˗an ꞊gban zë. ˈˈKɛɛ Yesu ˗kun Ezitö ö ˈflëëgü.

ˈDhɛ ˈˈtʋ̈ŋ ˗bha ˗yö ˗ʒiö Edhɔdö ˗yö ˗ga. ˈYö Zoova ˗ya pö Zozɛfö ꞊dhɛ: ‹Ü ꞊mɔɔn˗ ˗bha ˈü ü yeekë ü ˈflëë˗ ˈgü.› ˗Dhɛ ˈö ˗kë ˈˈdhʋ̈, ˈyö Zozɛfö, Madhi waa Yesu ˗wo wo yeekë Izraɛdhö, ˈwo ˗ya Nazadhɛtö.