Yesu ˗yö ˗ga Gɔlügota

ˈDhɛ ˈˈsaabhomɛn ˗gɔmɛn ˗nu ˗wo nu Yesu ˈka ˈˈsɛkɔɔnmɛn Pidhatö ˗gɔ ˈkɔɔ, ˗ya dhɛɛˈˈ ˗kpɔ ˈö˗ pö: ‹Ka˗ ˗pö ˗mën ˗wɔn yaa ˈö gɔndënën ˈö yö ˈö˗ ˗kë?› Yö ˈwo˗ pö ˗a ˗dhɛ: ‹˗Ya ˗pö ˗Gblüdë ˗mü ö ˈka!› ˈYö Pidhatö ˗yö Yesu dhɛɛˈˈ kpɔ ˈö˗ pö: ‹Bhi ˈnën ˈü ˗tɔ Zuifö ˗nu ˗bha ˗Gblüdë ˗ee?› ˈYö Yesu ˗ya pö: ‹N ˗man ˗Gblüdëdhɛ ˈyaa ˈˈkpɔnŋ ꞊taa yö.›

ˈDhɛ ˈö ˗kë ˈˈdhʋ̈, ˈyö Pidhatö ˗yö Yesu bɔ Edhɔdö ˈö ˗kë Galile ˗sɛkɔɔnmɛn ˈka bhë ˗a ˗dhɛ, ˈˈni ˈö ꞊mɔɔn˗ ˗bha ˈö ˈwɔn yaa ˈbha yö ˗a ˗bha, kö ˈö˗ ˈwɔn dɔ. ˈˈKɛɛ Edhɔdö yö ˈti ˈwɔn yaa ˈbha yö ˗a ˈbha. ˗A ˗wɔn ˈgü ˈyö˗ bɔ ˈzü Pidhatö ˗dhɛ. ˈYö Pidhatö ˗ya pöˈˈsɛgümɛn ˗nu dhɛ: ‹Yaa Edhɔdö ˈwɔn yaa ˈyi ˗dho ˗a yö gɔndë ˈö yö ˗a ˗bha ˈyaa ˈdhö. ˈDhɛ ˈˈdhʋ̈, a dho n ꞊kwaa˗ ˗zü› ˈˈKɛɛ mɛn ˈˈpɛpɛ ˈwo kun mü ˗wo ˗gbla ˈwo˗ pö: ‹˗Bhö ˗a zë, ˗bhö ˗a zë!› ˈYö ˈˈsɔdha ˗nu ˗wo Yesu man ˗klaaga ˈka, ˈö ˈwo wo ˈˈdhidhi ˗nu bho ˗a ˗bha.

˗Wo ˗dho Yesu ˈka ˗dhɛ ˈbha ˈwo˗ ˗dhɛ Gɔlügota ˗a ˈgü, ˈyö ˈwo˗ dɔ ˈˈdhü ˗bha. ˗Yö ˗bhɛɛ ˈö˗ pö: ‹N Dë, ˗bhö ˗an ˗bhawɔnto ˈyö ˗tɔ ꞊dhɛ pë ˈwo˗ kë ni ˈgü ˈwaa˗ dɔ wo ˗de ˗gɔ.› Mɛn ˗nu ˗wo ꞊wɛɛ ˗dɔ Yesu ˗bha ˗a pö ˗sü ˈka ꞊dhɛ: ‹꞊Ya kë ꞊dhɛ ˗Zlan Gbö ˗mü ü ˈka, ˗bhö ˈgo ˈˈdhü bhë˗ ˗bha kö ˈü ü ˗de dha!›

ˈWɔnyaakëmɛn do ˈö kun dɔ ˗sü ˈka ˈˈdhü ˗bha ˗a ˈˈsɔɔ, ˗ya ˗pö ˗a ˗dhɛ: ‹ˈBha ˗ya ü ˗bha ˗Gblüdëdhɛ ˈgü, ü zo ˈyaa ˈdho bhɔ n ˈka›. ˈYö Yesu ˗ya: ‹Ü ˗dho kë n ꞊kee˗ ꞊bhɔɔ ˈˈsɛ ˗ta›. ˗Dhɛkpaɔyi ˈö bhë ˗a ˈˈdooka, ˗dhɛ ˗yö ˗tröö ꞊dedewo ˈˈlɛlɛ ˗yaaga ˈˈpiʋ̈ ˈpö˗ bhë ˗a ˗ta. Yesu ˗bha gwëëˈˈ ˈbha ˗nu waa˗ dhe Madhi ˗wo ˗kun dɔ ˗sü ˈka ˈˈdhü bhë ˗a ˈˈsɔɔ. ˈYö Yesu ˗ya pö Zan ˗dhɛ ˗yö ö ˗zokë Madhi ˈˈpiʋ̈ ꞊dhɛ ö ˗de dhe ˈdhö.

˗A ˈˈdhiʋ̈tadhɛ ˈgü Yesu ˗ya ˗pö: ‹ˈWɔn ꞊gban ˈˈpɛpɛ ˗ya yökodhiʋ̈.› ˈYö ö ˗gɔ ˈˈgblëënnu ˈö ga. ˗A ˈˈtʋ̈ŋ do ˈö bhë ˗a ˈka ˈˈsɛ ˗yö ˗zii ˗kɔ yaa ˗kë. ˈYö ˗ʒiö ˈˈkpan ˈˈdhiʋ̈ sɔ ˈö ˗Zlan ˗dhɔkëdhɛ waa˗ ˗dhɔkëdhɛ ꞊dede ˗an ꞊zinŋ ˈgü bhë ˈö ˗pɛkoo ꞊plɛ. ˗Dhɛ ˈö ˗kë ˈˈdhʋ̈, ˈyö ˈˈsɔdha ˗gɔmɛn do ˗ya pö: ‹˗A zɔɔdhɛ ˈyaa ˈdhö, mɛn ˈö yö ˗Zlan Gbö ꞊dede ˗mü.›